Gradwati fl-iskejjel Rumeni jsibu traineeships fil-Ġermanja rurali mal-EURES

Benefiċjarju minnhom kien Józsi Kotroczo, li issa jaħdem għal Elektro Müller, ditta tal-inġinerija elettrika bbażata fil-belt żgħira ta’ Soltau. Józsi għandu ċittadinanza Ungeriża u Rumena, iżda kien ilu jgħix fir-Rumanija għal ħafna snin qabel ma mar jgħix il-Ġermanja. Huwa kien qed jistudja għall-eżamijiet tiegħu ta’ tluq mill-iskola meta ltaqa’ ma’ Marianne Perrin, Konsulent tal-EURESfis-Servizzi ta’ Kollokament Internazzjonali (ZAV) tal-Aġenzija Federali tal-Impjiegi Ġermaniża. Marianne żaret l-iskola tiegħu fil-belt ta’ Ineu, qrib Arad, biex tippreżenta opportunitajiet biex jgħix, jitgħallem u jaħdem f’Heidekreis. Bl-appoġġ mill-Iskema ta’ Mobilità Mmirata tal-EURES is-Servizz Pubbliku tal-Impjiegi reġjonali u ċ-Ċentru ta’ Akkoljenza lokali, it-tim ta’ Marianne mbagħad stieden erba’ trainee prospettivi biex iżuru Heidekreis, jiltaqgħu mal-impjegaturi, u jimmaġinaw lilhom infushom li jgħixu hemm.

Tingħata għajnuna lill-impjegaturi lokali biex jindirizzaw id-diskrepanzi fil-ħiliet

Wieħed mill-impjegaturi kien Patrick Müller, il-proprjetarju ta’ Elektro Müller. “Illum il-ġurnata huwa diffiċli ħafna li ż-żgħażagħ ikunu interessati fis-sengħa [tal-inġinerija elettroteknika]”, jgħid Patrick. “Ħafna gradwati fl-iskejjel iridu jagħmlu apprendistat jew studju fil-qasam kummerċjali. Huwa għalhekk li aħna bħala kumpanija ninsabu kuntenti ħafna meta persuni minn barra l-pajjiż ikunu jixtiequ jibdew apprendistat magħna hawnhekk f’Heidekreis,” huwa jispjega. “Iż-żoni rurali spiss joffru impjiegi u kundizzjonijiet tal-għajxien tajbin ħafna (valur għall-flus, infrastruttura għall-familji, eċċ.) iżda l-kandidati għandhom it-tendenza li jkunu jippreferu l-bliet kbar,” iżżid tgħid Marianne. “Hawnhekk għandna diskrepanza kbira u xtaqna niffaċċjawha billi nispjegaw u nikkummerċjalizzaw b’mod ċar il-vantaġġi ta’ għajxien u xogħol f’żoni rurali.”

Jingħelbu l-isfidi – lingwistiċi u relatati mal-pandemija

Peress li t-taħriġ vokazzjonali jinvolvi tagħlim ibbażat fl-iskejjel, it-trainees kellhom bżonn ħiliet avvanzati fil-lingwa Ġermaniża. Dan inizjalment għamilha diffiċli biex jinstabu impjegaturi. Madankollu, l-istudenti ambizzjużi kienu lesti li jieħdu korsijiet tal-lingwa u Marianne sabet tliet negozji – inkluż Elektro Müller – li offrewlhom apprendistati, inkluż perjodu twil ta’ tħejjija biex itejbu l-Ġermaniż tagħhom.

Ftit wara l-wasla tagħhom, il-pandemija tal-COVID-19 ġabet magħha aktar diffikultajiet. It-trainees żgħażagħ ma setgħux jitilqu mid-djar ġodda tagħhom u kellhom jagħmlu l-korsijiet tal-lingwa tagħhom online. Marianne, meta rat li dan seta’ jkun riskju li jmorru lura lejn pajjiżhom, ħadmet mal-impjegaturi, iċ-Ċentru ta’ Akkoljenza u l-iskola tal-lingwa biex tappoġġjahom u timmotivahom. “Għalija, dan kien eżempju tajjeb li l-EURES mhuwiex biss network pan-Ewropew sabiħ li joffri ħafna opportunitajiet, iżda li l-EURES jiftaħ ukoll il-bibien għal aktar networks – dawk lokali speċjalizzati biex verament jgħinu dwar il-lokalizzazzjoni,” kompliet tgħid.

Jistabbilixxi ruħu fil-ħajja tal-pajjiż il-ġdid

Józsi għeleb dawn l-isfidi u qed ssetilja sew fil-Ġermanja. “Il-ħajja f’Hildekreis togħġobni ħafna. In-nies hawnhekk simpatiċi u jgħinuk,” huwa jgħid. Peress li ġej minn reġjun rurali relattivament simili tar-Rumanija, huwa seta’ jkompli jgawdi l-passatempi tiegħu, bħall-futbol u l-ġiri, f’ambjent komdu. “Tassew togħġobni li d-dar tiegħi tinsab qrib il-post tax-xogħol tiegħi u nista’ nagħmel kważi kollox mingħajr karozza,” żied jgħid Józsi.

Filwaqt li jirrifletti fuq l-esperjenza tiegħu, Józsi mill-ewwel jirrikonoxxi l-appoġġ li rċieva. “Wara r-rilokazzjoni tagħna, iċ-Ċentru ta’ Akkoljenza organizza appartamenti għalina u għenna b’formalitajiet bħar-reġistrazzjoni, l-appuntamenti tat-tabib, ix-xiri, it-tiftix ta’ appartament, għamara, kuntratti tal-mobiles, kontijiet bankarji, eċċ. Dik kienet għajnuna kbira,” huwa jirrifletti. “L-appoġġ finanzjarju mill-EURESgħamilha possibbli għalija li niffinanzja r-rilokazzjoni tiegħi lejn il-Ġermanja,” żied jgħid Józsi. “Mingħajr din l-ispinta tal-bidu, probabbilment ma nkunx hawn.”

Jekk int interessat li taħdem barra minn pajjiżek, ibbrawżja l-postijiet vakanti jew ikkuntattja lil Konsulenttal-EURES .

Links relatati:

Sib impjieg

Ikkuntattja Konsulent tal- EURES

Aqra aktar:

Il-Jiem tal-Impjiegi Ewropej

Sib Konsulenti tal-EURES

Kundizzjonijiet tal-ħajja u tax-xogħol fil-pajjiżi tal-EURES

Il-bażi tad-data tal-Impjiegital-EURES

Is-servizzi tal-EURES għall-impjegaturi

Il-Kalendarju tal-Avvenimentital-EURES

Avvenimenti Onlineli ġejjin

L-EURES fuq Facebook

L-EURES fuq Twitter

L-EURES fuq LinkedIn