Q &A: Il-Konsulenti tal-EURES iwieġbu mistoqsijiet minn persuni li qed ifittxu impjieg

Għandek xi mistoqsija li tixtieq tistaqsi lil Konsulent tal-EURES? Dawn huma xi wħud mill-mistoqsijiet li l-persuni li qed ifittxu impjieg staqsew fil-Today’s Dream, Tomorrow’s Reality (Ħolma tal-lum, ir-Realtà ta’ Għada), l-ewwel E(O)JD li fih ħadu sehem konsulenti mill-31 pajjiż kollha tan-network EURES. Ara hawn taħt kif il-Konsulenti tal-EURES irrispondewhom.

(l sa r) Il-konsulenti tal-EURES Simone Döhner, Jan Vleugel u Lara Feller iwieġbu l-mistoqsijiet tal-persuni li qed ifittxu impjieg

Q. Għaliex għandna bżonn network bħall-EURES? Ma nistax minflok naqbad u nikkuntattja lill-pajjiż ta’ interess u mmur fiċ-ċentru tal-impjiegi?

A. Jan Vleugel (EURES tad-Danimarka): Naturalment tista’ tmur fiċ-ċentru tal-impjiegi lokali, iżda n-network EURES jinsab hemm. Jekk tixtieq tmur tgħix barra minn pajjiżek, il-Konsulenti tal-EURES jistgħu jkunu ta’ għajnuna kbira. Jista’ jkun hemm ostakli – jew dak li inti bħala persuna li qed tfittex impjieg tista’ tara bħala ostaklu – iżda forsi wara li titkellem ma’ Konsulent tal-EURES, jaf isserraħ ftit rasek u l-ostaklu ma jibqax jidher daqshekk kbir. Hija s-setgħa tan-network li nistgħu nagħtu pariri dwar iċ-ċaqliq barra mill-pajjiż. Nafu wkoll li ħafna mill-kollegi tagħna li qed jaħdmu barra minn pajjiżhom jistgħu jkunu ta’ benefiċċju kbir għal persuni li qed ifittxu impjieg meta jmorru jgħixu barra minn pajjiżhom. Nistgħu nirreferuk għand Konsulent tal-EURES barra mill-pajjiż, jew permezz taċ-chat jew permezz tal-informazzjoni ta’ kuntatt fuq il-portal tal-EURES.

A. Lara Feller (EURES tal-Iżvezja): Nistgħu noffrulek mhux biss għajnuna bl-informazzjoni li teħtieġ biex tiċċaqlaq, iżda wkoll informazzjoni tal-ġenn bħall-Iskema ta’ Mobilità Mmirata. Kważi kważi dnub jekk ma tikkuntattjaniex qabel għax nistgħu nkellmuk dwar appoġġ finanzjarju u forsi dwar affarijiet li qatt ma tkun ikkunsidrajt.

M. Huwa possibbli li taħdem mill-bogħod għal impjegatur f’pajjiż ieħor?

A. Jan Vleugel: Mill-COVID-19 ’l hawn, ix-xogħol mill-bogħod sar suġġett ta’ diskussjoni. Spiss niġu mistoqsija jekk huwiex meħtieġ li l-persuni li qed ifittxu impjieg jiċċaqilqu lejn, pereżempju, id-Danimarka, u jekk jistgħux jaħdmu mill-bogħod minn pajjiżhom stess minflok. Naħseb li dan huwa daqsxejn diffiċli. Il-biċċa l-kbira tal-impjegaturi jridu li tmur f’pajjiżhom biex taħdem, biex tmur l-uffiċċju, iżda ladarba tkun hemm, irid ikun hemm xi possibbiltajiet biex taħdem mid-dar ġurnata fil-ġimgħa jew xi ħaġa hekk. Qed nerġgħu lura lejn l-uffiċċji u mbagħad naraw x’jiġri minn hemm. Dan jista’ jfisser xogħol mid-dar parti mill-ġimgħa, ġurnata jew tnejn, jew le – iżda huwa l-impjegatur li jrid jiddeċiedi dwar dan.

Q. L-EURES kif jappoġġa l-mobbiltà tar-ritorn għall-ħaddiema li diġà kisbu esperjenza barra minn pajjiżhom u li jixtiequ jmorru lura f’pajjiżhom?

A. Lara Feller: Naħseb li huwa importanti li taġġorna l-informazzjoni li jkollok minn pajjiżek stess. Kieku kelli mmur lura lejn in-Netherlands, naħseb li nħossni mitlufa peress li ilni li tlaqt 20 sena. Anke jekk nirritorna lejn in-Netherlands ta’ spiss, xorta għad hemm xi affarijiet li nbidlu. Tridu tkunu konxji mill-fatt li n-nies meta tmorru lura jgħidu: “Int titkellem il-lingwa. Għaliex m’intix tifhem?’ Ħeqq, ilni nieqsa minn hawn naqra mhux ħażin. Tħejjija xierqa – dan hu l-qofol.

A. Jan Vleugel: Diversi pajjiżi li jkollhom ħafna ħaddiema li jmorru lura f’pajjiżhom għandhom ukoll programmi speċifiċi biex jgħinuhom. Il-Ġermanja għandha webinar speċifiku għal persuni li kienu qed jaħdmu barra mill-pajjiż u li se jmorru lura l-Ġermanja. Fis-sistema tal-EURES, għandna xi taħriġ, speċjalment dwar il-mobbiltà tar-ritorn. Qatt m’inti waħdek u tista’ dejjem tikkuntattja Konsulent tal-EURES li jista’ jirreferik għal programm ieħor fil-pajjiż speċifiku jekk ma jkunx jista’ jgħinek hu stess. Jekk jogħġbok ikkuntattja u uża s-sistema tal-EURES.

A. Simone Döhner (EURES tal-Ġermanja): Jekk ikunu nazzjonali u jmorru lura lejn in-nazzjon ta’ oriġini tagħhom – m’hemm l-ebda problema. Iżda huwa diffiċli. Għandhom josservaw ix-xejriet tas-suq tax-xogħol u x’inhu meħtieġ. Jekk imorru lura bi professjoni speċifika, forsi jkun hemm surplus. Informa ruħek qabel ma titlaq.

Ikklikkja hawn biex tistaqsi l-mistoqsija tiegħek lil Konsulent tal-EURES.

Staqsi l-mistoqsijiet tiegħek u sir af aktar dwar ix-xogħol barra mill-pajjiż fit-turiżmu, fid-divertiment u fl-ospitalità f’Seize the Summer with EURES 2025 (Approfitta mis-Sajf mal-EURES 2025).

Links relatati:

Chat ma’ Konsulent tal-EURES

Seize the Summer with EURES 2017

Kundizzjonijiet tal-ħajja u x-xogħol f’pajjiżi oħra tal-UE

Il-paġna tal-avvenimentToday's Dream, Tomorrow’s Reality

Aqra aktar:

Il-Jiem Ewropej għall-Impjiegi

Sib Konsulenti tal-EURES

Kundizzjonijiet tal-Ħajja u tax-Xogħol fil-pajjiżi tal-EURES

Bażi tad-data tal-Impjiegi tal-EURES

Is-servizzi tal-EURES għall-Impjegaturi

Il-Kalendarju tal-Avvenimenti tal-EURES

Avvenimenti Online li ġejjin

L-EURES fuq Facebook

L-EURES fuq X

L-EURES fuq LinkedIn

L-EURES fuq Instagram