Tá athrú ag teacht ar mhargadh fostaíochta na hEorpa, agus tá EURES réidh le dul ar thús cadhnaíochta in 2030

Tá an Eoraip ag athrú – agus tá EURES ag athrú freisin. Tá margadh saothair na hEorpa ina hiomláine á n‑athmhúnlú a bhuí le dul chun cinn digiteach, an aistriú glas agus daonra atá ag dul in aois. Mar fhreagairt air sin, d’fhorbair EURES a Straitéis 2030 chun leanúint de sheirbhísí fiúntacha a sholáthar d’oibrithe agus d’fhostóirí agus, ag an am céanna, a ról mar phríomhlíonra a thacaíonn le soghluaisteacht chothrom an lucht saothair a threisiú.

Dírítear sa straitéis ar roinnt príomhchuspóirí a rachaidh chun tairbhe d’oibrithe agus d’fhostóirí araon.

1. Oibrithe a chumhachtú. Tá sé d’aidhm ag EURES a bheith ina chomhpháirtí iontaofa do chuardaitheoirí poist gan beann ar a gcúlra. Trí mheaitseáil fheabhsaithe atá bunaithe ar shonraí, agus trí fhaisnéis shoiléir ilteangach a chur ar fáil, cabhróidh EURES le daoine atá ar thóir poist deiseanna a aimsiú a thagann lena scileanna agus lena mianta. Ag an am céanna, cuireann an líonra dálaí córa oibre chun cinn, agus feabhsaíonn sé a chuid seirbhísí go leanúnach bunaithe ar aiseolas ó úsáideoirí.
2. Tacú le fostóirí. Agus aitheantas á thabhairt d’fhostóirí mar phríomhfhoinse deiseanna fostaíochta, tá sé mar aidhm ag EURES a ról mar chomhpháirtí iontaofa le haghaidh earcaíocht chothrom a neartú. Trí dhul i dteagmháil le fostóirí agus trína gcuid riachtanas a chur san áireamh, féachann EURES lena chinntiú go mbíonn a chuid seirbhísí ábhartha agus praiticiúil i gcónaí. Táthar ag súil go dtacóidh meaitseáil scileanna níos fearr le próisis earcaíochta níos éifeachtúla, agus ba cheart go gcuirfeadh treoir maidir le cleachtais earcaíochta dhlíthiúla agus chothroma le trédhearcacht agus muinín mhéadaithe. Tá sé i gceist leis an gcomhar le heagraíochtaí earnála agus comhlachais breis feabhais a chur ar thacaíocht spriocdhírithe d’fhostóirí.
3. Margadh saothair níos nasctha agus níos cothroime a thógáil do gach duine. Tá sé mar aidhm ag EURES oibriú i ndlúthchomhar le Seirbhísí Poiblí Fostaíochta agus le páirtithe leasmhara náisiúnta chun tacú le feidhmiú na margaí saothair ar fud na hEorpa. Trí aghaidh a thabhairt ar mhíchothromaíochtaí réigiúnacha i dtaca le soláthar agus éileamh an tsaothair, féachann an líonra le cur le soghluaisteacht níos éifeachtúla agus níos comhordaithe. Táthar ag súil go gcuideoidh rochtain ar fhaisnéis atá cothrom le dáta faoin margadh saothair le hoibrithe a threorú i dtreo réimsí ina bhfuil gá lena gcuid scileanna, agus córais náisiúnta agus dálaí áitiúla á n‑urramú ag an am céanna.

An scéala is déanaí

Nascann EURES daoine, poist agus margaí saothair le chéile cheana féin, ag tacú le hearcaíocht chothrom agus le soghluaisteacht oibrithe ar fud na hEorpa. Soláthraítear a sheirbhísí trí líonra fairsing Comhaltaí agus Comhpháirtithe i 31 tír, lena n‑áirítear tairseach EURES a sholáthraíonn rochtain ar dheiseanna fostaíochta, próifílí iarrthóirí agus faisnéis phraiticiúil, agus an t‑ardán Laethanta Fostaíochta Eorpacha. Tá EURES mar phríomhghníomhaí chun tacú le soghluaisteacht an lucht saothair i dtaobh na ngnéithe sin cheana féin.

Le Straitéis 2030 tógtar ar na bunsraitheanna sin, agus tugtar isteach mar chuid di na príomhfhorbairtí seo a leanas:

• béim níos láidre ar sheirbhísí atá dírithe ar an úsáideoir agus ar sheirbhísí níos saincheaptha d’oibrithe agus d’fhostóirí araon.
• éiceachóras digiteach níos forbartha a fhorbairt a thuilleadh chun tacú le meaitseáil scileanna.
• béim níos mó ar sholáthar seirbhísí comhsheasmhacha ardcháilíochta ar fud na dtíortha.
• for-rochtain mhéadaithe ar ghrúpaí leochaileacha, agus é mar aidhm leis sin tuilleadh feabhais a chur ar a rochtain ar sheirbhísí agus ar dheiseanna EURES.
• comhar treisithe idir an leibhéal Eorpach agus an leibhéal náisiúnta.

Trí na forbairtí sin a shaothrú, tá sé d’aidhm ag EURES cur le margadh saothair Eorpach atá níos cuimsithí agus níos athléimní a neartú tuilleadh.

Más mian leat féachaint ar threochtaí sa mhargadh saothair amach anseo, léigh an t‑alt ‘An bóthar go dtí 2030: cad atá i ndán don saol oibre?’. Is féidir leat tuilleadh a fhoghlaim freisin ar faoin gcaoi a dtugann EURES tacaíocht do dhaoine atá ag cuardach poist agus atá faoi mhíchumas.

Naisc ghaolmhara:

Tairseach EURES

Laethanta Fostaíochta Eorpacha

‘An bóthar go dtí 2030: cad atá i ndán don saol oibre?’

‘An chaoi a dtacaíonn EURES le cuardaitheoirí poist faoi mhíchumas’

Léigh tuilleadh:

Laethanta Fostaíochta Eorpacha

Cuardaigh Comhairleoirí EURES

Ag maireachtáil agus ag obair i dtíortha EURES

Bunachar sonraí poist EURES

Seirbhísí EURES le haghaidh fostóirí

Féilire Imeachtaí EURES

Imeachtaí ar líne a bheidh ar siúl go luath

EURES ar Facebook

EURES ar X

EURES ar LinkedIn