An Rómáin chun na hOstaire: an chaoi ar aistrigh oibrí cairéil chuig tír eile chun post nua a fháil

D'aistrigh Adrian Sinescu ón Rómáin chun na hOstaire lena theaghlach ar lorg oibre. Tá cónaí orthu anois i mbardas Kindberg, áit a bhfuil siad ag socrú síos cheana féin agus ag déanamh cairdis.

Tá Adrian, 38 bliain d'aois, pósta agus tá iníon trí bliana d'aois aige. Go dtí anuraidh, bhí cónaí ar an teaghlach in Aleşd, an Rómáin, áit a raibh sé ag obair mar oibreoir cairéil ag cuideachta stroighne. Ach nuair a chaill sé a phost, bhí deacracht aige post eile a aimsiú sa Rómáin. “Agus post eile á lorg agam, chonaic mé fógra a rinne cur síos ar na gníomhaíochtaí a bhí ar bun agam sa phost a bhí agam sa Rómáin – ach amháin go raibh sé san Ostair,” a deir Adrian. “Chuala mé go raibh an Ostair ina háit mhaith shábháilte le maireachtáil inti, agus tírdhreacha áille sléibhe inti. Labhair mé le mo bhean chéile agus scríobhamar liosta buntáistí agus míbhuntáistí.”

Gníomh a dhéanamh

Ba í an chéad chéim eile ná post a fháil agus chuardaigh Adrian trí líonra EURES agus trí shuíomhanna poist ar líne freisin. Roimh i bhfad, bhí ról aimsithe aige agus thug sé cuairt ar an Ostair le haghaidh agallaimh, agus d’éirigh leis.

Chabhraigh a fhostóir nua agus a chairde áitiúla leis an teaghlach árasán a aimsiú ar chíos oiriúnach, agus bhog sé isteach ann ag deireadh mhí Feabhra 2024. Nuair a bhí troscán curtha ina mbaile nua aige, tháinig a theaghlach timpeall trí seachtaine ina dhiaidh sin. Tá an saol san Ostair, a deir Adrian, “i roinnt gnéithe níos casta agus níos costasaí ná mar atá sa Rómáin agus i ngnéithe eile i bhfad níos praiticiúla.” Fáiltíonn sé go háirithe roimh na teorainneacha luais tráchta agus na ceadúnais rothair do leanaí idir 10 mbliana agus 12 bhliain d’aois.

Tá dul chun cinn á dhéanamh ag Adrian le foghlaim na Gearmáinise le cabhair óna chomhghleacaithe agus óna chairde. “Tá sé seo ar cheann de na dúshláin is mó, ach freisin ar cheann de na fáthanna a raibh muid ag iarraidh teacht, ionas go mbeimis in ann an teanga a fhoghlaim ar bhealach níos éasca,” a deir sé. “Is maith liom teangacha a fhoghlaim agus a bheith in ann cumarsáid a dhéanamh le daoine ó thíortha éagsúla.”

An chaoi ar chabhraigh EURES

Is é George Bumbeneci, Comhairleoir EURES ag an nGníomhaireacht Náisiúnta Fostaíochta (ANOFM) i mBúcairist ó 2017 i leith, an teagmhálaí náisiúnta anois don Scéim Soghluaisteachta Spriocdhírithe (TMS) sa Rómáin, ag obair leis an tSualainn, an comhpháirtí ceannais, chun iarratais a fhormheas. Thug sé comhairle do Adrian faoi EURES agus faoin gcabhair a bhí ar fail dó trí TMS. “Nuair a chabhraíonn tú le duine le hiarratas trí agallamh, athlonnú, b’fhéidir lena dteaghlach agus trí chúrsa teanga ina dhiaidh sin, is próiseas iomlán é agus bíonn baint mhór agat leis,” a deir sé. “Cuireann tú tús le nasc a bhunú agus sa deireadh, nuair a fhaigheann tú an freagra dearfach sin ó do chomhpháirtithe a chuireann in iúl go raibh an t-iarratas ceadaithe, mothaíonn sé go maith.”

Deir Adrian go raibh sé “an-sásta” leis an gcomhairle a fuair sé ó Chomhairleoirí EURES i dtrí thír – sa Rómáin, sa Ghearmáin agus san Ostair. Trí TMS EURES, fuair sé treoir maidir leis an aistriú, tacaíocht airgeadais, agus cabhair phraiticiúil chun CV i nGearmáinis a ullmhú.

Deir sé mar fhocal scoir: “Táimid thar a bheith sásta, cé gur fhágamar go leor cairde siar sa bhaile, go bhfuil cairde nua againn anseo. Maidir leo siúd atá ag smaoineamh ar aistriú chun na hOstaire – nó chuig áit ar bith eile – is é an chomhairle a bheadh agam ná na costais a ríomh go cruinn, iad a iolrú faoi thart ar cheathair, agus dearcadh dearfach a ghlacadh chun é a dhéanamh níos éasca. Ná déan dearmad murar féidir leat cás a athrú, is féidir leat do dhearcadh ar an gcás sin a athrú agus ar an mbealach sin beidh sé níos fearr.”

Faigh tuilleadh amach faoi mhaireachtáil agus obair san Ostair agus sa Rómáin.

Naisc ghaolmhara:

Scéim Soghluaisteachta Spriocdhírithe EURES

Ag maireachtáil agus ag obair san Ostair

Ag maireachtáil agus ag obair sa Rómáin

Léigh tuilleadh:

Laethanta Fostaíochta Eorpacha

Aimsigh Comhairleoirí EURES

Dálaí maireachtála agus oibre i dtíortha EURES

Bunachar Sonraí Post EURES

Seirbhísí EURES le haghaidh fostóirí

Féilire Imeachtaí EURES

Imeachtaí ar Líne a bheidh ar siúl go luath

EURES ar Facebook

EURES ar X

EURES ar LinkedIn