Faigh na scileanna a theastaíonn ó fhostóirí Eorpacha trí ghairmoideachas agus gairmoiliúint

Gain the skills European employers need with vocational education and training

Tá bearnaí scileanna le brath ar fud earnálacha an Aontais, cé acu in earnáil an iompair nó in earnáil an chúraim sláinte, chomh maith leo sin a bhaineann le haistriú glas agus le haistriú digiteach an Aontais araon. Cuardaitheoirí poist a théann i mbun oiliúna chun borradh a chur faoina saineolas, is féidir leo tairbhe a bhaint as na deiseanna sin, agus is féidir le fostóirí folúntais chriticiúla a líonadh ina ngnólachtaí dá mbarr.

Ba in 1991 a bunaíodh EfVET chun líonra de pháirtithe leasmhara gairmoideachais agus gairmoiliúna a thabhairt le chéile, agus chun a chinntiú go ndéanfaí ionadaíocht orthu i dtaobh an cheaptha beartas san Eoraip. Sa lá atá inniu ann, déanann an eagraíocht ionadaíocht ar níos mó ná 450 ball i mbreis agus 60 tír, agus sroicheann sí níos mó ná 1 500 soláthraí gairmoideachais agus gairmoiliúna a dhéanann ionadaíocht ar thart ar 2 mhilliún foghlaimeoir.

Dar le bainisteoir tionscadail agus abhcóideachta, Emilio Dogliani, tá ról tábhachtach le himirt ag an ngairmoideachas agus an ghairmoiliúint i dtaobh cuidiú le daoine óga oiliúint a fháil chun a n‑áit féin a aimsiú i margadh fostaíochta na hEorpa. ‘De réir mar a éiríonn an margadh AE níos luainí, agus an dul chun cinn teicneolaíoch ag éirí níos tapúla i gcónaí, tá sé ríthábhachtach saoránaigh a uas-sciliú agus a athsciliú,’ dar leis. Go háirithe, cuireann sé i bhfios go láidir gur féidir é a bheith úsáideach do NEETanna, i.e. daoine óga nach bhfuil i mbun oideachais, fostaíochta ná oiliúna, an ghairmoiliúint a mheas mar chonair oideachais. Ach é sin a dhéanamh, is féidir le cuardaitheoirí poist scileanna a fháil a mbíonn géarghá leo ar an margadh saothair, agus fostaíocht fhiúntach a fháil mar thoradh air sin freisin.

Léiríonn figiúirí oifigiúla AE go bhfuil 80 % de dhaoine a ar ar cuireadh gairmoideachas agus gairmoiliúint in 2024 ina bhfostaithe anois. Is é sprioc an Aontais go mbeidh 82 % de chéimithe gairmoideachais agus gairmoiliúna i mbun fostaíochta faoi 2025.

‘Léiríonn na staitisticí seo gurb iad gairmoideachas agus gairmoiliúint an réiteach do go leor cuardaitheoirí poist ar mian leo rochtain a fháil ar an margadh saothair nó rochtain a fháil air an athuair, fiú,’ a deir Dogliani. ‘Ar an drochuair, ar fud na hEorpa, tá gairmoideachas agus gairmoiliúint fós á meas mar chonair thánaisteach chun an oideachais i gcomparáid le hoideachas ginearálta. Mar thoradh air sin, tá feasacht sách íseal ann maidir leis na deiseanna ar féidir leis an earnáil seo a chur ar fáil.’

An leas is fearr is féidir a bhaint as deiseanna

Tugann EfVET comhairle do chuardaitheoirí poist a gcuid scileanna a mheaitseáil le róil a mbíonn éileamh orthu i raon leathan de réimsí, cuir i gcás cúram sláinte nó teicneolaíocht na faisnéise, agus machnamh a dhéanamh ar conas is féidir leo oiliúint a úsáid chun iad a fheabhsú tuilleadh. Oibríonn roinnt soláthraithe gairmoiliúna leis an earnáil phríobháideach d’fhonn a áirithiú go bhfuil na cúrsaí a chuireann siad ar fáil an-ábhartha do na róil ábhartha atá ar fáil. Tá faisnéis ar fáil freisin ó údaráis áitiúla, ó sheirbhísí nó ó ardáin náisiúnta, áit ar féidir le cuardaitheoirí poist a fháil amach cad iad na cúrsaí atá ar fáil a chuireann leis na scileanna atá acu cheana féin. Ach na soláthraithe oiliúna is ábhartha a aimsiú, is féidir le cuardaitheoirí poist an cúrsa ceart dóibh féin a shainaithint.

Nuair a bhíonn na scileanna riachtanacha ag oiliúnaithe, is féidir leo bogadh ar aghaidh agus úsáid a bhaint as seirbhísí EURES mar chéad chéim eile i dtreo a ngairmeacha beatha a bhunú.

Tá buntáistí ollmhóra ann freisin d’fhostóirí, ar féidir leo comhpháirtithe iontaofa in earnáil an ghairmoideachais agus na gairmoiliúna a aimsiú a thairgeann líon níos mó iarrthóirí féideartha chun a bhfolúntais a líonadh.

Tuairimí Dogliani: ‘In EfVET, bímid ag áitiú a thábhachtaí atá sé an comhar idir ionaid agus gnólachtaí gairmoideachais agus gairmoiliúna a neartú, ós rud é go gcreidimid gur gá ábharthacht na scileanna a foghlaimíodh a áirithiú. Tá sé sin tábhachtach le haghaidh tuilleadh deiseanna oiliúna a chruthú laistigh de chuideachtaí, agus chun deiseanna foghlama ar feadh an tsaoil a dhéanamh de ghairmeacha daoine.’

Bhí an méid seo a leanas le rá aige freisin: ‘Cuirimid chun suntais freisin a thábhachtaí atá sé ról a thabhairt d’institiúidí taighde agus don saol acadúil, ós rud é gur féidir leo tacú le hábharthacht na gcuraclam agus na bearnaí scileanna is féidir le soláthraithe gairmoideachais agus gairmoiliúna a chumhdach lena ngníomhaíochtaí oiliúna a shainaithint.’

D’oibrigh EfVET agus EURES i gcomhar le chéile ar fheachtas EURES ‘Tapaigh deiseanna gairme thar lear.’ Tá sé d’aidhm ag an bhfeachtas, thar thréimhse cúig mhí, feasacht a mhúscailt maidir leis an gcaoi ar féidir le EURES tacú le daoine óga agus iad ag bogadh ón oideachas go dtí an fhostaíocht ar fud na hEorpa. Chuir EfVET an feachtas chun cinn ar chúig chainéal, lena n‑áirítear a spás comhaltaí, a shuíomh gréasáin agus a chainéil meán sóisialta féin.

Tabhair cuairt ar an suíomh gréasáin nó déan teagmháil le EfVET ach contactefvet [dot] org (ríomhphost) le haghaidh tuilleadh eolais.