Tinsab fix-xifer li jaqbdek eżawriment professjonali? Ħu azzjoni qabel ikun tard wisq

Are you on the brink of burnout? Take action before it takes over

L-ewwel nett, x’inhu eżawriment professjonali? L-Organizzazzjoni Dinjija tas-Saħħa tiddefinixxi l-eżawriment professjonali bħala sindromu li jirriżulta minn stress kroniku fuq il-post tax-xogħol li ma jkunx ġie ġestit b’suċċess. Filwaqt li mhuwiex ikklassifikat bħala kundizzjoni medika, huwa kkaratterizzat minn tliet dimensjonijiet:

għeja estrema li ma tmurx ’il bogħod bil-mistrieħ;
nuqqas ta’ motivazzjoni; sentimenti ta’ ċiniżmu madwar l-impjieg ta’ persuna;
tnaqqis fl-effikaċja professjonali.

Fi stħarriġ dwar l-eżawriment professjonali fuq il-post tax-xogħol imwettaq minn Deloitte, 77 % tar-rispondenti qalu li huma kienu esperjenzaw eżawriment professjonali fl-impjieg attwali tagħhom. Meta ma jkunx indirizzat, l-eżawriment professjonali jista’ jkollu konsegwenzi serji, mhux biss fuq il-karriera tiegħek, iżda fuq il-kwalità tal-ħajja ġenerali tiegħek.

X’jikkawża l-eżawriment professjonali?

Il-kundizzjoni hija maħsuba li hija riżultat ta’ pressjoni mentali u fiżika akkumulata li tiġi kkawżata minn wisq eżiġenzi f’termini ta’ ħin u enerġija fuq il-persuna. Ma hemm l-ebda livell limitu komuni li fih kull persuna tiġi eżawrita; hija kwistjoni pjuttost individwali, peress li kulħadd jipperċepixxi u jirreaġixxi għall-avvenimenti tal-ħajja b’mod differenti.

Dawn li ġejjin ġew identifikati bħala prekursuri għall-eżawriment professjonali:

Nuqqas ta’ kontroll fuq l-ammont ta’ xogħol tal-persuna. L-ammont kbir tax-xogħol huwa kundizzjoni ovvja li tikkawża eżawriment professjonali. Madankollu, mhuwiex sempliċiment “wisq xogħol” li jwassalna għal punt fejn il-persuna ma tkunx tiflaħ iktar; huwa s-sentiment ta’ telf totali ta’ kontroll flimkien mal-fatt li l-persuna tħossha li mhijiex f’pożizzjoni li tiffaċċja l-piżijiet, għal raġunijiet li mhumiex fil-kontroll tagħha. Dan huwa l-każ meta organizzazzjonijiet jipperpetwaw mentalità ta’ sitwazzjoni “dejjem fi kriżi”, jew dawk li konxjament naqqsu l-persunal u jistennew li l-ħaddiema jwettqu aktar u aktar kompiti.

Ebda sens ta’ apprezzament. Is-sentiment “agħmel dak li tħobb, u ma tħossokx li qed taħdem” huwa veru. Aħna naħdmu għal ħafna raġunijiet, lil hinn mill-paga ta’ kull xahar, iżda wisq xogħol u paga baxxa hija riċetta garantita li twassal għal eżawriment professjonali. L-istess jgħodd għan-nuqqas ta’ kwalunkwe rikonoxximent jew apprezzament ieħor tal-kontribut ta’ persuna lil organizzazzjoni, li jwassal għal sentimenti ta’ stmerrija.

Ambjent tax-xogħol tossiku. It-tossiċità hija terminu wiesa’, iżda hija assoċjata l-aktar ta’ spiss mar-relazzjonijiet interpersonali. Ix-xogħol jieħu parti sinifikanti mill-ħin tagħna u huwa marbut mill-qrib mas-sens ta’ identità personali tagħna. Għalhekk, il-fatt li nqattgħu terz tal-ġurnata ma’ persuni u sitwazzjonijiet li joħolqu emozzjonijiet negattivi se jkollu impatt fuq is-saħħa mentali tagħna, u dan jaffettwa wkoll il-kapaċità tagħna li nindirizzaw id-diffikultajiet ta’ kuljum tal-impjieg.

Mhux il-mument li wieħed jikkrolla

Allura, kif tevita li tasal fil-punt fejn ma tkunx tista’ tkompli?

L-ewwel pass huwa li tagħraf is-sintomi. Ladarba tkun għamilt dan, segwi din il-lista ta’ punti ta’ azzjoni:

Kun deċiżiv fil-ġestjoni tal-ammont ta’ xogħol tiegħek. Għaraf u aħdem fuq in-nuqqasijiet tiegħek stess (prokrastinazzjoni? nuqqas ta’ ppjanar?), u għid le meta għandek bżonn.
Ħu pawżi regolari: dawk qosra matul il-jum tax-xogħol, u oħrajn itwal fil-forma ta’ btala fejn tiskonnettja kompletament mix-xogħol.
Għandek ħajja barra mill-uffiċċju: żomm dak il-passatemp, agħmel dak l-isport, gawdi sempliċiment “li tkun miegħek innifsek” minflok dejjem “ikollok x’tagħmel”.
Fl-aħħar nett, kun af li dan mhuwiex falliment personali, jekk issib lilek innifsek li m’intix tħossok tajjeb f’sitwazzjoni ta’ xogħol partikolari. Tejjeb il-ħiliet tiegħek jekk ikollok bżonn u aħtaf dik l-opportunità li taħseb li tkun tajba għalik, kemm professjonalment kif ukoll personalment.

Tħossok tant mgħobbi(ja) li ma tistax tissepara l-ħajja personali u professjonali tiegħek? Aqra s-suġġerimenti tagħna fl-artiklu Kif insibu il-bilanċ it-tajjeb bejn ix-xogħol u l-ħin personali.

Links relatati:

EURES: X’għandek tagħmel meta tħossok mgħobbi(ja) żżejjed fuq il-post tax-xogħol

EU-OSHA: Gwida elettronika għall-immaniġġjar tal-istress u r-riskji psikosoċjali

EU-OSHA: Il-fehim u l-prevenzjoni tal-eżawriment professjonali tal-ħaddiema

Aqra aktar:

Il-Jiem Ewropej għall-Impjiegi

Sib Konsulenti tal-EURES

Kundizzjonijiet tal-ħajja u x-xogħol fil-pajjiżi tal-EURES

Il-Bażi tad-Data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Online li ġejjin