Bestu ráðin við nýliðaþjálfun á nýjum alþjóðlegum starfsmönnum

Erlendar ráðningar gera fyrirtækið þitt samkeppnishæfara. Þær færa fyrirtækinu þínu nýja færni, menntun og sjónarmið. En ef nýliðaþjálfunin er ekki eins og vera ber eru líkur á því að nýju starfsmennirnir segi upp innan árs. Þess vegna er mikilvægt að vita hvernig eigi að bjóða nýja alþjóðlega starfsmenn velkomna og gera þá að hluta af fyrirtækinu, einkum á tímum COVID-19.

Fyrir nýliðaþjálfun

Nýliðaþjálfunin hefst áður en nýi starfsmaðurinn kemur til vinnu í fyrsta sinn og er mjög mikilvægt að allt sé til staðar og tilbúið fyrir hann. Það hefur neikvæð áhrif á nýja starfsmanninn ef hann rekur sig á vandamál frá fyrsta degi.

Athugaðu hvort nýi erlendi starfsmaðurinn þarf sérstakt atvinnuleyfi eða vinnuheimild sem þú þarft að hjálpa honum við. Undirbúðu ráðningarsamninga og lögfræðileg skjöl fyrirfram því það getur verið nauðsynlegt að prenta þau, skanna þau og póstleggja.

Láttu yfirfara allan tæknibúnað fyrir nýja starfsmanninn. Sendu honum allan vélbúnað áður og búðu til reikninga og innskráningarupplýsingar fyrir hann.

Komdu á persónulegu sambandi

Venjulega fá nýir starfsmenn túr um skrifstofuna og kynningu á mismunandi teymum. Þetta er mjög mikilvægur hluti af nýliðaþjálfuninni og það ætti ekki að sleppa þessu vegna þess að fólk vinnur nú heiman frá sér.

Skipulegðu netfund til að kynna nýja starfsmanninn og tilnefndu fulltrúa frá mismunandi deildum til að útskýra stuttlega við hvað þeir vinna. Ef þú vinnur í stóru fyrirtæki er hægt að dreifa þessum fundum yfir lengri tíma til að kaffæra ekki nýja starfsmanninn strax á fyrsta degi. Veltu fyrir þér að setja upp sérstakt myndbandsspjall fyrir teymi nýja starfsmannsins svo hann geti hitt samstarfsmenn sína.

Komdu á „félagakerfi“

Til að bjóða upp á beina aðstoð getur þú úthlutað nýja starfsmanninum „netfélaga“. Það getur verið reynslumeiri starfsmaður í svipaðri stöðu eða vinalegt andlit sem getur veitt ráð um hvernig eigi að hefja störf með árangri. Þegar kemur að vinnutengdum spurningum getur það verið mun auðveldara fyrir starfsmanninn að ræða við samstarfsmann en mannauðsdeildina.

Taktu tillit til nýrra aðstæðna

Það getur verið að þú þurfir að senda út upplýsingar og standa fyrir þjálfun á hægari hraða en venjulega. Það getur verið yfirþyrmandi að hefja störf í algjöru fjarvinnuumhverfi. Með því að dreifa fræðslu yfir lengra tímabil gerir þú nýja starfsmanninum kleift að vinna úr upplýsingunum og spyrja spurninga.

Bókaðu reglulega hittinga

Þetta er mikilvægt til að halda nýjum starfsmönnum við efnið, áhugasömum og í sambandi. Gakktu úr skugga um að nýi starfsmaðurinn hitti yfirmann sinn og/eða teymið sitt að minnsta kosti einu sinni eða tvisvar í viku. Lykillinn er að koma á fót reglulegri samskiptaáætlun svo enginn einangrist eða verði útundan. Það er líka frábær leið til að fylgjast með framvindu nýja starfsmannsins.

Kynntu menningu fyrirtækisins fyrir nýjum starfsmönnum

Þegar nýir starfsmenn vinna heiman frá sér getur verið erfitt að kynna þeim menningu fyrirtækisins. En það er samt eitt af því mikilvægasta þegar maður hefur störf hjá nýju fyrirtæki. Félagsleg samskipti eru hraðasta og skilvirkasta leiðin til að taka þátt í menningu fyrirtækisins. Ekki hræðast að bóka nóg af óformlegum spjalltímum á milli nýrra starfsmanna og teymismeðlima. Þannig kynnast þeir nýja teyminu og fyrirtækinu í raun og veru.

Gleymdu ekki að alþjóðlegir starfsmenn þurfi að laga sig að tveimur menningarheimum – bæði í fyrirtækinu þínu og landinu þínu.

Ertu enn óviss með ráðningar á starfsmönnum í fjarvinnu? Skoðaðu greinina okkar Sex kostir þess að vera með starfsfólk í fjarvinnu frá heimilum sínum.

 

Tengdir hlekkir:

Sex kostir þess að vera með starfsfólk í fjarvinnu frá heimilum sínum

 

Nánari upplýsingar:

Evrópskir atvinnudagar

Drop’pin@EURES

Finna EURES-ráðgjafa

Atvinnu- og búsetuskilyrði í EURES-löndum

Vinnugagnagrunnur EURES

Þjónusta EURES fyrir vinnuveitendur

Viðburðadagatal EURES

Næstu viðburðir á Netinu

EURES á Facebook

EURES á Twitter

EURES á LinkedIn