Vinnur þú í gegnum app eða vefsíðu? Kynntu þér hvaða breytingar eru í vændum á réttindum þínum

Ef þú vinnur í gegnum app hefur þér líklega verið sagt að þú sért „sjálfstætt starfandi samstarfsaðili“ eða „verktaki“. En í desember 2026 gæti þessi skilgreining breyst með tilkomu nýrra reglna ESB um vinnu í gegnum stafræna vinnumiðla. Meginbreytingin felst í því að gert er ráð fyrir að þú sért launþegi samkvæmt lögum. Svona geturðu séð hvort þetta eigi við um þig.

Frá „samstarfsaðila“ til launþega?

Skoðaðu eftirfarandi spurningar:

Ákveður appið launataxta þína?
Setur það sérstakar reglur um útlit þitt eða hegðun?
Fylgist það með frammistöðu þinni?
Takmarkar það frelsi þitt til að ákveða vinnutímann eða hvaða verkefni þú tekur að þér?
Kemur það í veg fyrir að þú byggir upp eigin viðskiptavinahóp eða vinnir fyrir aðra?

Ef þú svaraðir „já“ við einhverri þessara spurninga er líklegt að yfirvöld í þínu landi geri ráð fyrir að þú sért launþegi. Þú þarft ekki að gera neitt til að sanna það – það er á ábyrgð vettvangsins að sýna fram á fyrir dómstólum að þú sért ekki launþegi.

Þetta er ekki bara breyting á orðalagi, heldur getur hún skipt sköpum fyrir fjárhag þinn og öryggi. Ef þú færð stöðu launþega öðlast þú rétt til lágmarkslauna, launaðs orlofs, veikindaleyfis og atvinnuleysisbóta sem þér stóðu áður ekki til boða. Fyrir milljónir þeirra sem vinna í gegnum stafræna vinnumiðla í Evrópu breytir þessi tilskipun ótryggum störfum í almenn störf með félagslegu öryggi.

Engar fleiri „ógegnsæjar ákvarðanir

Nýju reglurnar snúast ekki aðeins um laun og stöðu, heldur taka þær einnig á því hversu erfitt það getur verið að lúta stjórn leynilegra reiknirita. Hefurðu einhvern tíma upplifað að einkunn þín í appi lækki án þess að fá skýringar á því hvers vegna? Þessu tímabili er að ljúka. Stafrænir vinnumiðlar verða nú að vera gagnsæir um hvernig sjálfvirk kerfi þeirra úthluta verkefnum, meta frammistöðu og svo framvegis. Þú átt rétt á að vita nákvæmlega hvers vegna þér var boðið tiltekið verkefni eða þú fékkst refsingu. Ef reiknirit tekur mikilvæga ákvörðun sem hefur áhrif á vinnu þína, svo sem að neita þér um greiðslu eða loka reikningnum þínum, átt þú rétt á að óska eftir því að starfsmaður endurskoði ákvörðunina. Þannig er tryggt að raunverulegur einstaklingur, en ekki bara tölvukóði, meti aðstæður þínar.

Hvað þetta þýðir fyrir framtíð þína á vinnumarkaði

Þessar breytingar auka stöðugleika í hagkerfi stafrænnar vinnumiðlunar, en hvað ef þú vilt kanna tækifæri utan þess? Hvort sem þú færð stöðu launþega eða heldur áfram að starfa sjálfstætt er skilningur á réttindum þínum fyrsta skrefið í átt að sjálfbærum starfsferli.

Ef þú ákveður að nýta færni þína í hefðbundnu starfi eða leita tækifæra í öðrum löndum getur EURES-netið aðstoðað þig. EURES ráðgjafar geta leiðbeint þér um hvernig breytt staða þín hefur áhrif á almannatryggingar og réttindi á vinnumarkaði þegar þú flytur milli ESB-landa. Þeir geta einnig hjálpað þér að finna störf hjá vinnuveitendum sem meta sveigjanleikann og færnina sem þú hefur öðlast með því að vinna í gegnum stafræna vinnumiðla. Vinnumarkaðurinn er að breytast og með þessari nýju vernd hefurðu meira svigrúm til að velja þá leið sem hentar þér.

Fylgstu með, þekktu réttindi þín og leitaðu til EURES þegar þú tekur næsta skref á starfsferlinum. Lestu um nýja stefnu þess til að auðvelda fólki að finna vinnu á síbreytilegum vinnumarkaði.

Tengdir hlekkir:

Tilskipun ESB um vinnu í gegnum stafræna vinnumiðla

Vinnumarkaður Evrópu er að breytast og EURES er tilbúið að leiða veginn inn í árið 2030

Nánari upplýsingar:

Evrópskir atvinnudagar

Finna Eures-ráðgjafa

Atvinnu- og búsetuskilyrði í Eures-löndum

Atvinnugagnagrunnur EURES

Þjónusta EURES fyrir vinnuveitendur

Viðburðadagatal EURES

Næstu viðburðir á netinu

EURES á Facebook