Díreach tagtha isteach sa lucht saothair? Lig don Aontas do bhealach i dtreo na fostaíochta a dhéanamh níos fusa

Léiríonn staitisticí go bhfuil daoine óga i measc na ndaoine is mó a bhuailtear le linn tréimhsí deacra. Ní threisítear leis na huimhreacha sin ach an tábhacht a bhaineann le tionscnaimh chun deiseanna a chruthú don chéad ghlúin eile, ámh:

• Tar éis na géarchéime airgeadais a bhí ann ag deireadh na 2000í, ba é an ráta dífhostaíochta beagnach 25 % i measc daoine óga faoi bhun 25 bliana d’aois in 2013.
• Faoi láthair, tá 8 milliún duine óg ann nach bhfuil i mbun oideachais, fostaíochta ná oiliúna (NEETanna).
• Tá duine fásta óg amháin as gach ceathrar i mbaol bochtaineachta agus eisiamh sóisialta, agus bíonn sé deacair nó an-deacair ar 40 % díobh slí bheatha a bhaint amach.
• Le blianta fada anuas, d’fhan dífhostaíocht i measc na hóige ag thart ar dhá oiread leibhéal na dífhostaíochta foriomláine.

Ó mhí Aibreáin 2024 ar aghaidh, tá an dífhostaíocht i measc óige na hEorpa cobhsaí, ag 14.5 %, ar ráta é atá chun cinn ar na leibhéil a taifeadadh beagnach 10 mbliana ó shin. Ag cur leis an méid sin, tá sé mar mhisean ag an Aontas é a laghdú a thuilleadh fós. Seo thíos roinnt príomhthionscnamh.

Bealaí chun na hoibre don aos óg

Is éard atá sa ráthaíocht don aos óg gealltanas chun deis cháilíochta a thairiscint do gach duine óg faoi bhun 30 bliain d’aois laistigh de 4 mhí tar éis dóibh a bheith dífhostaithe nó an t‑oideachas a fhágáil. D’fhéadfadh oideachas leanúnach, fostaíocht, printíseachtaí nó cúrsaí oiliúna a bheith i gceist léi. Is é is aidhm di a áirithiú go bhfaighidh an t‑aos óg lena mbaineann treoir ghairme iomchuí, chomh maith leis an tacaíocht cheart chun rochtain a fháil ar chláir oiliúna nuair is gá dóibh feabhas a chur ar a gcuid scileanna. Go dtí seo, tá an tionscnamh tar éis deiseanna oiriúnacha a thabhairt do 57 milliún duine óg.

Leis an Tionscnamh Fostaíochta don Aos Óg dírítear go príomha ar NEETanna agus ar dhaoine atá tar éis a bheith as obair ar feadh tréimhse fhada. Rinneadh an tionscnamh a chomhtháthú i gclár Chiste Sóisialta na hEorpa+ (CSE+) do 2021-2027. Ciallaíonn sé sin go gceanglaítear ar thíortha ina bhfuil rátaí NEET os cionn mheán an Aontais amhail an Ghréig, an Iodáil, an Liotuáin agus an Rómáin 12 % ar a laghad dá n‑acmhainní CSE+ a chaitheamh ar thacaíocht a thabhairt do dhaoine óga.

An bhfuil spéis agat i bprintíseacht a chuideoidh leat an bhearna idir an t‑oideachas agus an obair a dhúnadh? Agus é á aithint aige go bhféadfadh sé sin a bheith ina chéim thábhachtach idir eatarthu do go leor daoine óga, sheol an tAontas an Comhaontas Eorpach do Phrintíseachtaí. Is ardán é lena ndírítear ar fhostóirí, ar institiúidí oiliúna, ar eagraíochtaí óige, ar údaráis phoiblí agus ar ghrúpaí taighde chun infhaighteacht, cáilíocht agus clú printíseachtaí ar fud na hEorpa a fheabhsú. Go dtí seo, tá níos mó ná 500 páirtí leasmhar tugtha le chéile aige, a bhfuil gealltanas tugtha acu níos mó ná 3 mhilliún deis oiliúna agus fostaíochta a chur ar fáil d’oibrithe óga.

Agus an luach a bhaineann le hobair don aos óg á aithint aige, tá infheistíocht á déanamh ag an Aontas ina shaoránaigh óga trí chistiú spriocdhírithe, faisnéis maidir le deiseanna fostaíochta agus oiliúna, agus trí phrintíseachtaí agus cúrsaí oiliúna ar ardchaighdeán a chur ar fáil. Is ann do thionscnaimh mar sin chun daoine óga cosúil leatsa a chumhachtú chun barr a gcumais a bhaint amach!

Réidh chun dul i gceann an tsaoil? Lig do EURES an bealach a thaispeáint duit! Tá an feachtas ‘Your career take you places’ tiomnaithe do thacú le mic léinn ollscoile nó gairmoiliúna, oiliúnaithe agus printísigh atá ag lorg a gcéad phoist thar lear. Tabhair cuairt ar an leathanach gréasáin tiomnaithe chun nuashonruithe rialta a fháil ar dheiseanna nua, agus bí ag faire amach do na haischlibeanna #withEURES agus #EURESjobs ar na meáin shóisialta.

Naisc ghaolmhara:

Fostaíocht don aos óg: bearta AE ina thaobh

An Coimisiún Eorpach Tacaíocht fostaíochta don aos óg

Bileog eolais: Beartas óige an Aontais

Léigh tuilleadh:

Laethanta Fostaíochta Eorpacha

Aimsigh Comhairleoirí EURES

Dálaí maireachtála agus oibre i dtíortha EURES

Bunachar Sonraí Post EURES

Seirbhísí EURES le haghaidh fostóirí

Féilire Imeachtaí EURES

Imeachtaí ar líne a bheidh ar siúl go luath

EURES ar Facebook

EURES ar X

EURES ar LinkedIn

EURES ar Instagram