Il-post tat-twelid tiegħek kif jaffettwa l-post tax-xogħol tiegħek?

How does your birthplace affect your workplace? — EURES

L-istudju jesplora kif li jkollok sfond barrani (jiġifieri li tkun ġej minn pajjiż ieħor) jista’ jkollu impatt fuq il-prospetti ta’ impjieg tan-nies. Dan iħares speċifikament lejn żewġ tipi ta’ ħaddiema barranin:

Il-migranti tal-ewwel ġenerazzjoni (persuni li twieldu barra mill-pajjiż li jgħixu fih, li lanqas il-ġenituri tagħhom ma twieldu f’dak il-pajjiż);
Il-migranti tat-tieni ġenerazzjoni (dawk li twieldu fil-pajjiż fejn jgħixu, iżda li l-ġenituri tagħhom ma twildux hemmhekk).

Is-sejbiet ewlenin tal-istudju huma bbażati fuq data mill-Istħarriġ dwar il-Kundizzjonijiet tax-Xogħol Ewropej tal-2015 u jinkludu dan li ġej:

Il-post tat-twelid tiegħek, jew il-post tat-twelid tal-ġenituri tiegħek, jista’ jaffettwa ħafna aspetti mill-ħajja tax-xogħol tiegħek. Dawn jinkludu l-prospetti tiegħek ta’ impjieg, it-tipi ta’ impjiegi li tieħu u l-kondizzjonijiet tax-xogħol tiegħek.
Il-migranti tal-ewwel ġenerazzjoni sejrin tajjeb f’termini ta’ impjieg. Dawn il-migranti għandhom rati ta’ impjieg ogħla minn dawk ta’ persuni lokali fi kważi nofs l-Istati Membri tal-UE (għalkemm huwa importanti li wieħed jinnota li r-raġuni ewlenija li ħafna jmorru jgħixu f’pajjiż ieħor hija x-xogħol).
Il-fatt li wieħed ikun migrant tal-UE tat-tieni ġenerazzjoni huwa aħbar tajba meta wieħed jiġi biex isib impjieg – għandhom l-ogħla rata ta’ impjieg fl-UE b’mod ġenerali! Il-migranti tal-UE tat-tieni ġenerazzjoni qed juru wkoll integrazzjoni pożittiva fis-suq tax-xogħol.
Il-migranti tal-ewwel ġenerazzjoni huma aktar probabbli li jkollhom impjiegi “elementari” (jiġifieri porter, gwardjan, ħaddiema ta’ kunsinna, persuna li tnaddaf).
Il-migranti tat-tieni ġenerazzjoni huma aktar probabbli li jokkupaw impjiegi b’ħiliet għolja u li jħallsu ħafna.
Il-migranti xi drabi jsibuha diffiċli biex isibu impjiegi li jaqblu mal-livelli ta’ edukazzjoni tagħhom. L-ostakli tal-lingwa u n-nuqqas ta’ rikonoxximent tal-ħiliet u l-kwalifiki minn pajjiż ieħor huma meqjusa bħala r-raġunijiet ewlenin għal dan, u hija sfida li l-għodod bħall-Qafas Ewropew tal-Kwalifiki qed jgħinu biex jingħelbu.
Il-migranti huma aktar probabbli li jirrappurtaw li esperjenzaw diskriminazzjoni u inugwaljanza bejn is-sessi mill-ħaddiema nattivi. Dan huwa qasam li inizjattivi bħall-Pilastru Ewropew tad-Drittijiet Soċjali qed jaħdmu biex itejbu.