L-aqwa 6 suġġerimenti għal networking online effettiv

Ipperfezzjona l-preżenza tiegħek online

Qabel ma tibda, kun ċert(a) li taġġorna l-profili tiegħek fuq il-pjattaformi ta’ networking li qed tuża. Tella’ ritratt tal-profil professjonali, ikteb titlu, deskrizzjoni tal-impjieg u sommarju li jattiraw l-attenzjoni, u elenka l-kisbiet, l-esperjenza u l-ħiliet rilevanti tiegħek. Meta tkun qed tibni l-profil tiegħek, ipprova arah mill-perspettiva ta’ impjegatur potenzjali. Profil twil mhux dejjem ifisser profil tajjeb. Żomm l-informazzjoni tiegħek qasira u konċiża. Profil maħsub sew jista’ jkun aktar b’saħħtu milli taħseb.

Barra minn hekk, tinsiex tirrevedi l-mezzi l-oħra tal-midja soċjali tiegħek. L-impjegaturi u r-reklutaturi potenzjali ta’ spiss ifittxu l-kandidati fuq il-midja soċjali, għaldaqstant jaf ikun għaqli li tħassar kwalunkwe post kontroversjali u tivverifika s-settings tal-privatezza tiegħek. Fittex ismek online biex tkun ċert(a) li ma qabiżlek xejn.

Ibni network ibbilanċjat

Waħda mill-aħjar affarijiet tan-networking hija li tista’ tagħtik perspettiva ġdida dwar il-karriera tiegħek. Meta tkun qed tibni n-network tiegħek, kun ċert(a) li żżid ukoll persuni barra mis-settur tiegħek. Il-qasam li fih qed taħdem probabbli għandu xi affarijiet komuni ma’ industriji oħra. Aħseb dwar x’jistgħu jkunu u sib persuni rilevanti minn dawn l-oqsma. Qatt ma taf minn fejn jista’ jiġi riferiment.

Ippersonalizza l-messaġġi tiegħek

Wieħed mill-akbar żbalji fin-networking li jagħmlu l-professjonisti hu li jibagħtu messaġġi impersonali. Aktar ma jkun ġeneriku l-messaġġ tiegħek, aktar ikun probabbli li l-persuna li qed tikkuntattja se tikkunsidrah bħala spam u tinjorah. Qabel ma żżid lil xi ħadd man-network tiegħek, esplora l-profil tagħhom u ara x’għandkom komuni. Mhux bilfors li dejjem tkun esperjenza professjonali - jaf tkunu qed tappoġġaw kawżi soċjali simili jew ikollkom interessi edukattivi komuni. Kun ċert(a) li tibda l-messaġġ tiegħek bir-raġuni għalfejn qed tikkuntattja lil dik il-persuna u x’ġiegħlek tagħżilha.

Kun attiv(a)

Li tingħaqad ma’ network professjonali mhuwiex biżżejjed biex wieħed jinduna bik. Trid tispikka billi tagħmel posts u taqsam il-kontenut rilevanti b’mod attiv, u billi tinvolvi ruħek fil-posts. Uri lin-network il-passjoni tiegħek għall-qasam li tinsab fih.

Kun infurmat(a) sew

Ftakar li l-kwantità ma tfissirx kwalità. Kun ċert(a) li l-posts tiegħek ikunu rilevanti u li l-kontribuzzjonijiet tiegħek ikollhom skop. Jekk jiġi nnutat li qed tagħmel posts tal-kontenut sempliċiment biex tkun għamilthom, l-attività tiegħek ma tibqax tiġi segwita fin-network.

Kun ta’ għajnuna

In-networking huwa reċiproku u dan ifisser li għandek toqgħod għassa għal riferimenti tajbin. Jekk tgħin lil xi ħadd isib impjieg, jaf dak li jkun jirritornalek il-pjaċir fil-futur.

Nittamaw li dawn is-suġġeriment jagħtu spinta lill-ħiliet ta’ networking online tiegħek. Hekk kif ir-restrizzjonijiet tal-COVID-19 bdew jittaffew, l-avvenimenti fiżiċi ta’ networking qed jerġgħu jqumu fuq saqajhom. Kun ċert(a) li tara wkoll l-aktar gwida importanti ta’ networking wiċċ imb wiċċ tagħna.

Fi sħubija mal-EURES, il-Portal Ewropew dwar il-Mobilità fix-Xogħol.

 

Links relatati:

L-aktar gwida importanti għan-networking

 

Aqra aktar:

Il-Jiem tal-Impjiegi Ewropej

Sib Il-Konsulenti tal-EURES

Kondizzjonijiet tal-ħajja u x-xogħol fil-pajjiżi tal-EURES

Il-Bażi tad-Data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Online li se jsiru dalwaqt

L-EURES fuq Facebook

L-EURES fuq Twitter

L-EURES fuq LinkedIn