Conas am agus airgead a shábháil agus tú ag earcú fostaithe

Bíonn tionchar ag folúntais phoist a bhíonn gan líonadh ar chuideachtaí ar bhealaí éagsúla. Mar thoradh ar dhaoine a bheith ar iarraidh ó phríomhphoist, ní féidir freastal go leordhóthanach ar riachtanais an chliaint nó an mhargaidh, rud a fhágann go mbíonn ioncam suntasach á chailleadh. Anuas air sin, bíonn tionchar ag próiseas earcaíochta a mhaireann i gcomhair tréimhse rófhada ar mheanma na cuideachta trí bhrú a chur ar fhoirne atá ann cheana, a dhéanann níos mó ná a gcion cothrom den ualach oibre nuair a bhíonn siad ag fanacht go dtí go gceapfar fostaithe nua ionas nach mbeidh orthu na dualgais bhreise a dhéanamh.

Tá bealaí ann, áfach, chun an próiseas earcaíochta a chur i gcrích ar bhealach nach mbeidh tionchar diúltach aige ar do chuideachta nó ar d’fhostaithe.

Scríobh sainchuntais phoist atá soiléir agus gonta

Baineann an chaoi a bhfógraíonn tú post go díreach leis an méid ama a thógfaidh sé ort iarrthóir oiriúnach a roghnú ina dhiaidh sin. Má tá sainchuntas poist rófhada, ródhoiléir nó má fhágann na cáilíochtaí riachtanacha an iomarca spáis le haghaidh léirmhínithe, beidh sé deacair na hiarrthóirí cearta a roghnú. Chun é sin a sheachaint, tabhair achoimre shoiléir ar fhreagrachtaí, ar réamhriachtanais scileanna, chomh maith le riachtanais oideachais agus taithí.

An próiseas scagtha a bharrfheabhsú

An raibh a fhios agat go bhfaigheann an mheánphostáil poist thart ar 250 iarratasóir? Is mór an méid é sin, agus d’fhéadfadh an líon a bheith níos airde in earnálacha a ndéanann barrachas difear dóibh. I gcásanna den sórt sin, tá sé ciallmhar cabhair a fháil ó theicneolaíocht earcaíochta. Cuidíonn córais rianaithe iarratasóirí le heagraíochtaí chun an próiseas earcaíochta ar fad a bhainistiú, lena n-áirítear postáil poist agus scanadh CVanna, agallaimh a sceidealú, obair leantach a dhéanamh leis na hagallaithe, agus cúnamh a thabhairt le hionduchtú. D’fhéadfadh uirlisí scagtha IS-chuidithe eile cabhrú chun CVanna a mheaitseáil le ceanglais róil, rud a shábhálfaidh am suntasach do ranna acmhainní daonna.

Feabhas a chur ar thaithí an iarrthóra

Bíonn fostaithe sona agus táirgiúla mar thoradh ar an gcéim earcaíochta a cuireadh i gcrích. An bhfuil an próiseas iarratais éasca? An ndéanann tú cumarsáid thráthúil leis na hiarrthóirí ag gach céim den phróiseas? An bhfuil siad ar an eolas faoi cad ba cheart dóibh a bheith ag súil leis ina dhiaidh sin? An bhfuil an próiseas agallaimh á éascú agat, b’fhéidir trí neart deiseanna chun agallamh a dhéanamh a chur ar fáil agus/nó trí rogha a thabhairt chun cianagallamh a dhéanamh? Trí aird a thabhairt ar an méid sin, áiritheofar próiseas níos rianúla agus níos tapúla, chomh maith le heispéireas dearfach do gach duine lena mbaineann.

Smaoinigh ar sheachfhoinsiú

Cuireann earcaíocht go leor brú ama ar ranna acmhainní daonna, agus d’fhéadfaí go leor den am sin a chaitheamh ar bhealach níos fearr ag díriú ar chúraimí táirgiúla eile. Díríonn gníomhaireachtaí earcaíochta ar iarrthóirí a mheaitseáil le róil agus tá rochtain acu ar dhíormaí móra tallainne, rud a chuireann dlús leis an bpróiseas agus a chuireann deireadh leis an mbrú a bhaineann le daoine a earcú go hinmheánach.

Dírigh ar an méid atá agat cheana féin

Ar deireadh, déan measúnú ar na daoine atá ag obair duit cheana féin. An mbeadh duine amháin acu oiriúnach don phost atá tú ag iarraidh a líonadh? Trí shoghluaisteacht inmheánach a spreagadh, ní hamháin go gcuirfear deireadh le costais earcaíochta, ach cuirfear deiseanna fáis gairme ar fáil ón taobh istigh freisin, rud a chuirfidh borradh faoi mheanma na bhfostaithe agus a mhéadóidh rannpháirtíocht. Ina theannta sin, bealach bunúsach ach an-éifeachtach chun am agus airgead a shábháil is ea na dálaí cearta a chur ar fáil a fhágfaidh go bhfanfaidh d’fhostaithe – cultúr oibre dearfach, tuarastail iomaíocha, oiliúint agus deiseanna dul chun cinn – trí dheireadh a chur leis an ngá atá ann daoine a earcú chomh minic céanna.

Freastail ar aonach earcaíochta uile-Eorpach

Ionas go n-éireoidh leat an chéad duine eile a earcú go héasca, ba cheart duit smaoineamh ar fhreastal ar Lá Fostaíochta Eorpach (Ar líne) freisin. Go minic reáchtáiltear na himeachtaí earcaíochta dinimiciúla sin ar líne agus ar an láthair i rith na bliana. Tugann siad fostóirí agus cuardaitheoirí poist ó gach cearn den Eoraip le chéile. Mar fhostóir, tá rochtain agat ar na mílte CVanna saor in aisce, rud a fhágann go bhfuil do phróiseas earcaíochta níos éasca, níos tapúla agus níos cost-éifeachtaí.

Is féidir le EURES cabhrú leat an fostaí foirfe a aimsiú trí chead a thabhairt duit cuardach a dhéanamh ó líon mór iarrthóirí ó gach cearn den Eoraip. Faigh tuilleadh faisnéise trí chlárú mar fhostóir anseo.

Naisc ghaolmhara:

Laethanta Fostaíochta Eorpacha (Ar líne)

EURES - An chaoi ar féidir le IS feabhas a chur ar an bpróiseas fála tallainne

Fíorchostas na fostaíochta in 32 tír Eorpach a thuiscint

Léigh tuilleadh:

Laethanta Fostaíochta Eorpacha

Aimsigh Comhairleoirí EURES

Dálaí maireachtála agus oibre i dtíortha EURES

Bunachar Sonraí Post EURES

Seirbhísí EURES le haghaidh fostóirí

Féilire Imeachtaí EURES

Imeachtaí ar líne a bheidh ar siúl go luath