Dik l-offerta ta’ impjieg hija verament sikura? Kif tagħraf impjieg ta’ kwalità qabel ma tiffirma

Irċevejt dik l-offerta ta’ impjieg li tant xtaqt. Imma qabel ma tiċċelebra, staqsi lilek innifsek mistoqsija kruċjali: toffri tassew is-sigurtà tal-impjieg li għandek bżonn?

Is-swieq tax-xogħol fl-Ewropa nbidlu b’mod drammatiku f’dawn l-aħħar għoxrin sena. Il-kuntratti permanenti full-time għadhom in-norma, iżda l-arranġamenti part-time u temporanji mmultiplikaw. Filwaqt li dawn verament jistgħu joffru bilanċ aħjar bejn ix-xogħol u l-ħajja privata, jistgħu wkoll jaħbu nuqqas ta’ sigurtà. Fil-fatt, skont rapport reċenti, 19 % tal-impjiegi fl-UE issa jistgħu jiġu kklassifikati bħala vulnerabbli – taħlita ta’ introjtu inadegwat, nuqqas ta’ sigurtà fl-impjieg u nuqqas ta’ drittijiet fuq il-post tax-xogħol.

Min jinsab l-aktar fir-riskju

Kuntratt temporanju jew part-time ma jfissirx awtomatikament li huwa impjieg ħażin. Il-vulnerabbiltà tiżdied meta dawn l-arranġamenti jkunu involontarji, jew meta jiġu kkombinati diversi karatteristiċi dubjużi, pereżempju impjieg part-time furzat b’kuntratt għal terminu fiss b’sigħat imprevedibbli.

Il-vulnerabbiltajiet mhumiex maqsuma b’mod ugwali. Spanja (29 %), il-Portugall (25 %) u l-Lussemburgu (25%) jirrapportaw l-ogħla livelli ta’ vulnerabbiltà, filwaqt li l-Ungerija (17 %), Malta (18 %) u l-Bulgarija (18 %) jinsabu fil-livelli l-aktar baxxi. F’pajjiżi bħall-Ġermanja u l-Awstrija, it-tħassib ewlieni huwa pagi baxxi; fil-pajjiżi Mediterranji u Nordiċi, huwa n-nuqqas ta’ sigurtà fl-impjieg.

Kif mistenni, in-nisa, il-ħaddiema żgħażagħ, il-persuni bi kwalifiki aktar baxxi u l-migranti huma l-aktar affettwati. X’inhi l-aħbar it-tajba? Kull sena addizzjonali ta’ esperjenza ta’ xogħol tnaqqas ir-riskju tiegħek ta’ vulnerabbiltà b’madwar punt perċentwali wieħed – tfakkira qawwija li billi tibni rekord sod fil-karriera tiegħek, verament tkun qed tipproteġi lilek innifsek.

Sinjali ta’ allarm u sinjali tajbin

Qabel ma tiffirma, aħseb dwar dan li ġej:

Kuntratt bil-miktub. Skont il-liġi tal-UE, kull impjieg għandu jkollu kuntratt bil-miktub li jiddeskrivi l-kundizzjonijiet tax-xogħol tiegħek, u għandek tirċievi d-dettalji ewlenin fi żmien ġimgħa minn meta tibda.
Permanenti jew għal terminu fiss? Iċċekkja t-tip u t-tul tal-kuntratt, u jekk status temporanju hux verament temporanju jew mod biex jevitaw li jagħtuk drittijiet.
Paga reali u prevedibbli. Ikkonferma li m’intix qed titħallas inqas mill-paga minima u li l-qligħ huwa prevedibbli – mhux purament kummissjoni jew ibbażat fuq kuntratti ta’ żero sigħat (mingħajr sigħat tax-xogħol garantiti).
Xogħol iddikjarat u legali. Kun ċert(a) li l-impjieg jiġi ddikjarat kif suppost u li jkollok is-sigurtà soċjali.
Taħriġ u progressjoni. Se jkollok aċċess għat-taħriġ u l-iżvilupp? L-impjiegi vulnerabbli ma joffru xejn minn dan – sinjal ta’ twissija kbir.
Awtonomija u flessibbiltà. Fittex kontroll ġenwin fuq il-kompiti tiegħek, u ħinijiet tax-xogħol raġonevoli.

Tfittixx waħdek: Il-EURES qiegħed hawn għalik

Hija ħafna aktar faċli li tevalwa offerta meta tkun taf x’inhu tipiku u legali fil-pajjiż fejn se tmur tgħix. Preċiżament għalhekk teżisti t-taqsima Kundizzjonijiet tal-ħajja u tax-xogħol tal-EURES. Għal kwalunkwe destinazzjoni, jiġu spjegati n-normi lokali tal-kuntratti, il-pagi minimi, ir-regoli dwar il-ħinijiet tax-xogħol u s-sigurtà soċjali, sabiex tkun tista’ tqabbel offerta mal-istandard nazzjonali minflok tipprova taqta’. Jekk għandek xi mistoqsijiet, tista’ tikkuntattja lill-Konsulent tal-EURES għal aktar informazzjoni u gwida. Fittex b’mod intelliġenti, iċċekkja d-dettalji u taċċettax impjieg li jħallik vulnerabbli.

Barra minn hekk, aqra l-artiklu tal-EURES dwar kif li tkun impjegat(a) legalment huwa ta’ benefiċċju għalik, għall-impjegatur tiegħek u għall-ekonomija.

Links relatati:

“Impjieg u kundizzjonijiet tax-xogħol tal-ħaddiema l-aktar vulnerabbli: Indirizzar ta’ sfida politika kontinwa” (rapport ta’ riċerka tal-Eurofound)

“Kundizzjonijiet tal-ħajja u tax-xogħol fl-Ewropa”

Ix-xogħol iddikjarat huwa ta’ benefiċċju għal kulħadd – hawnhekk se ssib għalfejn huwa importanti għalik

Id-Direttiva (UE) 2019/1152 tal-Parlament Ewropew u tal-Kunsill tal-20 ta’ Ġunju 2019 dwar kundizzjonijiet tax-xogħol trasparenti u prevedibbli fl-Unjoni Ewropea

Aqra aktar:

Il-Jiem Ewropej tal-Impjiegi

Sib Konsulenti tal-EURES

Il-kundizzjonijiet tal-ħajja u tax-xogħol fil-pajjiżi tal-EURES

Bażi tad-data tal-Impjiegi tal-EURES

Is-servizzi tal-EURES għall-impjegaturi