5 pariri sabiex tissimplifika s-CV tiegħek

Agħmilha qasira u sempliċi

Kemm jekk qed tapplika għal apprendistat kif ukoll għal traineeship jew impjieg, is-CV tiegħek aktarx se jkollha ħafna kompetizzjoni. L-aħħar ħaġa li tkun trid hija li reklutatur imħabbat iqalleb biss l-ewwel ftit paġni tat-tmien paġni magħmulin b'reqqa tas-CV tiegħek jew, l-agħar ħaġa, li jwarrabha kompletament minħabba t-tul tagħha. Żommha qasira u rilevanti – żewġ paġni normalment huma meqjusin bħala t-tul ideali – u kun ċert li r-reklutaturi għandhom aċċess faċli għall-informazzjoni l-aktar importanti kollha dwarek u l-esperjenza tiegħek.

Agħmilha rilevanti

Staqsi lilek innifsek: dan ir-reklutatur x'jeħtieġ li jkun jaf? Wisq probabbli dan huwa differenti mill-aħħar reklutatur, għalhekk ċaqlaq l-affarijiet, neħħi xi affarijiet u inkludi biss dak li huwa importanti. U ftakar li filwaqt li l-fatt li tħobb issajjar u tisma' l-mużika huwa importanti għalik, sakemm mhux qed tapplika għal impjieg fil-catering jew l-industrija tal-mużika, probabbilment mhuwiex xi ħaġa li r-reklutatur huwa interessat fiha! Aħjar dak l-ispazju prezzjuż jintuża għal xi ħaġa li se tkun evidenza tal-adegwatezza tiegħek għall-pożizzjoni offruta.

Kun kunfidenti, iżda realistiku

Li tippromwovi lilek innifsek jista' jkun bilanċ diffiċli – jekk tagħmilha wisq tista' tidher arroganti, b'kisbiet mhux realistiċi li jistgħu jidhru foloz għar-reklutatur. Wisq ftit u tirriskja li ma tispikkax u li tkun sempliċiment CV f'sensiela twila ta' CVs oħrajn. Kun żgur li dak li tikteb jippromwovi l-ħiliet u l-esperjenza tiegħek, iżda huwa wkoll realistiku u jista' jkun ipprovat f'intervista.

Iffoka fuq dak li ksibt, mhux biss dak li għamilt

Jista' jkun faċli li taqa' fin-nasba li sempliċiment telenka l-esperjenza tiegħek, mingħajr ebda kuntest jew riżultati reali. L-esperjenza hija importanti, iżda ma tgħid xejn lir-reklutatur dwar dak li fil-fatt ksibt jew il-kontributi li għamilt. Jekk kont involut/a biex tattira negozju ġdid għal kumpanija liema benefiċċji ġab miegħu dan? Jekk ipparteċipajt f'kors ta' taħriġ x'impatt kellu? L-inklużjoni ta' dan it-tip ta' informazzjoni turi lir-reklutatur il-valur miżjud li tista' ġġib.

Adatta, adatta, adatta

Bħala reklutatur m'hemm xejn aktar fastidjuż milli taqra kif inti minn dejjem xtaqt taħdem fl-industrija tal-karozzi... meta tkun qed tapplika għal pożizzjoni f'kumpanija farmaċewtika. Kun żgur li tindirizza dak li l-avviż għall-impjieg qiegħed ifittex u li tadatta s-CV tiegħek kif xieraq!

Awguri bis-simplifikazzjoni tas-CV tiegħek u jekk qed tfittex għal xi pariri tajbin dwar kif tikteb l-ittra ta' introduzzjoni perfetta jew kif tmur tajjeb ħafna f'intervista, ħalli f'idejna!

Links relatati:

kif tikteb l-ittra ta' introduzzjoni perfetta

kif tmur tajjeb ħafna f'intervista

Aqra aktar:

Jiem l-Impjiegi Ewropej

Drop’pin@EURES

Sib Konsulent tal-EURES

Kundizzjonijiet tax-xogħol u l-għajxien f’pajjiżi tal-EURES

Il-Bażi ta' Data tal-Impjiegi tal-EURES

Servizzi tal-EURES għall-impjegaturi

Il-Kalendarju tal-Avvenimenti tal-EURES