L-EURES u l-impjieg transfruntier: sħubija li minnha jgawdi kulħadd

Fl-2022, madwar 1.8 miljun ħaddiema fl-UE u fil-pajjiżi tal-EFTA ġew irrappurtati bħala residenti fi Stat Membru wieħed u jaħdmu f’ieħor. Dawn il-ħaddiema transfruntiera jeżerċitaw id-dritt tagħhom li jiċċaqilqu liberament bejn il-fruntieri tal-UE għax-xogħol, u dan jipprovdi ħafna opportunitajiet għal sodisfazzjon professjonali. 

Ix-xogħol transfruntier jista’ jħeġġeġ ukoll it-tkabbir ekonomiku u l-koeżjoni fir-reġjuni tal-fruntiera tal-UE, li jkopru 40 % tat-territorju tal-UE. Bl-influss ġust ta’ ħaddiema, ħafna minn dawn ir-reġjuni jistgħu jiġu ttrasformati minn żoni periferali f’żoni ta’ tkabbir u ċentri ta’ opportunità sinifikanti.

Madankollu, l-impjieg transfruntier spiss iġib miegħu ostakli relatati mad-differenzi bejn il-pajjiżi dwar is-sistemi tas-sigurtà soċjali (eż. l-assigurazzjoni tas-saħħa, il-benefiċċji tal-familja, il-qgħad, l-irtirar), l-oqfsa tal-impjiegi, u r-regoli tat-tassazzjoni, biex insemmu xi wħud. Dawn il-kwistjonijiet jikkonċernaw mhux biss lill-ħaddiema, iżda lill-impjegaturi wkoll.

Skopri s-sħubijiet transfruntiera tal-EURES, stabbiliti biex jappoġġaw il-vjaġġ tal-mobbiltà tal-ħaddiema tiegħek. Bħalissa, jeżistu sitt sħubijiet bħal dawn madwar l-Ewropa, li jgħinu lill-impjegati prospettivi u lill-impjegaturi jinnavigaw il-prattikalitajiet tax-xogħol/tas-sejbien ta’ post/tar-reklutaġġ bejn il-fruntieri. 

Kif jaħdmu s-sħubijiet transfruntiera tal-EURES?

Iffinanzjati mill-Fond Soċjali Ewropew Plus (FSE+), l-istrument ewlieni tal-UE għall-investiment fin-nies u għall-appoġġ tal-implimentazzjoni tal-Pilastru Ewropew tad-Drittijiet Soċjali, is-sħubijiet transfruntiera tal-EURES huma responsabbli:

• għall-għoti ta’ informazzjoni u pariri dwar kwistjonijiet ta’ impjieg transfruntier (eż. residenza tat-taxxa/dikjarazzjonijiet tat-taxxa, rekwiżiti speċjali skont il-pajjiż,);
• li jaġixxu bħala punti ta’ kuntatt bejn il-persuni li qed ifittxu impjieg u l-impjegaturi billi joffru servizzi ta’ kollokament u/jew jgħinu fir-reklutaġġ transfruntier;
• li jlaqqgħu flimkien diversi entitajiet ewlenin (sħab) li jistgħu jiffaċilitaw il-proċessi tal-mobbiltà tal-ħaddiema transfruntiera, bħal assoċjazzjonijiet tal-ħaddiema, trade unions, servizzi pubbliċi tal-impjiegi, istituzzjonijiet tal-edukazzjoni, awtoritajiet lokali, skemi ta’ appoġġ għall-impjiegi, u korpi tas-sigurtà soċjali.

Qed nikkunsidra opportunità ta’ xogħol transfruntier. Liema riżorsi huma disponibbli?

In-network tal-EURES huwa s-sors ewlieni tiegħek għall-kwistjonijiet kollha tal-mobbiltà tal-ħaddiema. Għal aktar informazzjoni dwar opportunitajiet ta’ xogħol transfruntier u pariri dwarhom, jekk jogħġbok żur il-paġna ddedikata tal-EURES dwar ir-reġjuni transfruntiera. Tista’ tfittex ukoll Konsulenti tal-EURES billi tikklikkja fuq it-tab “Skont is-sħubija transfruntiera”.

Kun ċert li tara dan il-vidjo tal-EURES, fejn żewġ ħaddiema mis-Slovenja jikkondividu l-esperjenza tagħhom li jaħdmu fl-Italja, u skopri kif is-sħubija transfruntiera lokali tal-EURES għenithom billi pprovdietilhom pariri u appoġġ.

Sir af aktar dwar is-sħubijiet transfruntiera tal-EURES hawnhekk. 

Għal aktar informazzjoni prattika dwar l-ivvjaġġar transfruntier lejn ix-xogħol u lura, ikklikkja hawnhekk.

Links relatati:

Ir-rapport annwali tal-Kummissjoni Ewropea dwar il-mobilità tal-ħaddiema intra-UE tal-2023 

X’hemm ġdid fit-telexogħol transfruntier u s-sigurtà soċjali?

Uffiċċju tal-Pubblikazzjonijiet tal-Unjoni Ewropea:Xogħol transfruntier fil-pajjiżi tal-UE u tal-EFTA

Aqra aktar: 

Il-Jiem Ewropej għall-Impjiegi

Sib Konsulenti tal-EURES

Il-kundizzjonijiet tal-għajxien u tax-xogħol fil-pajjiżi tal-EURES

Il-Bażi tad-Data tal-Impjiegi  tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Online li ġejjin

L-EURES fuq Facebook

L-EURES fuq X

L-EURES fuq LinkedIn

L-EURES fuq Instagram