Ir-“regoli” l-ġodda tal-intervista remota

Jekk f’dawn l-aħħar ħames snin attendejt għal intervista għal impjieg, hemm probabbiltà li attendejt għal tal-inqas intervista virtwali waħda. Il-proċess jinstema’ sempliċi u konvenjenti: bilqiegħda fil-kumdità ta’ darek, bl-ebda spiża tal-ivvjaġġar involuta, l-ebda ħin ta’ vvjaġġar li għandek tqis, u l-ebda loġistika speċjali li għandek tikkunsidra. Faċli għal kulħadd, veru?

Veru u mhux. Filwaqt li l-aspett tal-konvenjenza huwa kompletament minnu, l-interazzjonijiet virtwali għandhom l-isfidi tagħhom ukoll. Il-ħsarat tekniċi u l-ostakli għall-komunikazzjoni li joħloq skrin huma magħrufin sew; l-użu tal-IA qed jintroduċi dimensjoni oħra li għadna m’aħniex familjari magħha għalkollox.

L-IA fir-reklutaġġ remot: hija ta’ ġid jew ħsara?

L-IA tista’ tkun alleat sinifikanti għar-reklutaturi, speċjalment waqt l-istadji inizjali tal-proċess tar-reklutaġġ. L-algoritmi jiffrankaw ħafna ħin billi joħolqu għażla tal-ewwel kandidat, xi drabi minn fost mijiet ta’ applikanti. Meta tintuża waqt l-intervista, l-IA tista’ twettaq skrinjar intelliġenti billi tħares lil hinn mill-isfond u l-għarfien espert, tidentifika parametri referenzjarji mhux verbali li juru ħafna l-personalità ta’ kandidat u kif jadatta fil-kultura tal-kumpanija.

Għall-kandidati, l-għodod tal-IA jistgħu jiskedaw l-intervisti, iwieġbu mistoqsijiet dwar problemi prattiċi u jipprovdu feedback f’ħin reali, u jgħinuhom jinnavigaw l-istadju ta’ qabel l-intervista. Waqt l-intervista, l-IA tista’ tkun inqas preġudikata mill-intervistaturi umani.

Min-naħa l-oħra, l-IA – bla dubju – mhijiex “perfetta” u din tista’ tiswa għall-kumpaniji impjegati tajbin: kandidati xierqa jistgħu ma jintgħażlux minnha qabel saħansitra jaslu sal-istadju tal-interazzjoni umana, peress li ħafna interfaċċi jistgħu ma jkunux imħarrġin biex iħarsu lil hinn minn elementi speċifiċi. Pereżempju, il-mossi tal-idejn jew il-pawżi naturali fit-taħdit jistgħu jiġu miżinterpretati bħala evidenza ta’ komunikazzjoni ħażina.

Fid-dawl ta’ dawn il-parametri, kif tista’ tagħti lilek innifsek l-aħjar probabbiltà li tirnexxi fl-intervista remota tiegħek?

Qisha bħal intervista wiċċ imb wiċċ

L-akbar “sigriet” biex tirnexxi fl-intervisti remoti huwa probabbilment li ma tqishomx bħala remoti. Pereżempju, il-fatt li qed tiltaqa’ ma’ reklutatur fuq il-kamera ma jfissirx li ma tagħmilx sforz bid-dehra tiegħek, għalhekk ħu l-ħin biex tilbes bl-istess mod daqslikieku sejjer f’dak l-uffiċċju għal ġurnata xogħol.

Barra minn hekk, sir af kemm tista’ fuq il-kumpanija u l-pożizzjoni li qed tapplika għaliha u ħu l-ħin biex tipprepara t-tweġibiet tiegħek għall-mistoqsijiet standard tal-intervista. Qis ukoll lista ta’ mistoqsijiet li għandek issaqsi lir-reklutatur li se juru l-interess ġenwin tiegħek fir-rwol.

Ittestja t-teknoloġija tiegħek

Ma tistax tiġri xi ħaġa agħar milli tkun tassew ippreparat imbagħad ikollok tindirizza ħsara teknika. Biex tevita dan, iċċekkja l-veloċità u l-konnessjoni tal-internet tiegħek u kun ċert li l-kamera u l-mikrofonu jaħdmu. Hija wkoll idea tajba li tiffamiljarizza ruħek mal-pjattaforma speċifika li juża r-reklutatur. Agħmel telefonata ta’ prova ma’ xi ħabib jew membru tal-familja biex tittestja kollox.

Ipprepara għall-preżenza tal-IA

Ħafna kumpaniji jagħżlu li jużaw l-IA għall-ewwel ċiklu ta’ invervisti tagħhom. Jekk l-ewwel kuntatt tiegħek mar-reklutatur huwa permezz ta’ pjattaforma tal-IA, oqgħod attent b’mod speċjali għal komunikazzjoni ċara u konċiża. Ipprattika minn qabel biex tevita pawżi skomdi fit-taħdit tiegħek u l-użu eċċessiv ta’ frażijiet biex timla jew li tispiċċa titħawwad fid-diskors tiegħek. It-ton, il-pass u l-kunfidenza tiegħek huma l-aktar importanti f’dawn l-interazzjonijiet. Jekk tippretendi li hemm reklutatur uman quddiemek, se timmassimizza l-probabbiltà tiegħek li tgħaddi mill-gwardjan tal-IA u tkompli bil-bqija tal-proċess tar-reklutaġġ.

Jinteressak issir taf kif ir-reklutaturi attwalment jużaw l-IA għall-vantaġġ tagħhom? Aqra l-artiklu tagħna dwar Kif l-IA tista’ ttejjeb il-proċess ta’ akkwist tat-talenti.

Links relatati:

5 tips for acing your interview (5 għajnuniet biex tmur tajjeb fl-intervista tiegħek)

Ħames modi kif l-IA tista’ tgħin fit-tiftix tiegħek għal impjieg

Aqra aktar:

Il-Jiem Ewropej tal-Impjiegi

Sib Konsulenti tal-EURES

Kundizzjonijiet tal-ħajja u x-xogħol fil-pajjiżi tal-EURES

Il-Bażi tad-Data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Online li ġejjin

Il-EURES fuq Facebook