Kif titqabbel il-paga minima ta’ pajjiżek ma’ dik ta’ pajjiżi Ewropej oħrajn?

How does your country’s minimum wage compare to other European countries?

Ħafna minna staqsew kif is-salarji tagħna jitqabblu ma’ dawk f’pajjiżi oħra, u saru bosta diskussjonijiet imqanqla dwar min qiegħed f’sitwazzjoni aħjar u għalfejn. Il-pagi minimi jipprovdu bażi għal tqabbil bħal dan, u joffru daqqa t’għajn lejn il-kundizzjonijiet tas-suq tax-xogħol f’kull pajjiż.

Il-Eurostat jippubblika rapport biannwali dwar il-pagi minimi li jirrifletti s-sitwazzjoni fl-1 ta’ Jannar u fl-1 ta’ Lulju ta’ kull sena. L-aktar rapport reċenti jipprovdi ċ-ċifri għall-2024, u jqabbel ukoll is-27 Stat Membru tal-UE mal-biċċa l-kbira tal-pajjiżi kandidati (it-Turkija, is-Serbja, il-Montenegro, l-Albanija, il-Maċedonja ta’ Fuq, il-Moldova, l-Ukrajna) u l-Istati Uniti.

Pagi minimi fl-UE

Il-paga minima hija definita bħala l-aktar remunerazzjoni baxxa li impjegat għandu jirċievi għax-xogħol li jipprovdi. Fl-2018, madwar 7 minn 10 ħaddiema bil-paga minima fl-UE sabuha diffiċli biex ilaħħqu mal-ħajja. Barra minn hekk, il-proporzjon ta’ ħaddiema li jaqilgħu biss il-paga minima huwa ogħla minn 10 % f’għadd ta’ pajjiżi madwar l-Ewropa.

Il-Prinċipju 6 tal-Pilastru Ewropew tad-Drittijiet Soċjali jiddikjara b’mod ċar id-dritt ta’ kull ħaddiem tal-UE għal pagi minimi adegwati li jipprovdu standard ta’ għajxien deċenti. Kriżijiet reċenti bħall-pandemija tal-COVID-19 u l-gwerra fl-Ukrajna taw bidu għal reċessjoni ekonomika li affettwat kważi lil kulħadd, iżda speċjalment lill-ħaddiema b’paga baxxa u lil gruppi soċjalment vulnerabbli oħrajn. Fl-2022, meta l-inflazzjoni kienet fl-ogħla livell tagħha, il-pagi minimi naqsu fil-biċċa l-kbira tal-Istati Membri. Dan kollu afferma mill-ġdid l-impenn tal-UE li tistabbilixxi miżuri protettivi fis-seħħ.

Hemm żewġ forom ta’ pagi minimi fl-UE: statutorji (infurzati bil-liġi) u miftiehma b’mod kollettiv (permezz ta’ ftehimiet intersettorjali nazzjonali, bejn it-trade unions u l-impjegaturi). L-Awstrija, Ċipru, id-Danimarka, il-Finlandja, l-Italja u l-Iżvezja jaqgħu taħt din il-kategorija tal-aħħar.

Varjazzjonijiet fil-paga minima madwar l-UE

Ir-rapport tal-Eurostat tal-2024 jikklassifika l-pajjiżi fi tliet gruppi skont il-paga minima (PM):

PM ogħla minn EUR 1,500 fix-xahar (il-Lussemburgu, l-Irlanda, in-Netherlands, il-Belġju, il-Ġermanja, Franza);
PM ta’ bejn EUR 1,000 u EUR 1,500 fix-xahar (Spanja, is-Slovenja); u
PM daqs jew inqas minn EUR 1,000 fix-xahar (Ċipru, il-Polonja, il-Greċja, il-Portugall, Malta, il-Litwanja, il-Kroazja, l-Estonja, iċ-Ċekja, is-Slovakkja, ir-Rumanija, il-Latvja, l-Ungerija, il-Bulgarija).

Il-pagi minimi fl-Istati Membri jvarjaw minn dawk l-aktar baxxi (EUR 477) fil-Bulgarija għal dawk l-ogħla (EUR 2,571) fil-Lussemburgu.

Il-Eurostat introduċa wkoll unità monetarja artifiċjali msejħa l-“istandard tal-kapaċità tal-akkwist” (PPS), li jippermetti tqabbil aktar ġust ibbażat fuq id-differenzi fil-livell tal-prezzijiet bejn il-pajjiżi. F’termini tal-PPS, il-gruppi ta’ hawn fuq kienu modifikati ftit:

PM ogħla minn PPS 1,250 (il-Lussemburgu, il-Ġermanja, in-Netherlands, il-Belġju, Franza, l-Irlanda, il-Polonja, Spanja, is-Slovenja);
PM bejn PPS 1,000 u PPS 1,250 (ir-Rumanija, il-Litwanja, il-Greċja, il-Kroazja, Ċipru, il-Portugall, Malta); u
PM taħt PPS 1,000 (l-Ungerija, iċ-Ċekja, is-Slovakkja, l-Estonja, il-Latvja, il-Bulgarija).

Anke f’termini ta’ PPS, il-Bulgarija għadha l-Istat Membru fil-limitu l-aktar baxx tal-ispettru (PPS 799), filwaqt li l-Lussemburgu jżomm postu fil-quċċata (PPS 1,912).

Biex issir taf aktar, ara r-rapport tal-Eurostat – Minimum wage statistics (Eurostat – Statistika dwar il-paga minima).

Links relatati:

Pagi minimi ġusti: azzjoni favur kundizzjonijiet ta’ għajxien deċenti fl-UE

Kif l-UE ttejjeb id-drittijiet tal-ħaddiema u l-kundizzjonijiet tax-xogħol

Aqra aktar:

Il-Jiem Ewropej għall-Impjiegi

Sib Konsulenti tal-EURES

Kundizzjonijiet tal-ħajja u x-xogħol fil-pajjiżi tal-EURES

Il-Bażi tad-Data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Online li ġejjin