Ikseb il-ħiliet li jridu l-impjegaturi Ewropej permezz ta’ edukazzjoni u taħriġ vokazzjonali

Gain the skills European employers need with vocational education and training

Hemm diskrepanzi fil-ħiliet f’diversi setturi tal-UE, mit-trasport sal-kura tas-saħħa, kif ukoll f’dawk assoċjati mat-trażizzjoni doppja ekoloġika u diġitali tal-UE. Il-persuni li qed ifittxu impjieg li jagħmlu taħriġ biex itejbu l-kompetenzi tagħhom jistgħu jibbenefikaw minn dawn l-opportunitajiet – filwaqt li l-impjegaturi jistgħu jimlew il-postijiet vakanti kritiċi fin-negozji tagħhom.

L-EfVET twaqqaf fl-1991 biex jibni network ta’ partijiet ikkonċernati tal-VET u jiżgura li dawn ikunu rrappreżentati fit-tfassil tal-politika Ewropea. Illum l-organizzazzjoni tirrappreżenta lil aktar minn 450 membru f’aktar minn 60 pajjiż, u tilħaq aktar minn 1 500 fornitur tal-VET li jirrappreżentaw madwar 2 miljun student.

Il-maniġer tal-promozzjoni u tal-proġetti tagħha Emilio Dogliani jgħid li l-VET għandhom rwol importanti x’jaqdu biex jgħinu jħarrġu liż-żgħażagħ biex isibu posthom fis-suq tax-xogħol Ewropew. “Hekk kif is-suq tal-UE jsir aktar volatili, u l-avvanzi teknoloġiċi jsiru b’rata aktar mgħaġġla, it-titjib u t-taħriġ mill-ġdid tal-ħiliet taċ-ċittadini jsiru essenzjali,” huwa jgħid. B’mod partikolari, jenfasizza li n-NEETs – żgħażagħ barra mill-edukazzjoni, impjieg jew taħriġ – jistgħu jsibuha utli li jikkunsidraw it-taħriġ vokazzjonali bħala perkors edukattiv. B’dan il-mod, il-persuni li qed ifittxu impjieg jistgħu jiksbu ħiliet li huma skarsi fis-suq tax-xogħol u b’riżultat ta’ dan isibu impjieg sodisfaċenti.

Iċ-ċifri uffiċjali tal-UE juru li 80 % ta’ dawk li gradwaw mill-VET fl-2024 issa huma impjegati. Il-mira tal-UE hi li sal-2025, 82 % tal-gradwati tal-VET ikunu impjegati.

“Dawn l-istatistiċi juru li l-VET huma s-soluzzjoni għal ħafna persuni li qed ifittxu impjieg u li jixtiequ jidħlu jew jerġgħu jidħlu fis-suq tax-xogħol,” jgħid Dogliani. “Sfortunatament, madwar l-Ewropa, il-VET għadhom jitqiesu bħala perkors edukattiv ta’ livell sekondarju meta mqabbla mal-edukazzjoni ġenerali. B’riżultat ta’ dan, l-għarfien dwar l-opportunitajiet li dan is-settur jista’ joffri huwa relattivament baxx.”

Nisfruttaw l-opportunitajiet bl-aħjar mod

L-EfVET jirrakkomanda lill-persuni li qed ifittxu impjieg biex iqabblu l-ħiliet tagħhom ma’ rwoli li hemm domanda għalihom f’oqsma li jvarjaw mill-kura tas-saħħa sal-IT, u biex jikkunsidraw kif jistgħu jużaw it-taħriġ biex ikomplu jtejbu dawn il-ħiliet. Xi fornituri tat-taħriġ vokazzjonali jaħdmu mas-settur privat biex jiżguraw li l-korsijiet li joffru jkunu estremament rilevanti għar-rwoli disponibbli. L-informazzjoni hija disponibbli wkoll mingħand l-awtoritajiet lokali, is-servizzi jew il-pjattaformi nazzjonali, fejn il-persuni li qed ifittxu impjieg jistgħu jsibu x’korsijiet hemm disponibbli li jibnu fuq il-ħiliet eżistenti tagħhom. Is-sejbien tal-fornituri tat-taħriġ l-aktar rilevanti jista’ jgħin lil persuni li qed ifittxu impjieg jidentifikaw il-kors it-tajjeb għalihom.

Ladarba l-parteċipanti jiksbu l-ħiliet meħtieġa, ikunu jistgħu jgħaddu għall-użu tas-servizzi tal-EURES bħala pass sussegwenti biex jistabbilixxu l-karrieri professjonali tagħhom.

Hemm ukoll benefiċċji kbar għall-impjegaturi, li jistgħu jsibu sħab affidabbli fis-settur tal-VET li joffru riżerva akbar ta’ kandidati potenzjali biex jimlew il-postijiet vakanti tagħhom.

Dogliani jikkummenta: “Fl-EfVET, ninsistu fuq l-importanza li tissaħħaħ il-kooperazzjoni bejn iċ-ċentri tal-VET u n-negozji, peress li nemmnu li huwa meħtieġ li tiġi żgurata r-rilevanza tal-ħiliet miksuba. Dan huwa importanti għal opportunitajiet ta’ taħriġ ulterjuri fil-kumpaniji u sabiex il-karrieri tan-nies jinbidlu f’tagħlim tul il-ħajja.”

Huwa jżid: “Aħna nenfasizzaw ukoll l-importanza li jiġu involuti l-istituti tar-riċerka u d-dinja akkademika, peress li dawn jistgħu jappoġġaw ir-rilevanza tal-kurrikuli u jidentifikaw id-diskrepanzi fil-ħiliet li l-fornituri tal-VET jistgħu jkopru bl-attivitajiet ta’ taħriġ tagħhom.”

L-EfVET u l-EURES ħadmu flimkien fuq il-kampanja tal-EURES “Il-karriera tiegħek tiftaħlek bibien ġodda”. Fuq perjodu ta' ħames xhur, il-kampanja għandha l-għan li tissensibilizza dwar kif il-EURES jista’ jappoġġa liż-żgħażagħ hekk kif jgħaddu mill-edukazzjoni għall-impjieg madwar l-Ewropa. L-EfVET enfasizza l-kampanja fuq ħames mezzi, inkluż l-ispazju tal-membri tiegħu, is-sit web u l-media soċjali tiegħu.

Għal aktar informazzjoni, żur is-sit web jew ikkuntattja lill-EfVET permezz tal-contactefvet [dot] org (email).