Trí bhealach trína ndéanann eagraíochtaí sláinte agus sóisialta an AE baill foirne a mhealladh agus a choinneáil

Three ways EU health and social organisations attract and retain staff

Tá sláinte agus cúram sóisialta ar cheann de na hearnálacha AE ina bhfuil na ganntanais struchtúracha lucht saothair is suntasaí, rud a tugadh le fios i dtuarascáil ó Eurofound le déanaí ‘Bearta chun dul i ngleic le ganntanais lucht saothair: ceachtanna don bheartas amach anseo’. De réir na tuarascála, maidir leis na brúnna lucht saothair atá ann cheana mar thoradh ar dhaonraí atá ag dul in aois, chuaigh na brúnna sin in olcas le linn phaindéim COVID-19, agus tá brú ann anois i ndáil le pá agus dálaí oibre feabhsaithe mar thoradh orthu.

Breathnaímid ar an gcaoi a ndeachaigh eagraíochtaí cúraim sláinte i mBallstáit éagsúla an AE i ngleic le ganntanas scileanna san earnáil sin. Is san Ostair, sa Ghearmáin, san Ísiltír agus sa tSualainn atá na rátaí folúntais is airde. Sa Bhulgáir, sa Rómáin agus sa Spáinn, tá rátaí folúntais os cionn an mheáin náisiúnta do gach earnáil.

Pá a ardú

An Rómáin: arduithe pá tugtha chun cinn. In 2018, mhéadaigh rialtas na Rómáine pá na ndochtúirí agus na n-altraí go dtí an méid a rabhthas ag súil leis roimhe seo do 2022. D’fhág sé sin gur tháinig méadú 131 % ar ghlanphá na ndochtúirí agus gur tháinig méadú 65 % ar phá na n-altraí in aon bhliain amháin. Mar thoradh air sin, agus ar an méadú ar áiteanna cónaithe ospidéil, tháinig méadú ar líon na ndochtúirí a bhí ag obair in earnáil phoiblí na Rómáine agus thit cion na ndochtúirí a raibh sé beartaithe acu oibriú in áiteanna eile san Eoraip ó 69 % go 24 %. Mar sin féin, bhí an t-ualach oibre agus saincheisteanna sóisialta fós ina bhfachtóir maidir le dochtúirí a raibh sé beartaithe acu aistriú – agus maidir le pá d’altraí.
An Laitvia: íocaíochtaí chun poist réigiúnacha leighis a ghlacadh. Tairgeadh dreasachtaí aonuaire arbh fhiú tuarastal cúig mhí iad – móide íocaíochtaí breise do bhaill teaghlaigh agus, i gcásanna áirithe, tacaíocht tithíochta cathrach – do shainfhoireann a ghlac poist lasmuigh de phríomhchathair Ríge na Laitvia ar feadh cúig bliana ar a laghad. Mheall scéim na hAireachta Sláinte 1 151 liachleachtóir agus 184 ball foirne leighis éigeandála chuig róil tuaithe – an dá cheann a bhí faoi bhun na sprice. Cé gur chuidigh na dreasachtaí, d’fhág ardleibhéal maorlathais agus drochsheirbhísí réigiúnacha, lena n-áirítear an t-oideachas, nach raibh an tairiscint chomh tarraingteach céanna.

Dálaí oibre a fheabhsú

An Ghearmáin: coinníollacha agus pá treisithe. Bhí sé d’aidhm ag scéim Konzertierte Aktion Pflege (KAP – Gníomhaíocht Chomhbheartaithe maidir le Cúram) arna reáchtáil ag aireachtaí rialtais agus ag páirtithe leasmhara idir 2019 agus 2023 baill foirne cúraim a earcú agus a choinneáil trí fheabhas a chur ar phá agus ar dhálaí oibre, lena n-áirítear níos mó ball foirne a bheith i suíomhanna cúraim go comhsheasmhach agus béim a leagan ar oiliúint agus ar cháilíochtaí. Maidir le cúram geiriatrach, tháinig méadú 15 % ar an meán ar phá idir 2017 agus 2020, agus cruthaíodh na mílte post nua d’oibrithe oilte agus do chúntóirí, le tacaíocht ó mhaoiniú do chúram leanaí agus do chúram daoine scothaosta. Tugtar tacaíocht d'fhostóirí chun foireann dídeanaithe agus imirceach a earcú trí Acht Inimirce na nOibrithe Oilte. Mar sin féin, tá ganntanais fós ann, agus in 2021 thóg sé 195 lá ar an meán chun folúntas cúraim a líonadh. Measann an Aireacht Chónaidhme Saothair go mbeidh 120 000 oibrí ann chun 150 000 post a líonadh idir 2020 agus 2025.

An saothar atá ann cheana a úsáid ar bhealach níos éifeachtaí

An Spáinn: tacaíocht do dhochtúirí a bhfuil fadhbanna sláinte acu. Cuireann an clár Cúram Sláinte Comhtháite do Dhochtúirí Breoite (PAIME) tacaíocht rúnda ar fáil do dhochtúirí a bhfuil fadhbanna sláinte agus fadhbanna meabhairshláinte acu. Cuirtear seirbhísí leighis, sóisialta, dlí agus seirbhísí tacaíochta eile ar fáil don fhoireann, agus bíonn cuid acu in ann leanúint ar aghaidh ag obair i rith an ama. Tugann sonraí le fios go bhfilleann 80 % de na rannpháirtithe ar an obair ina dhiaidh sin. D’fhan níos mó ná 5 000 duine ag obair ó bunaíodh an tseirbhís – a dearadh do ghairmithe leighis, arna soláthar ag a gcomhlachais – in 1998. Tá faisnéis féinchúraim chun fadhbanna a chosc á tairiscint ó 2018 i leith.
An Ostair: athoiliúint a spreagadh i ngairmeacha ina bhfuil ganntanas oibrithe. Soláthraíonn FKS oiliúint do dhaoine dífhostaithe, do dhaoine féinfhostaithe agus d’oibrithe eile, agus tairgeann sé liúntas chun costais mhaireachtála a chlúdach le linn suas le trí bliana oiliúna.
An tSualainn: imircigh a imeascadh sa lucht saothair. Chuir scéim Mhear arna reáchtáil ag an rialtas agus ag comhpháirtithe sóisialta dlús le creidiúnú cáilíochtaí d’imircigh nua. Bhí oiliúint ar fáil sa tSualainnis, sa chóras cúraim sláinte agus chun bearnaí scileanna a líonadh.

Chun tuilleadh faisnéise a fháil, léigh an tuarascáil iomlán ‘Bearta chun dul i ngleic le ganntanas lucht saothair: ceachtanna don bheartas a bheidh ann amach anseo’.

Naisc ghaolmhara:

Bearta chun dul i ngleic le ganntanas lucht saothair: ceachtanna don bheartas a bheidh ann amach anseo

Ganntanais agus barrachais oibrithe san Eoraip

Léigh tuilleadh:

Laethanta Fostaíochta Eorpacha

Aimsigh Comhairleoirí EURES

Dálaí maireachtála agus oibre i dtíortha EURES

Bunachar Sonraí Post EURES

Seirbhísí EURES le haghaidh fostóirí

Féilire ImeachtaíEURES

Imeachtaí ar Líne a bheidh ar siúl go luath