An bhfuil tú réidh IS a thabhairt leat chun do chuid oibre?

Rud a bhain le réimse an fhicsin eolaíochta tráth, is cuid dár saol oibre laethúil anois é. Agus tithe cliste a mbíonn ag súil lenár riachtanais sula mbíonn siad ar eolas againn, agus feidhmchláir a dhéanann athrú ó bhonn ar chúram sláinte san áireamh, beidh an intleacht shaorga linn go buan. Maidir leis an obair, tá na sonraí thar a bheith soiléir: baineann duine as triúr oibrithe AE úsáid aisti cheana ag an obair, agus tá sé beartaithe ag 92 % de chuideachtaí níos mó infheistíochta a dhéanamh san intleacht shaorga sna trí bliana amach romhainn. Fágann sé sin go bhfuilimid eolach go leor cheana féin ar bheith ag obair in éineacht leis an intleacht shaorga, ach an bhfuil tuiscint againn ar a hacmhainneacht iomlán?

Tionchar ar mhaitheas

Le himeacht na mblianta, bhí an-imní ann maidir le húsáid na hintleachta saorga: leis an imní maidir le príobháideachas agus slándáil, aincheisteanna eiticiúla, imní maidir le mí-úsáid, agus an eagla sheanbhunaithe go dtógfaidh sé ár bpoist, tá mothúcháin mheasctha ann maidir lena húsáid san ionad oibre.

Mar sin féin, níl gach rud gruama. De réir suirbhé de chuid an Aontais a rinneadh níos luaithe i mbliana, tá dearcadh dearfach ag 62 % de mhuintir na hEorpa ar an intleacht shaorga ag an obair. Go deimhin, d’fhéadfadh an intleacht shaorga a bheith ina huirlis chlaochlaitheach maidir leis an gcaoi a n-oibríonn cuideachtaí agus maidir leis an gcaoi a ndéanaimid ár poist, mar fhostaithe.

Borradh a chur faoin táirgiúlacht

Cuidíonn an intleacht shaorga leat oibriú ar bhealach níos cliste, seachas ar bhealach níos deacra. Féachaimis ar conas a tharlaíonn sé sin.

Feabhsaíonn sé éifeachtúlacht. Cuireann uirlisí intleachta saorga dlús le gnáthchúraimí a úsáideann an t-am a d’fhéadfá a úsáid ar obair níos fiúntaí. Le huathoibriú tascanna amhail iontráil sonraí, tástáil córais, rianú costas, sceidealú ábhair agus tuilleadh, cuirtear ar do chumas díriú ar ghníomhaíochtaí níos tábhachtaí.

Cuireann sé ar do chumas sonraí a ghiaráil ar bhealach níos fearr agus torthaí níos cruinne a bhaint amach. Is féidir leis an intleacht shaorga anailís a dhéanamh ar níos mó faisnéise ag an am céanna, agus níos tapúla ná mar a dhéanann an duine. Mar sin, má bhaineann do phost le déileáil le go leor sonraí, ná bíodh eagla ort cúraimí a tharmligean chuig an gcara IS is fearr leat. Tá cúntóirí intleachta saorga ag fanacht le do threoracha, agus iad réidh do lá oibre a dhéanamh níos éasca agus d’aschuir a dhéanamh níos beaichte.

An bhfuil do ról dírithe ar chustaiméirí? Sa chás sin, is féidir leis an intleacht shaorga cabhrú leat feidhmíocht a fheabhsú trí sheirbhísí níos tapúla agus idirghníomhaíochtaí cliant níos pearsantaithe a chur ar fáil. Cinntíonn botaí comhrá a oibríonn 24/7 go dtugtar tacaíocht do do chustaiméirí tráth ar bith, agus ní hamháin le linn do chuid uaireanta oibre. Is féidir leis an intleacht shaorga freagraí ríomhphoist a dhéanamh freisin ar na ceisteanna is coitianta, rud a fhágann gur féidir leat tobsmaointeoireacht a dhéanamh ar tháirgí agus ar eispéiris níos fearr do do chustaiméirí.

Cuireann sé le folláine. Is féidir leis an intleacht shaorga do leibhéil struis ag an obair a laghdú, ní hamháin trí na cúraimí is atriallaí agus is fadálaí a ghlacadh ar láimh, ach freisin trí ligean duit do shláinte a rianú agus athruithe intomhaiste a dhéanamh. D’fhéadfadh níos mó ná nós a bheith i gceist le gléasanna inchaite amhail uaireadóirí cliste agus rianairí aclaíochta: cabhraíonn siad le do ráta croí, do phatrúin chodlata agus do leibhéil ghníomhaíochta a rianú, chomh maith le moltaí a chur ar fáil maidir le roghanna stíl mhaireachtála níos fearr. Mar sin, agus tú faoi bhrú ag an obair an chéad uair eile, d’fhéadfadh breathnú ar do mhéadrachtaí cur i gcuimhne duit céim siar a thógáil, sos a ghlacadh agus aire a thabhairt duit féin sula bhfillfidh tú ar do chúraimí le níos mó soiléireachta agus fuinnimh.

D’fhéadfadh sé gur caitheadh anuas ar an intleacht shaorga i gcaitheamh na mblianta, ach is deacair neamhaird a thabhairt ar na tairbhí iomadúla a bhaineann léi. Más mian leat éabhlóidiú de réir a chéile leis an am i láthair, bain leas as an intleacht shaorga agus oibrigh léi, agus déan éifeachtúlacht do chuid idirghníomhaíochtaí léi a uasmhéadú. Ansin, ní hamháin nach gcuirfear an intleacht shaorga i d’ionad, ach fágfaidh sí go mbeidh tú níos fearr fós sa phost atá agat.

Faigh tuilleadh eolais maidir le conas do scileanna IS a uasghrádú chun tairbhe iomlán a bhaint aisti inár n-alt Scileanna IS don todhchaí: Treoir maidir le huasoiliúint san aois dhigiteach

Naisc ghaolmhara:

OECD: IS agus obair

Scileanna IS san ionad oibre? D’fhiafraigh Cedefop de na hoibrithe

An Coimisiún Eorpach: Cur chuige Eorpach i leith na hintleachta saorga

Léigh tuilleadh:

Laethanta Fostaíochta Eorpacha

Aimsigh Comhairleoirí EURES

Dálaí maireachtáil agus oibre i dtíortha EURES

Bunachar Sonraí Post EURES

Seirbhísí EURES le haghaidh fostóirí

Féilire Imeachtaí EURES