Ħu pass: gwida għall-internships u t-traineeships fl-Ewropa

Immaġinak tibdel il-kurżità tiegħek f’kompetenza, il-lawrja tiegħek f’karriera u l-ewwel esperjenza tiegħek fix-xogħol tal-ħolm tiegħek. Din hija s-setgħa li tagħżel il-pass it-tajjeb li jmiss – internship, traineeship jew l-ewwel impjieg. Dawn mhumiex biss titli tal-impjieg impressjonanti, iżda pass intermedjarju ’l quddiem, u kull wieħed minnhom jikkontribwixxi kompetenza ewlenija għall-vjaġġ tal-karriera tiegħek. L-internships iħalluk tesplora. It-traineeships jgħinuk tikber. L-ewwel impjiegi jħalluk tispikka. Irrispettivament minn fejn tinsab fil-vjaġġ tiegħek, hemm perkors lest għalik fl-UE – u l-ewwel pass hu li tkun taf id-differenza.

Allura, x’inhi d-differenza?

Jekk għadek qed tistudja jew għadek kif iggradwajt, l-internships huma maħsubin għalik. Tipikament dawn idumu biss ftit ġimgħat jew xhur u huma mod tajjeb ħafna biex tikseb esperjenza prattika relatata mal-istudji tiegħek. Filwaqt li l-benefiċċji finanzjarji jistgħu jkunu limitati, xorta waħda hija opportunità siewja biex tara jekk rwol jew industrija speċifika tallinjax tassew mal-interessi u mal-ħiliet tiegħek.

It-traineeships, min-naħa l-oħra, huma programmi ta’ taħriġ strutturati għall-gradwati jew persuni li m’għandhomx ħafna esperjenza tax-xogħol. Jekk tista’ tidentifika ma’ dawn, traineeship tgħinek tiżviluppa l-ħiliet meħtieġa għal rwol jew perkors tal-karriera speċifiku. Normalment iddum aktar minn internship – u iva, bil-ħlas. Ikkunsidrah bħala pont bejn id-dinja akkademika u dik professjonali, b’mentoraġġ, għanijiet ċari u responsabbiltà ta’ veru.

Imbagħad jiġi l-ewwel impjieg normali tiegħek, fejn ikollok kompiti u responsabbiltajiet speċifiċi, u titħallas salarju sħiħ u jkollok il-benefiċċji. L-internships u t-traineeships jistgħu jkunu punt tat-tluq siewi għal pożizzjoni full-time – iżda biss jekk tagħmilhom jgħoddu.

Agħmel l-aħjar użu minnhom

Biex timmassimizza l-esperjenza tiegħek bħala intern jew trainee, ftakar dan li ġej:

Kun proattiv(a). Toqgħodx b’idejk fuq żaqqek waqt li tkun qed tistenna li titqabbad tagħmel xi ħaġa. Staqsi mistoqsijiet. Offri lilek innifsek għall-proġetti. Jekk tispiċċa xogħlok kmieni, għid: “X’nista’ nagħmel aktar biex ngħin?” Min iħaddmek jinnota l-inizjattiva – u dan huwa l-mod kif tispikka.
Qis in-networking daqslikieku kien xogħlok (għax fil-fatt hekk hu). Il-kollegi tiegħek mhumiex biss nies li taħdem magħhom; huma l-mentors u l-konnessjonijiet futuri tiegħek. Ir-relazzjonijiet li tibni magħhom jistgħu jiftħu bibien li lanqas biss kont taf li jeżistu.
Itlob feedback. Il-feedback mhuwiex kritika, huwa għodda li se tgħinek titjieb. Is-superviżuri jħobbu lill-interns li jixtiequ jikbru.
Żomm djarju sempliċi. Ikteb x’kompiti lestejt, x’tgħallimt, dak li int kburi(ja) bih. Dawn huma l-istejjer li se tirrakkonta f’intervisti futuri.

Fejn għandek tfittex

L-UE mimlija opportunitajiet. Oħroġ hemm barra u aħtafhom. Il-EURES huwa punt tat-tluq tajjeb ħafna, u joffri eluf ta’ postijiet vakanti madwar l-Ewropa, inkluża taqsima ddedikata għat-“Traineeships” għal 30 pajjiż Ewropew fil-paġna “Kundizzjonijiet tal-ħajja u tax-xogħol fl-Ewropa”.

Tista’ żżur ukoll siti web u pjattaformi bħall-Jiem Ewropej tal-Impjiegi, l-Uffiċċju Ewropew għas-Selezzjoni tal-Persunal, impjiegi u traineeships fl-istituzzjonijiet u fl-aġenziji tal-UE, Europass, EuroBrussels, Euractiv u EU Training. Ħafna istituzzjonijiet tal-UE joffru internships u traineeships strutturati. Esplora l-għażliet tiegħek fuq siti bħal Youth4Europe.