Ag dul i ngleic leis an mbac teanga agus tú ag bogadh thar lear

Dealing with the language barrier when moving abroad

Tar éis duit poist a chuardach, iarratais a dhéanamh, agus cúpla babhta strusmhar agallamh a chur díot, tá tú ag súil le do phost nua thar lear agus tú cíocrach le himeacht. Níl ann ach rud amháin a chuirfeadh isteach ar an bhfuadar ata fút, agus is é sin do thuiscint ar an teanga áitiúil. Bímis ionraic faoi: ní bhíonn spraoi ar bith ag gabháil le bheith ag iarraidh do bhealach a dhéanamh trí thimpeallacht choimhthíoch agus is ar éigean a thuigimid aon rud seachas a mhacasamhail de ‘is ea’, ‘ní hea’, agus ‘heileo’.

Ach labhraíonn gach duine Béarla sa lá atá inniu ann!

Léiríodh i suirbhé Eorabharaiméadair 2024 go labhraíonn leath de dhaonra na hEorpa an Béarla mar dhara teanga. Mar thurasóirí, tig linn Béarla a úsáid i lear mór áiteanna ar fud an domhain.

Mar sin féin, más ag bogadh go dtí tír eile go fadtéarmach atá tú, is réamhriachtanas é an teanga áitiúil a labhairt chun go mbeidh tú in ann comhshamhlú go réidh i do thimpeallacht nua. Ar an gcaoi sin, ní bhíonn an oiread struis ag baint le gnáthchúraimí amhail siopadóireacht bhia, bia beir leat a ordú, nó seirbhís a iarraidh. Anuas air sin, éiríonn sé níos fusa comhrá a dhéanamh le daoine i gcomhthéacsanna sóisialta nó ag an obair. Fiú más ag obair do chorparáid ilnáisiúnta ina bhfuil an Béarla mar theanga oibre atá tú, is cinnte gur muintir na háite a bheidh in go leor de do chomhghleacaithe. Léiríonn tuiscint ar an teanga meas ar an gcultúr áitiúil agus bíonn an saol i bhfad níos fusa ar go leor bealaí dá barr.

Mar sin, cad is féidir leat a dhéanamh chun teacht i dtír sna chéad mhíonna sin go dtí go mbeidh tú níos líofa sa teanga?

Roimh theacht duit…

Leag na bunchlocha ar dtús. Má tá go leor ama agat sula mbogann tú, lorg cúrsa eagraithe a chomhfhreagraíonn don chumas atá agat sa teanga faoi láthair. Is féidir le Comhairleoir EURES, nó leis an ambasáid nó consalacht áitiúil, cabhrú leat teacht ar chúrsa atá in oiriúint do do chuid riachtanas.
Roghnaigh cuid den iliomad acmhainní agus aipeanna teanga atá ar fáil ar líne. Níl in Italki, Duolingo agus Babbel ach cuid de na roghanna iomadúla atá ann a sholáthraíonn deiseanna foghlama duit ionas gur féidir leat gabháil ar do luas féin.

Agus do cheann scríbe bainte amach agat…

Caith cúpla uair an chloig in aghaidh na seachtaine don fhoghlaim chórasach. Gheobhaidh tú cúrsaí oiriúnacha le haghaidh do leibhéil agus do riachtanais i bhformhór na dtíortha de chuid an Aontais. Sa tSualainn, mar shampla, cuireann an scéim ‘Free Tuition for Immigrants’ cúrsaí sa tSualainnis ar fáil agus mar aon le cúrsaí speisialaithe atá curtha in oiriúint do do riachtanais oibre. Cuireann SI Studiare Italiano cúrsaí éagsúla ar fáil ar fud áiteanna éagsúla san Iodáil. Chun tuilleadh treorach a fháil, téigh i dteagmháil le Comhairleoir EURES.
Bí ag meascadh le muintir na háite. Bí páirteach i gclub, freastail ar imeachtaí sa teanga áitiúil agus tapaigh gach deis chun do scileanna labhartha a chleachtadh. Cuir tús le comhráite, cuir ceisteanna agus labhair amach. Ná bíodh imní ort faoi bhotúin a dhéanamh; beidh meas ag muintir na háite ar d’iarracht cumarsáid a dhéanamh ina dteanga féin agus is níos mó ná sásta a bheidh siad cabhrú leat.
Déan iarracht do thumadh sa chultúr áitiúil. Tabhair cuairt ar an amharclann, breathnaigh ar sheó teilifíse nó scannán sa teanga áitiúil, léigh an nuacht ar líne.
Faigh cabhair ó aip aistriúcháin gutha ar an toirt amhail Notta, iTranslate nó Microsoft Translator. Cabhróidh sé leat agus tú in abar ó thaobh na teanga de, cuir i gcás.
Ar deireadh, bí foighneach. Bíonn iarracht ag teastáil chun máistreacht a dhéanamh ar theanga nua agus is féidir leis a bheith ina fhoinse frustrachais in amanna. Lean ort, agus méadóidh do mhuinín agus do scileanna de réir a chéile.