Iż-żieda ta’ timijiet multikulturali: kif niżguraw li dawn ikunu ta’ suċċess

The rise of multicultural teams: how to ensure they are successful — Photo credit: Adobe

Kemm jekk qed tissorvelja kif ukoll jekk inti parti minn tim internazzjonali, l-isfruttament tal-vantaġġi ta’ tali ambjent għandu benefiċċji kbar mhux biss għall-intrapriża, iżda wkoll għall-membri individwali tat-tim. It-timijiet multikulturali huma spazji fejn settijiet uniċi ta’ ħiliet jingħaqdu flimkien, u b’hekk joħolqu ġabra wiesgħa ta’ għarfien u għarfien espert. Skont rapport ta’ McKinsey, il-kumpaniji b’diversità kulturali għolja huma 36 % aktar profittabbli minn dawk b’inqas diversità. Barra minn hekk, Deloitte sabet li x-xogħol f’ambjent divers isaħħaħ b’mod sinifikanti l-kreattività individwali.

X’tista’ tagħmel biex tiżgura li t-tim multikulturali tiegħek ikun mutur ta’ suċċess?

Ħaddan id-diversità...

Kull membru tat-tim iġib madwar il-mejda elementi distintivi tal-personalità, l-esperjenza, l-attitudnijiet u l-imġiba li jkun tgħallem. Dan isir saħansitra aktar prominenti f’ambjenti kulturalment differenti. Ir-rikonoxximent u r-rispett ta’ dawn id-differenzi bejn il-membri tat-tim huma kruċjali għal kollaborazzjoni transkulturali ta’ suċċess.

Barra minn hekk, il-fatt li wieħed jaċċetta l-membri l-oħra kif ukoll jibqa’ moħħu miftuħ u kurjuż huwa l-ewwel pass lejn il-bini ta’ tim varjat ta’ suċċess.

… iżda ipprovdi wkoll qafas korporattiv ċar

L-impjegati minn sfondi differenti jista’ jkollhom fehmiet differenti dwar diversi aspetti tax-xogħol jew tal-organizzazzjoni, pereżempju l-kunċett ta’ ġerarkija, ir-rwol/l-involviment tal-maniġment, jew il-bilanċ bejn il-formali u l-informali fl-ispazju tax-xogħol.

Sabiex jiġu sfruttati bis-sħiħ il-vantaġġi ta’ ambjent ta’ xogħol multikulturali, huwa importanti li jiġu stabbiliti xi regoli bażiċi rigward l-elementi fundamentali tal-organizzazzjoni. B’tali sistema ta’ referenza stabbilita sew, it-tim se jkun jista’ jiffoka fuq xogħol aktar kreattiv, mingħajr ma juża l-enerġija fuq id-dettalji proċedurali jew in-nuqqas ta’ fehim potenzjali li jirriżulta minn lakuni kulturali.

Stabbilixxi bażi komuni, speċjalment fid-dinja virtwali

Timijiet diversi li jinġabru flimkien mill-bogħod permezz ta’ pjattaformi diġitali bħal Skype jew Zoom għandhom ikunu konxji li jridu juru livell ogħla ta’ flessibbiltà minn timijiet omoġenji li jiltaqgħu wiċċ imb wiċċ. Dan minħabba li jkollhom jinnegozjaw kwistjonijiet bħal ħinijiet li jkunu se jiltaqgħu u l-kompiti li se jipprijoritizzaw, filwaqt li jqisu fatturi bħal żoni tal-ħin, restrizzjonijiet kulturali differenti, u l-gravità ta’ sitwazzjonijiet speċifiċi fuq livell lokali.

Fl-aħħar nett, ħu approċċ aktar rilassat

Ix-xogħol flimkien ma’ persuni ta’ kulturi u sfondi differenti x’aktarx li jwassal għal mumenti skomdi f’xi ħin jew ieħor. Jekk issib ruħek “mitluf fit-traduzzjoni” jew tirrealizza li b’mod involontarju wettaqt faux pas kulturali, tkissirx lilek innifsek dwar dan. Minflok kun miftuħ/a, ħudha bħala opportunità għalik innifsek biex titgħallem mill-persuna/i l-oħra u ħalli s-sitwazzjoni sservi bħala lezzjoni siewja għall-futur.

Qed taħseb biex tibda esperjenza ta’ xogħol multikulturali? Aqra l-artiklu tagħna dwar Il-benefiċċji imprezzabbli ta’ programmi ta’ skambju ta’ xogħol internazzjonali.

Links relatati:

Uża l-potenzjal ta’ forza tax-xogħol multilingwi

Tmexxija minn distanza?Hawn issib kif tiġġestixxi t-tim internazzjonali tiegħek b’mod effettiv

Suġġerimenti ewlenin għall-onboarding ta’ impjegati internazzjonali ġodda

Aqra aktar:

Il-Jiem Ewropej għall-Impjiegi

Sib Konsulenti tal-EURES

Kundizzjonijiet tal-ħajja u xogħol fil-pajjiżi tal-EURES

Il-Bażi tad-Data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES