EURES Rumanija jgħin liż-żgħażagħ li qed ifittxu xogħol biex isibu apprendistati fil-Ġermanja

Fil-fatt skont Destatis, l-Uffiċċju Federali tal-Istatistika tal Ġermanja, ir-rata ta’ impjieg taż-żgħażagħ fil-Ġermanja fl-2016 (7.1%) kienet fl-iktar livell baxx tagħha mill-bidu tas-snin disgħin.

Il-programm "MobiPro-EU – L-Impjieg ta’ Ħajti" ġie stabbilit mill-gvern Ġermaniż fl-2013 biex jindirizza din il-kwistjoni billi jagħti liż-żgħażagħ minn Stati Membri oħra tal-UE b’rati ta’ qgħad ogħla, l-opportunità li jwettqu taħriġ vokazzjonali fil-Ġermanja.

Fl-2015, l-Aġenzija tal-Impjiegi tal-Kontea f’Bacau, li hija parti mill-EURES Rumanija, bdiet tipparteċipa fl-iskema wara li kienet mistiedna tikkollabora mas-Servizzi Internazzjonali ta’ Kollokament tal-Ġermanja (ZAV), li kienu responsabbli biex jirreklutaw trainees għall-programm.

EURES Rumanija ntalab jorganizza l-għażla ta’ kandidati ta’ bejn il-15 u l-25 sena interessati li jwettqu taħriġ vokazzjonali fil-Ġermanja. Huma bdew minnufih it-tħejjijiet għal avveniment ta’ reklutaġġ fuq il-post f’Bacau, li sar fi Frar 2015.

“Aħna għamilna reklami fil-midja, fuq il-portali nazzjonali u lokali u bgħatna wkoll emails u messaġġi fuq il-mowbajls liż-żgħażagħ kollha ta’ bejn il-15 u l-25 sena rreġistrati fil-bażi ta’ data tagħna, u infurmajnihom dwar dan il-proġett,” qalet il-Konsulent tal-EURES Alina-Elena Ciorchelia.

Alina-Elena u l-Maniġer tal-Aġenzija Nazzjonali tal-Impjieg Rumena Florina Andreea Avram ħadu sehem fl-avveniment, flimkien ma’ żewġ rappreżentanti minn ZAV Rostock. 35 żagħżugħ u żagħżugħa attendew l-avveniment, bir-riżultat li 24 sabu kollokament fil-Ġermanja.

MobiPro-EU – L-Impjieg ta’ Ħajti kien ibbażat fuq is-sistema Ġermaniża Duale Ausbildung, li hija tip ta’ apprendistat doppju li jgħaqqad it-taħriġ fuq il-post tax-xogħol ma’ tagħlim ibbażat fil-klassi.

Skont Alina-Elena, din is-sistema doppja wriet li hija metodu ta’ suċċess biex iż-żgħażagħ Rumeni jiġu integrati fis-suq tax-xogħol Ġermaniż, peress li jiksbu mhux biss kwalifiki u esperjenza ta’ xogħol, iżda wkoll għarfien tal-lingwa Ġermaniża u ħiliet oħra importanti tal-ħajja.

“B’dan il-mod, iż-żgħażagħ huma reklutati minn kumpaniji Ġermaniżi fi stadju bikri u jaħdmu u jistudjaw fl-istess ħin (bejn tlieta u erbat ijiem fil-kumpanija, u ġurnata sa jumejn l-iskola), jiksbu wkoll aktar fiduċja fihom infushom, jagħmlu ħbieb ġodda, jitgħallmu jkunu indipendenti u jaqilgħu l-għajxien tagħhom stess, kif ukoll jieħdu fuqhom responsabbiltajiet ġodda li ambjent ġdid li wieħed ikun qiegħed jgħix fih iġib miegħu,” spjegat Alina-Elena.

Il-proġett ipprovda appoġġ finanzjarju lill-parteċipanti, kemm għal korsijiet inizjali fil-lingwa fir-Rumanija, kif ukoll matul it-taħriġ vokazzjonali tagħhom fil-Ġermanja. Huwa kopra wkoll l-ispejjeż tal-ivvjaġġar għal intervisti u offra appoġġ biex jgħin lill-parteċipanti jidraw jgħixu u jaħdmu fil-Ġermanja.

Il-parteċipazzjoni ta’ EURES Rumanija fil-programm MobiPro-EU – L-Impjieg ta’ Ħajti kien eżempju tajjeb ta’ kollaborazzjoni ta’ suċċess bejn uffiċċju nazzjonali tal-EURES u l-gvern ta’ Stat Membru ieħor tal-UE.

Irriżulta li kien ta’ benefiċċju reċiproku għal dawk li kienu qed ifittxu xogħol fir-Rumanija li kienu lesti li jmorru barra minn pajjiżhom fit-tfittxija tagħhom għal opportunitajiet ta’ taħriġ, u għall-impjegaturi fil-Ġermanja li kienu qed ifittxu li jieħdu apprendisti ġodda biex jappoġġjaw in-negozji tagħhom.

‘MobiPro-EU – L-Impjieg ta’ Ħajti’ kienet skema pilota tal-gvern Ġermaniż li damet sejra erba’ snin, mill-2013 sal-2016. Aktar informazzjoni dwar il-programm hija disponibbli fuq is-sit web tal-programm.

 

Links relatati:

Destatis – Impjieg taż-żgħażagħ fil-Ġermanja

MobiPro-EU – L-Impjieg ta’ Ħajti

 

Aqra aktar:

Jiem l-Impjiegi Ewropej

Drop’pin@EURES

Sib Konsulent tal-EURES

Kundizzjonijiet tax-xogħol u l-għajxien fil-pajjiżi tal-EURES

Il-Bażi tad-Data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Online li ġejjin

L-EURES fuq Facebook

L-EURES fuq Twitter

L-EURES fuq LinkedIn