Jista’ r-reklutaġġ ibbażat fuq il-ħiliet jgħin biex jiġu solvuti n-nuqqasijiet ta’ ħaddiema?

Jista’ jagħti l-każ li l-impjegaturi qegħdin jinjoraw ħiliet siewja billi jiffokaw primarjament fuq il-kwalifiki formali? Ir-reklutaġġ ibbażat fuq il-ħiliet, li jagħti aktar importanza lill-kapaċitajiet u l-kompetenzi tal-kandidati, huwa għodda siewja li l-impjegaturi jistgħu jużaw sabiex isibu l-ħaddiema li jeħtieġu – u l-PES tal-Ewropa jistgħu jgħinu lin-negozji jagħmlu l-aħjar użu minnu. Il-PES huma l-awtoritajiet li jikkollegaw lill-impjegaturi mal-persuni li qed ifittxu impjieg fis-27 Stat Membru tal-UE, fin-Norveġja, fl-Iżlanda u fil-Liechtenstein.

Ostakli li jridu jingħelbu

Is-sensibilizzazzjoni dwar in-nuqqasijiet ta’ ħiliet kibret. Allura għaliex m’hemmx aktar impjegaturi li jiffokaw fuq il-ħiliet tal-kandidati meta jirreklutaw? Hemm xi ftit ostakli fil-proċess, skont dokument tan-network Ewropew tal-PES reċenti:

Ħafna impjegaturi – speċjalment l-SMEs – għadhom mhux familjari mal-kunċett ta’ reklutaġġ ibbażat fuq il-ħiliet.
Anke jekk ikunu familjari, il-kumpaniji jistgħu joqogħdu lura milli jadottaw approċċi bbażati fuq il-ħiliet minħabba d- domandi għar-riżorsi perċepiti.
Ħafna jsibu r-reklutaġġ ibbażat fuq il-ħiliet kumpless wisq, li jirriżulta f’rekwiżiti ta’ ħiliet definiti ħażin u deskrizzjonijiet ġeneriċi ta’ pożizzjonijiet vakanti li jfixklu t-tqabbil b’suċċess.
Ħafna impjegaturi ma jifhmux bis-sħiħ il-ħtiġijiet tal-ħiliet tagħhom stess.

Huwa hawn fejn jidħlu l-PES tal-Ewropa. Billi jaħdmu mal-PES, l-impjegaturi jistgħu jidentifikaw il-ħtiġijiet tagħhom u jiżviluppaw proċessi ta’ reklutaġġ li jirrikonoxxu aħjar il-ħiliet u l-kompetenzi tal-kandidati.

Il-PES jużaw għodod diġitali biex jgħinu jtejbu d-deskrizzjonijiet tal-pożizzjonijiet vakanti tal-impjegaturi, pereżempju billi jidentifikaw ħiliet speċifiċi għall-impjieg u ħiliet trasferibbli. Servizz siewi ieħor huwa li l-impjegaturi jiġu megħjuna jiddistingwu bejn il-ħiliet li huma essenzjali biex wieħed jagħmel xogħlu mill-ewwel jum u dawk li jistgħu jiġu żviluppati maż-żmien.

Appoġġ skont il-pajjiż

Servizzi bħal dawn mhumiex ġodda. Ħafna PES fl-Ewropa kollha ilhom snin jgħinu lill-impjegaturi jadottaw reklutaġġ ibbażat fuq il-ħiliet. Dawn huma ftit eżempji:

Il-PES Franċiż (France Travail) juża l-méthode de recrutement par simulation (MRS). Is-sistema tinvolvi eżerċizzji ta' simulazzjoni – żviluppati flimkien mal-impjegaturi – li jevalwaw il-kapaċitajiet u l-ħiliet ewlenin (eż. attenzjoni għad-dettall, xogħol f'tim) meħtieġa biex wieħed jirnexxi fi rwol. L-MRS kien partikolarment effettiv għas-setturi li qed jiffaċċjaw nuqqas ta’ ħaddiema (eż. il-loġistika, il-manifattura, l-ospitalità, il-bejgħ bl-imnut) billi jwessa’ l-aċċess għal kandidati li għandhom il-ħiliet u li ma għandhomx kredenzjali.
Il-PES tal-Lussemburgu (ADEM) jaħdem mill-qrib mal-impjegaturi biex flimkien ifasslu proċessi ta’ reklutaġġ u taħriġ ibbażati fuq il-ħiliet, b’mod partikolari f’setturi li qed jiffaċċjaw nuqqasijiet akuti (eż. l-industrija tar-ristoranti u tal-ospitalità).
Il-PES tal-Awstrija (AMS) jikkollabora ma' impjegaturi biex flimkien jiddefinixxu r-rekwiżiti tal-ħiliet u jallinjaw moduli qosra ta' taħriġ mal-bżonnijiet tal-pożizzjonijiet vakanti f'okkupazzjonijiet nieqsa mill-ħaddiema.
Il-(VDAB) tal-Belġju u l-PES (Työmarkkinatori) tal-Finlandja jużaw sistemi ta' tqabbil assistiti mill-IA li jiffokaw fuq is-similaritajiet fil-ħiliet minflok fuq okkupazzjonijiet identiċi.
Fl-Irlanda, il-Regional Skills Flora jservu bħala pjattaforma ta’ koordinazzjoni bejn il-PES (Intreo), l-istituzzjonijiet tal-edukazzjoni u t-taħriġ u l-impjegaturi tal-pajjiż. L-impjegaturi jużaw il-Fora biex jiddefinixxu n-nuqqasijiet ta' ħiliet attwali u mistennija, u l-bordijiet tal-edukazzjoni u tat-taħriġ jadattaw il-kurrikulu tagħhom kif xieraq. Ir-riżultat huwa allinjament aktar b'saħħtu bejn il-programmi ta' taħriġ u d-domanda tal-industrija, rispons aktar mgħaġġel għan-nuqqasijiet settorjali u żieda fil-parteċipazzjoni tal-SMEs fl-inizjattivi ta' titjib tal-ħiliet.

B'mod ġenerali, is-servizzi tal-PES jappoġġaw lill-impjegaturi fit-tranżizzjoni minn mentalità ta' kwalifiki għal enfasi fuq il-ħiliet, biex b'hekk tissaħħaħ il-kapaċità tagħhom li jirreklutaw il-persuni t-tajbin għall-impjieg.

Is-servizzi tal-PES ikomplu jittejbu permezz ta’ networks madwar l-UE kollha bħall-EURES. Aqra dwar l-istrateġija l-ġdida tal-EURES, u kif din tappoġġa kemm lill-impjegaturi kif ukoll lill-persuni li qed ifittxu impjieg.

Links relatati:

Thematic Review Workshop on Skills-Based Approaches in Public Employment Services Processes and Activities

ADEM – il-PES tal-Lussemburgu

AMS – il-PES tal-Awstrija

VDAB – il-PES tal-Belġju

Työmarkkinatori _ il-PES tal-Finlandja

Intreo – il-PES tal-Irlanda

Regional Skills Fora (l-Irlanda)

Is-suq tax-xogħol tal-Ewropa qed jinbidel, u l-EURES huwa lest li jwitti t-triq għall-2030

Aqra aktar:

Il-Jiem Ewropej tal-Impjiegi

Sib Konsulenti tal-EURES