Faigh amach faoi dheiseanna nua a bhfuil do chuid scileanna ag teastáil lena n-aghaidh

Is cuma más gníomhaire eastáit réadaigh thú atá i do chónaí sa Fhrainc nó poitigéir sa tSlóivéin, is dócha go mbeidh ort déileáil leis an bhfadhb chéanna: tá an iomarca daoine i do ghairmeacha faoi seach atá in iomaíocht lena chéile do líon teoranta post.

Tá méadú ag teacht ar éagothroime saothair san Eoraip, pointe a dtarraingítear aird air sa tuarascáil is déanaí ón Údarás Eorpach Saothair. Faoi láthair, ní mór do 24 tír dul i ngleic le barrachais agus ní mór do 29 tír dul i ngleic le ganntanais. Ciallaíonn sé sin go bhféadfadh roinnt gairmeacha a bheith ‘plódaithe’ i dtír ar leith, rud a chiallaíonn go mbíonn sé deacair do chuardaitheoirí poist post a fháil mar thoradh ar phróiseas iomaíoch. Nó b’fhéidir go gciallódh sé nach bhfuil dóthain daoine ar fáil i réimse ar leith, rud a chiallaíonn go mbíonn go leor post folamh agus go mbíonn go leor earnálacha ag déileáil le heaspa foirne.

Leas a bhaint as acmhainneacht mheaitseála thrasnáisiúnta san Eoraip

Ní hamháin go mbíonn tionchar suntasach ag na cásanna thuas ar an ngeilleagar, bíonn tionchar acu ar shaol daoine aonair freisin. Bíonn tionchar ag éagothroime sa mhargadh saothair ar gach duine, ach bíonn tionchar níos measa aige ar ghrúpaí áirithe. Tá formhór na n-oibrithe ban, mar shampla, mar aon le daoine óga, i mbun gairmeacha barrachais. Ní hamháin gur cúis lagmhisnigh é sin, cuireann sé bac freisin ar a n-ionchais ghairme fhadtéarmacha.

Chun cur i gcoinne an méid sin, tá tús áite á thabhairt ag EURES do thacú le soghluaisteacht thar theorainneacha. Cad a chiallaíonn sé sin, go praiticiúil? Le cabhair ó EURES, bíonn an deis ag cuardaitheoirí poist i dtír ina dtuairiscítear gur ghairm bharrachais í gairm ar leith, teagmháil a dhéanamh le fostóirí i dtír eile ina dtuairiscítear gur ghairm ghanntanais í an ghairm chéanna.

Mar shampla, sainaithníodh sa tuarascáil ganntanas pluiméirí in Éirinn, agus is gairm bharrachais í an ghairm sin sa Spáinn; is féidir le pluiméirí ón Spáinn, ansin, deiseanna fostaíochta in Éirinn a fhiosrú, áit ar féidir leo a gcuid scileanna a úsáid ar bhealach níos éasca.

Trí shoghluaisteacht a spreagadh ó réigiúin ina bhfuil barrachas chuig réigiúin ina bhfuil ganntanas, laghdaítear an brú ó mhargaí saothair áitiúla agus bíonn níos mó deiseanna ag daoine aonair chun obair fhiúntach a aimsiú san earnáil ina bhfuil siad oilte.

Deiseanna soghluaisteachta trasteorann á gcur ar fáil ag uirlis dhigiteach

Cuireann deais ganntanas agus barrachas EURES ar do chumas sonraí maidir le ganntanais agus barrachais a sheiceáil bunaithe ar thír, ar ghairm agus ar bhliain. Is féidir le daoine aonair scrúdú a dhéanamh ar na sonraí agus, tar éis dóibh an tír nó na tíortha ina bhfuil géarghá lena gcuid seirbhísí a shainaithint, is féidir leo a gcuardach poist a scagadh dá réir sin nó teagmháil a dhéanamh le Comhairleoir EURES chun tuilleadh faisnéise agus cúnaimh a fháil.

Ar an iomlán, tá pribhléid iontach á tairiscint ag an Aontas dá shaoránaigh: saorghluaiseacht daoine agus scileanna idir na 27 Ballstát. Trí chabhair a fháil ó theicneolaíocht sonraíbhunaithe chun tallann a threorú chuig an áit a bhfuil géarghá léi, cabhraíonn EURES le deiseanna iontacha a chur ar fáil a d’fhéadfadh saol daoine a athrú ó bhonn.

Is féidir tuilleadh a léamh faoi stádas reatha éagothroime an mhargaidh saothair san Eoraip inár n-alt dar teideal Cad é an scéala is déanaí maidir le ganntanais agus barrachais saothair san Eoraip?

Naisc ghaolmhara:

Tuarascáil an Údaráis Eorpaigh Saothair - Ganntanais agus barrachais lucht saothair san Eoraip 2024

Deais EURES - Ganntanais agus barrachais oibrithe san Eoraip

Léigh tuilleadh:

Laethanta Fostaíochta Eorpacha

Aimsigh Comhairleoirí EURES

Ag maireachtáil agus ag obair i dtíortha EURES

Bunachar Sonraí Post EURES

Seirbhísí EURES le haghaidh fostóirí

Féilire Imeachtaí EURES

Imeachtaí Ar Líne a bheidh ar siúl go luath

EURES ar Facebook

EURES ar X

EURES ar LinkedIn

EURES ar Instagram