20 sena flimkien: Żewġ deċennji ta’ opportunità u tkabbir għall-Polonja u s-Slovakkja

Għoxrin sena ilu, Ċipru, iċ-Ċekja, l-Estonja, l-Ungerija, il-Latvja, il-Litwanja, Malta, il-Polonja, is-Slovakkja u s-Slovenja ngħaqdu mal-isħubija politika, ekonomika u kulturali l-aktar sinifikanti. Meta għamlu dan, huma kisbu aċċess għal benefiċċji bħall-moviment liberu tal-oġġetti, tas-servizzi, tal-kapital u tal-persuni, kif ukoll gawdew minn standards ogħla ta’ għajxien u xogħol, u opportunitajiet akbar.

Sa mit-tkabbir tal-2004:

• Inħolqu 26 miljun impjieg ġdid madwar l-UE, li 6 miljun minnhom jinsabu fl-10 Stati Membri l-ġodda.
• Aktar minn 2.7 miljun żagħżugħ u żagħżugħa mill-10 pajjiżi l-ġodda pparteċipaw fil-programm Erasmus+.
• Il-faqar ukoll naqas b’mod sinifikanti fl-10 pajjiżi: minn 37 % fl-2005 għal 17 % fl-2020, u n-numri għadhom qed jonqsu.

Il-Polonja

Qabel l-adeżjoni tagħha, il-Polonja ffaċċjat livelli għoljin ta’ qgħad, speċjalment fost iż-żgħażagħ. Il-qgħad staġonali kien ukoll għoli, u dan wassal lill-persuni Pollakki biex ifittxu opportunitajiet ta’ xogħol barra mill-pajjiż, abbażi ta’ ftehimiet internazzjonali dwar il-moviment tal-ħaddiema.

L-adeżjoni tal-Polonja mal-UE ġabet bidla sinifikanti. Kompliet il-migrazzjoni għal skopijiet ta’ xogħol, iżda taħt qafas differenti. Il-ftuħ simultanju tas-swieq tax-xogħol fir-Renju Unit, fl-Irlanda u fl-Iżvezja wassal għal migrazzjoni tal-massa tal-poplu Pollakk lejn dawn ir-reġjuni fit-tfittxija ta’ pagi u standards tal-għajxien aħjar. EURES Polonja sar il-punt ta’ referenza ewlieni għal dawk il-ħaddiema, filwaqt li offra pariri u servizzi mfassla apposta biex jagħmel it-tranżizzjoni tagħhom aktar faċli.

Bl-għajnuna tal-EURES, il-Polonja saret aktar determinata li toffri opportunitajiet ta’ xogħol aħjar lin-nies tagħha. “Fis-snin 2004-2007, sar l-akbar għadd ta’ fieri internazzjonali tal-impjiegi u avvenimenti ta’ reklutaġġ organizzati minn uffiċċji individwali tax-xogħol fil-Polonja,” qalet Katarzyna Kawka-Kopeć, kap speċjalista fil-Ministeru għall-Familja u l-Politika Soċjali, l-Uffiċċju Nazzjonali ta’ Koordinazzjoni tal-EURES tal-Polonja.

Is-Slovakkja

Il-ħaddiema Slovakki bbenefikaw bil-kbir ukoll mill-adeżjoni ta’ pajjiżhom mal-UE. L-istabbiliment simultanju tal-EURES Slovakkja fetaħ opportunitajiet ġodda għal persuni li qed ifittxu impjieg, u offrielhom għajnuna fit-tfittxija tagħhom, pariri dwar il-kundizzjonijiet tal-għajxien u tax-xogħol, kif ukoll opportunitajiet ta’ għajnuna finanzjarja għall-appoġġ tal-mobbiltà tal-impjiegi permezz tal-Iskema ta’ Mobbiltà Mmirata tal-EURES.

Fl-20 sena ta’ eżistenza tiegħu, l-EURES Slovakkja organizza 75 fiera tal-impjiegi u 2,250 avveniment ta’ reklutaġġ. Il-Konsulenti tiegħu appoġġaw 500,000 klijent u ppubblikaw 21,000 offerta ta’ impjieg fuq il-portal tal-EURES Slovakkja.

Miroslava Pangrácová, Konsulent tal-EURES mal-EURES Slovakkja, ikkummentat dwar l-attivitajiet tan-network u l-kontribut ġenerali għat-trasformazzjoni tas-suq tax-xogħol Slovakk: “Il-Konsulenti Slovakki tal-EURES ixerrdu s-sensibilizzazzjoni dwar in-network f’laqgħat mal-istudenti fl-iskejjel, fil-jiem tal-karrieri, f’Jum l-Ewropa jew fil-festivals tal-mużika. Barra minn hekk, l-EURES Slovakkja jappoġġa l-mobbiltà transfruntiera f’kollaborazzjoni ma’ sħab oħra.”

Qed tfittex xogħol fl-Ewropa? Konsulent tal-EURES qiegħed hawn biex jgħinek.

Links relatati:

Il-Kunsill Ewropew – Il-Kunsill tal-Unjoni Ewropea: It-tkabbir tal-2004: fatti u ċifri

Il-Kunsill Ewropew – Il-Kunsill tal-Unjoni Ewropea: L-20 anniversarju tat-Tkabbir tal-Unjoni Ewropea tal-2004 – Ċittadini nattivi tal-Istati Membri jikkummentaw dwar kif l-adeżjoni bbenefikat lil pajjiżhom u biddlitilhom ħajjithom.

Aqra aktar:

Il-Jiem Ewropej għall-Impjiegi

Sib Konsulenti tal-EURES

Il-kundizzjonijiet tal-għajxien u tax-xogħol fil-pajjiżi tal-EURES

Il-Bażi tad-Data tal-Impjiegi  tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Online li ġejjin

L-EURES fuq Facebook

L-EURES fuq X

L-EURES fuq LinkedIn

L-EURES fuq Instagram