Cúig leid le haghaidh post nua a thosú go cianda

1. Barrfheabhsaigh do spás oibre sa bhaile

Roimh do chéad lá, áirithigh go bhfuil an trealamh cuí agat – lena n-áirítear cathaoir, deasc, ceamara, agus micreafón, más gá – agus go bhfuil sé socraithe ar bhealach atá compordach duit. Ós rud é go soláthraíonn a lán áiteanna oibre trealamh sonrach, déan cinnte de go bhfiafróidh tú de d’fhostóir nua an bhfuil an trealamh sin ar fáil duit freisin.

Socraigh do stáisiún oibre i seomra gan mórán torainn agus cur isteach amhairc, agus ina bhfuil soilsiú iomchuí. Tá sé tábhachtach a áirithiú go bhfuil dea-nascacht idirlín agat agus go bhfuil na cláir agus na bogearraí a theastaíonn uait suiteáilte.

2. Ullmhaigh d’ionduchtú cianda

Roimh do chéad lá, léigh aon ábhair ábhartha ionduchtúcháin a comhroinneadh leat. Más féidir, déan iarracht ainm agus ról na ndaoine a mbeidh tú ag obair leo ar bhonn tráthrialta, go háirithe a mhéid a bhaineann a ról le do ról féin, a fhoghlaim. Ina lán cásanna, tá an fhaisnéis sin ar fáil ar LinkedIn. Is féidir leat taighde a dhéanamh ar an gcuideachta, a héiteas agus a mórthionscadail freisin chun dul i dtaithí ar an gcultúr san áit oibre.

3. Foghlaim sainroghanna pearsanta cumarsáide do chomhghleacaithe

Oibríonn cuideachtaí agus foirne difriúla ar bhealaí difriúla. Fágann an obair chianda go mbíonn sé ag éirí níos tábhachtaí i gcónaí breithniú a dhéanamh ar an dóigh ar fearr le do chomhghleacaithe cumarsáid a dhéanamh. An dtaitníonn ríomhphoist fhada mhionsonraithe leo, mar shampla, nó an fearr leo labhairt thar an bhfón? Cé chomh minic agus a bhíonn siad ag iarraidh an t-eolas is deireanaí a fháil le linn cúraimí? An dtaitníonn físghlaonna leo nó arbh fhearr leo cumarsáid a dhéanamh trí theachtaireachtaí meandracha? Is dóigh go bhfaighidh tú na freagraí ar na ceisteanna sin le linn d’ionduchtúcháin agus le linn do chuid oibre ina dhiaidh sin. Más rud é go mbeidh tú éiginnte choíche, áfach, fiafraigh díobh! Ar an nóta sin…

4. Labhair amach ar do shon agus ná bíodh aon drogall ort ceisteanna a chur

Agus tú ag obair go cianda, ní bhíonn an deis agat idirghníomhú le daoine san oifig agus ceisteanna a chur ar an dóigh ar ghnách leat a dhéanamh roimhe seo. Anois, is gá duit glao a chur nó ríomhphost nó teachtaireacht a sheoladh má theastaíonn comhairle uait. Tá sé tábhachtach é sin a dhéanamh chun a áirithiú go leanfaidh tú le do chuid oibre a fheabhsú agus nach bhfaighidh do chuid oibre an ceann is fearr ort agus nach ndéanfaidh tú botúin inseachanta.

Murar tairgeadh an deis duit cheana féin, déan iarracht cruinnithe tráthrialta a sceidealú le do bhainisteoir chun dul chun cinn a phlé nó chun an scéala is déanaí a fháil. Tabharfaidh sé sin deis mhinic duit aiseolas a lorg go réamhghníomhach, spriocanna a leagan síos do do chuid oibre amach anseo, agus cabhair a iarraidh nuair a bhíonn tú éiginnte.

5. Coinnigh leideanna cabhracha ar fáil

Scríobh treoir ‘mhearthagartha’ duit féin. D’fhéadfaí an treoir sin a scríobh i leabhar nótaí, i ndoiciméad Word nó ar nótaí atá greamaithe timpeall ar do dheasc, fiú; cibé acu is oiriúnaí duit. Ba cheart an treoir a bheith so-rochtana agus ba cheart meabhrúchán tapa a thabhairt inti ar mhionsonraí tábhachtacha a bhaineann le do chuid oibre (e.g. ainm agus ról do chomhghleacaithe, mórthionscadail, suíomhanna gréasáin ábhartha, seoltaí ríomhphoist teagmhála/uimhreacha fóin, etc.).

Tá súil againn go mbeidh na leideanna sin úsáideach duit agus guímid gach rath ort i do ról nua!

Chun tuilleadh faisnéise a fháil faoi thionchar na paindéime ar shaol na hoibre, féach an t-alt uainn dar teideal Conas a d’fhéadfaí difear a dhéanamh do shaol na hoibre sa bhliain 2021 de bharr na paindéime.

Naisc ghaolmhara:

Conas a d’fhéadfadh tionchar a bheith ag an bpaindéim ar shaol na hoibre sa bhliain 2021

Léigh tuilleadh:

Laethanta Fostaíochta Eorpacha

Aimsigh Comhairleoirí EURES

Dálaí maireachtála agus oibre i dtíortha EURES

Bunachar Sonraí EURES

Seirbhísí EURES le haghaidh fostóirí

Féilire Imeachtaí EURES

Imeachtaí Ar Líne atá ag teacht aníos

EURES ar Facebook

EURES ar Twitter

EURES ar LinkedIn