Mill-Portugall għall-Iżvezja: kif infermiera speċjalizzata fil-pedjatrija qalbet għal esperjenzi ġodda u progressjoni fil-karriera tagħha

Margarida Garcia, ta’ età ta’ 23 sena, u s-sieħba tagħha Pedro riedu jmorru minn pajjiż għall-ieħor fl-Ewropa biex jiksbu esperjenzi ġodda, jagħmlu progress fil-karrieri tagħhom u – fil-futur – irabbu familja. Margarida, li studjat biex taħdem bħala\ infermiera qabel ma qattgħet sena taħdem f’dipartiment tal-isptar tat-trabi tat-twelid f’Almada, il-Portugall, tgħid li l-ambizzjoni tagħha kienet dejjem li taqleb għal kundizzjonijiet tax-xogħol aħjar u li tkun tista’ tgħix b’mod indipendenti. Hija tgħid li, “L-objettiv dejjem kien li ssib xi xogħol fl-Ewropa, bħall-pajjiżi Nordiċi, minħabba li dawn joffru riżorsi aħjar”. “Dawn huma pajjiżi aktar żviluppati u joffru bilanċ tajjeb bejn il-ħajja professjonali u dik personali.” Id-deċiżjoni rigward fejn se tmur ħaditha meta Pedro rċieva offerta ta’ impjieg f’Gothenburg, l-Iżvezja. Margarida ngħaqdet miegħu ħames xhur wara u issa qed taħdem bħala infermiera fil-kardjoloġija pedjatrika fl-isptar universitarju ta’ Gothenburg.

Ispirati mill-esperjenzi tagħhom li jmorru l-Iżvezja, il-koppja issa qed jistabbilixxu l-aġenzija ta’ reklutaġġ proprja tagħhom, Europe Connected by Talents, biex jgħinu lill-kumpaniji Żvediżi jirreklutaw professjonisti fil-qasam tal-kura tas-saħħa u tal-inġinerija mill-UE kollha u biex jindirizzaw prattiċi burokratiċi. Fil-futur, jixtiequ jaraw il-kumpanija tagħhom tingħaqad man-network tal-EURES.

Passi prattiċi

Margarida bdiet billi studjat l-Iżvediż sabiex tilħaq il-livell meħtieġ ta’ profiċjenza għall-ħaddiema fil-qasam tal-kura tas-saħħa. Hija tgħid, “Studjajt u ħadt lezzjonijiet għal disa’ xhur filwaqt li bqajt naħdem fil-Portugall”. “Lejn tmiem il-kors, wara li sibt impjieg, mort f’Gothenburg, fejn ħdimt bħala infermiera assistenta u sadattant lestejt l-aħħar modulu tal-kors Żvediż, li bla dubju għenni ħafna biex nitgħallem il-lingwa u nadatta fil-pajjiż mingħajr xkiel.”

Margarida tgħid li bis-saħħa tal-appoġġ mill-EURES, il-proċess kien sempliċi. Iżda kien hemm ukoll żminijiet diffiċli. Tgħid li, “Mingħajr dubju, l-aktar parti diffiċli ta’ dan il-vjaġġ kienet in-nuqqas tal-familja u l-ħbieb tiegħi, iżda din hija xi ħaġa li qed niffaċċja billi mmur il-Portugall ta’ spiss u nfakkar lili nnifsi dan kollu se jwassal għal ħajja aħjar għalija u għall-familja tiegħi fil-futur”.

Margarida żżid: “Nemmen li l-aħjar ħaġa dwar din il-bidla kienet li nikber mil-lat personali. Il-bidu ta’ ħajja flimkien f’pajjiż ġdid fejn ma nafu lil ħadd iwassal biex niżviluppaw aspetti fina nfusna li ma konniex nafu li għandna, kif ukoll niskopru aktar dwarna nfusna, u nesperjenzaw affarijiet ġodda. Huwa proċess intens u mhux dejjem faċli, iżda bla dubju xi ħaġa li nirrakkomanda ħafna u li kulħadd għandu jgħaddi minnha”.

L-għajnuna mill-EURES

Margarida skopriet il-EURES permezz tal-għalliem tagħha tal-lingwa Żvediża. Tgħid li, “Huwa verament ta’ għajnuna kbira u jiftaħ ħafna bibien għal dawk li qed ifittxu li jmorru f’pajjiż ieħor”. “Fil-każ tiegħi, jien irċevejt appoġġ finanzjarju għad-diversi korsijiet tal-Iżvediż li ħadt, għall-intervista wiċċ imb wiċċ kif ukoll għar-rilokazzjoni fl-Iżvezja. Ċertament hija xi ħaġa li nipprova nippromwovi kemm jista’ jkun ma’ nies interessati li jkollhom din l-esperjenza, minħabba li l-appoġġ huwa inkredibbli.”

Gloria Cunha Byström, li hija membru tat-Tim tar-Reklutaġġ fil-qasam tas-Saħħa tal-EURES Żvezja, tat assistenza lil Margarida u għaddiet is-CV tagħha lill-impjegatur rilevanti. Gloria tgħid li “Margarida kkuntattjajna rigward tiftix għal impjieg u informazzjoni dwar l-Iskema ta’ Mobilità Mmirata (TMS)”. “Jiena pprovdejt l-informazzjoni lil Margarida dwar il-ħajja u x-xogħol fl-Iżvezja, is-settur tas-saħħa, u l-proċedura tal-applikazzjoni għall-allowances taħt it-TMS.” Hija żżid tgħid: “Kien ta’ sodisfazzjoni li naħdem ma’ Margaridaminħabba d-determinazzjoni u l-ambizzjoni tagħha”.

Gloria tagħti parir lil ħaddiema oħra fil-qasam tas-saħħa tal-UE li jixtiequ jmorru jgħixu l-Iżvezja, biex l-ewwel japplikaw għar-rikonoxximent tal-kwalifiki tagħhom mill-Bord Nazzjonali tas-Saħħa u l-Assistenza Soċjali (Socialstyrelsen) u mbagħad jibdew jitgħallmu l-Iżvediż.

Għal aktar informazzjoni, ikkuntattja lit-tim fuq healtharbetsformedingen [dot] se (health[at]arbetsformedingen[dot]se).