Se tmur tgħix barra minn pajjiżek? Ħejji d-dokumenti tiegħek

Li tmur tgħix barra minn pajjiżek hija bidla importanti fil-ħajja li hija kemm eċċitanti kif ukoll sfida. Il-lista ta’ affarijiet li għandek tieħu ħsieb qabel ma tkun tista’ tħossok stabbilit fil-pajjiż il-ġdid tidher bla tmiem, u anke l-aktar pjanifikaturi metikolużi jsibu ruħhom stressati f’xi mument. Mod wieħed kif timminimizza l-inkonvenjent assoċjat ma’ dan il-pass huwa li jkollok id-dokumentazzjoni kollha tiegħek lesta minn qabel, sabiex ma ssibx diffikultà fl-aħħar minuta biex tirkupra dokument importanti, jew agħar, tirrealizza li m’għandekx xi ħaġa kruċjali meta tkun ’il bogħod minn pajjiżek.

Hawn taħt għandek hawn lista tal-aktar dokumenti essenzjali li jkollok bżonn. Żomm l-oriġinali miegħek, iżda kun ċert li jkollok kopji stampati u diġitali. Żomm f’moħħok li għal xi wħud mid-dokumenti, jista’ jkollok bżonn tipprovdi traduzzjonijiet notarili skont l-użu maħsub tagħhom.

Passaport/karta tal-identità nazzjonali. Ir-“re” tad-dokumenti tal-ivvjaġġar – il-passaport – huwa l-ewwel oġġett li għandu jitpoġġa fil-basket tal-ivvjaġġar tiegħek. Jekk inti ċittadin ta’ wieħed mis-27 Stat Membru tal-UE, l-Iżlanda, il-Liechtenstein, in-Norveġja jew l-Iżvizzera, tista’ tuża wkoll il-karta tal-identità nazzjonali tiegħek bħala dokument tal-ivvjaġġar f’dawk il-pajjiżi. Iċċekkja d-dati ta’ skadenza tad-dokumenti tiegħek biex tiżgura li huma validi.

Ċertifikati tat-twelid għal kull min hu involut fir-rilokazzjoni. Jekk inti miżżewweġ, ikollok bżonn ukoll iċ-ċertifikat taż-żwieġ tiegħek. Jekk attwalment m’għandekx dawn id-dokumenti, dawn jistgħu jinħarġu mill-uffiċċju tar-reġistru ta’ pajjiżek, għaldaqstant iċċekkja qabel ir-rilokazzjoni tiegħek.

Rekords mediċi. Dawn huma kruċjali biex tiġi żgurata tranżizzjoni bla xkiel tal-kura tas-saħħa tiegħek bejn il-pajjiżi, u b’hekk tforni lit-tabib il-ġdid tiegħek bl-informazzjoni meħtieġa dwar l-istorja medika u l-ħtiġijiet tiegħek. Ir-rekords tat-tilqim għandhom ikunu wkoll parti minn dan il-pakkett, speċjalment għat-tfal żgħar li jista’ jkun għadhom ma kkompletawx l-iskeda ta’ immunizzazzjoni tagħhom.

Ċertifikati akkademiċi u professjonali. Dawn jinħarġu mill-istituzzjonijiet akkademiċi rilevanti. X’aktarx li jkollok tipprovdihom lill-impjegatur il-ġdid tiegħek.

Rekords tal-edukazzjoni u tal-iskola. Dan japplika prinċipalment għat-tfal li jivvjaġġaw miegħek, iżda jkollok bżonn ukoll traskrizzjonijiet tal-iskola/tal-università tiegħek jekk qed tippjana li tkompli l-edukazzjoni tiegħek barra minn pajjiżek waqt li tkun qed taħdem.

Liċenzja tas-sewqan Jekk issuq, ikollok bżonn il-liċenzja tas-sewqan biex tikri jew tixtri karozza fid-destinazzjoni l-ġdida tiegħek, u trid tkun turiha lill-awtoritajiet jekk qatt titwaqqaf. Kun ċert li tiċċekkja x’japplika fil-pajjiż ta’ destinazzjoni tiegħek. B’mod ġenerali, jekk il-liċenzja tiegħek tkun inħarġet minn wieħed mill-pajjiżi msemmija hawn fuq, din tkun valida bejn il-fruntieri tal-UE. Huwa importanti li wieħed jinnota li fl-UE, liċenzja tas-sewqan ma titqiesx bħala forma valida ta’ identifikazzjoni personali.

Prova ta’ indirizz. Tintalab tipprovdi prova ta’ indirizz f’bosta okkażjonijiet, pereżempju meta tiftaħ kont bankarju, titlob self, jew tirreġistra għal servizzi tal-gvern lokali. Kont ta’ utilità jew kuntratt ta’ kiri/xiri jservu dan l-iskop tajjeb.

Jekk għandek annimali domestiċi, tinsiex id-dokumenti tagħhom ukoll! Dawn jinkludu passaport Ewropew tal-annimali domestiċi validu u ċertifikat tal-UE tas-saħħa tal-annimali. Qabel ma tivvjaġġa bl-annimal domestiku tiegħek, iċċekkja bir-reqqa r-rekwiżiti kollha għall-ivvjaġġar, kif ukoll id-dħul f’pajjiż ġdid.

Qed tfittex xogħol fl-UE? L-artiklu tagħna Kif tuża l-Jiem Ewropej tal-Impjiegi biex issib xogħol barra mill-pajjiż joffri informazzjoni utli dwar kif tagħmel l-aħjar użu minn dawn l-avvenimenti madwar l-UE kollha li jlaqqgħu flimkien lill-persuni li qed ifittxu impjieg u l-impjegaturi.

Links relatati:

Il-EURES u l-impjieg transfruntier: sħubija li minnha jgawdi kulħadd

Il-Kummissjoni Ewropea:Tiċċaqlaq u taħdem fl-Ewropa

Aqra aktar:

Il-Jiem Ewropej tal-Impjiegi

Sib Konsulenti tal-EURES

Il-kundizzjonijiet tal-għajxien u tax-xogħol fil-pajjiżi tal-EURES

Bażi tad-Data tal-Impjiegi tal-EURES

Is-servizzi tal-EURES għall-impjegaturi

Kalendarju tal-Avvenimenti tal-EURES

Avvenimenti Online li ġejjin

Il-EURES fuq Facebook