An chaoi a dtacaíonn EURES le cuardaitheoirí poist faoi mhíchumas

Má tá tú ag maireachtáil faoi mhíchumas, níl tú i d’aonar. Tá míchumas de chineál éigin ar dhuine amháin as gach ceathrar daoine fásta san Aontas. D’fhéadfadh bacainní a bheith ort sa saol laethúil, cuir i gcás i dtaobh seirbhísí, táirgí nó timpeallachtaí nach féidir leat a rochtain. Léirítear na dúshláin sin sna staitisticí: Measann duine amháin as gach beirt atá faoi mhíchumas go gcaitear go míchothrom leo, is mó an seans go bhfágfaidh duine amháin as gach cúigear an t‑oideachas go luath, agus tá duine amháin as gach cúigear fós dífhostaithe, rud a fhágann go bhfuil baol níos airde bochtaineachta agus eisiaimh shóisialta i ndán dóibh. Leagtar béim sna figiúirí sin ar an tábhacht a bhaineann le tionscnaimh lena gcuirtear comhdheiseanna agus tacaíocht chun cinn.

Measann an tAontas gur ardtosaíochtaí iad an comhionannas, an éagsúlacht agus an cuimsiú, agus is é sin an fáth a bhfuil sé tiomanta a áirithiú go mbeidh gach duine rannpháirteach sa tsochaí ar théarmaí comhionanna, lena n‑áirítear san ionad oibre. Maidir le do ghairmréim, is é EURES an spriocfhoinse maidir le hobair shásúil a aimsiú atá oiriúnach do do chuid riachtanas.

Ar thairseach EURES, is féidir leat:

• na milliúin deiseanna fostaíochta ar fud an Aontais a bhrabhsáil;
• rochtain a fháil ar líonra de bhreis agus 1 000 Comhairleoir EURES in 31 tír atá ullamh chun tacaíocht agus treoir shaincheaptha a chur ar fáil;
• faisnéis a fháil faoi dhálaí maireachtála agus oibre a bhaineann go sonrach le daoine faoi mhíchumas sa tír bhfuil spéis agat inti;
• an nuacht is déanaí a fháil maidir le himeachtaí ar féidir leo tacú le d’aistear chun na fostaíochta.

Misean: cuimsiú

De réir phrionsabal 17 de Cholún Eorpach na gCeart Sóisialta, tá an ceart ag daoine faoi mhíchumas tacaíocht ioncaim a fháil lena gcinntítear gur féidir leo maireachtáil faoi dhínit, seirbhísí a fháil lena gcuirtear ar a gcumas dóibh a bheith rannpháirteach i margadh an tsaothair agus sa tsochaí, agus timpeallacht oibre a bheith acu atá curtha in oiriúint dá gcuid riachtanas.

Chun tacú leis an misean sin, tá roinnt gníomhaíochtaí á gcur chun feidhme chun cabhrú le daoine faoi mhíchumas san ionad oibre, mar shampla:

• breisoideachas agus oiliúint a spreagadh chun infhostaitheacht a fheabhsú;
• timpeallachtaí oibre a bheith ann atá cóirithe go cuí a áirithiú, lena n‑áirítear teicneolaíocht inrochtana;
• próisis chuimsitheacha earcaíochta a choinneáil ar bun;
• comhairleoireacht speisialaithe ghairme a chur ar fáil; agus
• an doras a oscailt do níos mó deiseanna oibre éagsúla.

Gairmréimeanna AE do chách

An bhfuil spéis agat i ngairmréim in institiúid de chuid an Aontais? Le roinnt tionscnamh a reáchtáiltear ar fud na hEorpa réitítear an bealach do náisiúnaigh de chuid an Aontais atá faoi mhíchumas aitheanta dul isteach in institiúidí agus i gcomhlachtaí an Aontais mar bhaill foirne nó mar oiliúnaithe. Féach ar roinnt deiseanna thíos.

Gach bliain, cuireann Parlaimint na hEorpa fáilte roimh sheisear chun bheith rannpháirteach mar ghníomhairí ar conradh. Má roghnaítear thú, gheobhaidh tú conradh bliana ar féidir é a athnuachan. Chun d’incháilitheacht a sheiceáil, tabhair cuairt ar an leathanach Clár Gníomhaíochta Dearfaí 2025. A luaithe a bheidh iarratais le haghaidh 2026 oscailte, is féidir leat iarratas a dhéanamh tríd an ardán Apply4EP.

Ina theannta sin, má tá céim bainte amach agat nó má tá tú sa tríú, sa cheathrú nó sa chúigiú bliain de chéim ollscoil, is féidir leat iarratas a dhéanamh ar cheann de na tréimhsí oiliúna ar íocaíocht 5 mhí a bhíonn á dtairgeadh ag Comhairle an Aontais Eorpaigh dhá uair sa bhliain. Chun tuilleadh eolais a fháil agus iarratas a dhéanamh, tabhair cuairt ar an leathanach gréasáin tiomnaithe de chuid na Comhairle. Is ann do dheiseanna den chineál céanna le hinstitiúidí eile de chuid an Aontais fosta.

Téann tionscnaimh cosúil leo siúd a luaitear thuas, mar aon le hiarrachtaí EURES chun deireadh a chur le bacainní ar fhostaíocht, chun tairbhe do chách. Ach fáilte a chur roimh bhuanna agus scileanna éagsúla, bíonn ionaid oibre níos oscailte, níos cuimsithí, agus lán de dheiseanna do dhaoine a bheith ag foghlaim agus ag fás le chéile.

Ar mhaith leat tuilleadh eolais a fháil faoin tacaíocht ghairme atá ar fáil do dhaoine faoi mhíchumas ar fud na hEorpa? Glac páirt sa seimineár gréasáin ar líne Working Without Barriers – Mobility & Inclusion [Obair a dhéanamh gan bhacainní – soghluaisteacht agus cuimsiú] an 18 Samhain agus faigh amach faoi na hacmhainní a ceapadh go sonrach chun cabhrú leat agus tú ar d’aistear fostaíochta.

Naisc ghaolmhara:

An Coimisiún Eorpach – Ionstraim Eorpach inrochtaineachta

Léigh tuilleadh:

Laethanta Fostaíochta Eorpacha

Aimsigh Comhairleoirí EURES

Dálaí maireachtáil agus oibre i dtíortha EURES

Bunachar Sonraí Post EURES

Seirbhísí EURES le haghaidh fostóirí

Féilire Imeachtaí EURES

Imeachtaí ar líne a bheidh ar siúl go luath

EURES ar Facebook

EURES ar X

EURES ar LinkedIn

EURES ar Instagram