Inċentiv ta’ reklutaġġ immirat jgħin lil żewġ għalliema Olandiżi jsibu impjiegi fl-Iżvezja permezz tal-EURES

Wara li temmet l-istudji tagħha, Kirsten bdiet tgħallem fi skola primarja fil-pajjiż ta' oriġini tagħha, in-Netherlands, fejn kienet kuntenta ħafna. “Kelli appartament sabiħ ħafna u ħajti kienet togħġobni,” kompliet tgħid. “Iżda xorta waħda kont għadni noħlom li mmur ngħix l-Iżvezja.”

Kirsten rat avviż ta’ impjieg permezz tal-EURES, fejn kienu qegħdin ifittxu għalliema fl-Iżvezja. “Ma kienx hemm bżonn li tkun taf titkellem Żvediż perfett, u allura ħsibt li dan kien iċ-ċans tiegħi.”

Bl-għajnuna tal-EURES, hija sabet impjieg fil-Muniċipalità ta’ Mora, fejn ilha taħdem minn Jannar tal-2018 ’l hawn.

Similaritajiet u differenzi

Merlijn Scheperboer, benefiċjarja Olandiża oħra tal-EURES, ukoll ilha taħdem bħala għalliema fil-Muniċipalità ta’ Mora minn Awwissu tal-2017. Fil-każ ta’ Merlijn, madankollu, l-għażla li tmur taħdem fl-Iżvezja kienet aktar waħda prattika.

Merlijn kienet qed tistudja fil-belt Żvediża ta’ Linköping fl-2017 meta ngħatat “opportunità eċċellenti”. “Qatt ma ħsibt li nibqa’ hemm wara l-istudji tiegħi, u allura lanqas biss kont qiegħda nfittex impjieg”, tammetti Merlijn.

Madankollu, iddeċidiet li tieħu ċans, peress li kienet taf li se jkun diffiċli għaliha li ssib impjieg bħala għalliema full-time fir-reġjun tagħha fin-Netherlands. “Kulma stajt nagħmel kien li nkun għalliema sostituta, mingħajr l-iċken sigurtà.”

“Wara li l-gvern għolla l-età tal-irtirar, l-għalliema aktar anzjani kellhom jaħdmu aktar fit-tul u l-postijiet battala għal għalliema żgħażagħ kienu ftit. Dan ma kienx japplika għall-pajjiż kollu, iżda kien il-każ taż-żona fejn kont ngħix jien.”

“Irridu nħarsu lil hinn mill-fruntieri”

Skont Lara Feller, il-Konsulenta tal-EURES fis-Servizz Pubbliku tal-Impjiegi Żvediż Arbetsförmedlingen li tat pariri lil Kirsten u lil Merlijn, Arbetsförmedlingen ilha tikkoopera mill-qrib mal-Muniċipalità ta’ Mora mill-2016.

“Qed ikollna nuqqas inkwetanti ta’ għalliema fl-Iżvezja u rridu nħarsu lil hinn mill-fruntieri,” tispjega Lara.

“Peress li jien stess nitkellem bl-Olandiż, u rajna li l-Olandiżi inġenerali m’għandhomx diffikultà kbira biex jitgħallmu l-lingwa, kien l-ewwel pajjiż tal-għażla tagħna.

“Ktibt avviż bl-Olandiż u rreklamajt fuq il-midja soċjali, u malajr ġejt f’kuntatt ma’ Kirsten u Merlijn. Stedinnihom għal intervista, dawwarnihom mal-iskola u madwar il-belt, u ngħataw offerti ta’ impjieg.”

“L-EURES għenni kważi f’kollox”

Lara u l-EURES għenu f’diversi aspetti tat-trasferiment tal-għalliema – “kważi f’kollox”, kif qalet Merlijn.

“Lara Feller titkellem bl-Olandiż bħali. U allura kien veru faċli li tikkomunika magħha,” tgħid Kirsten. “Minbarra li għenitni biex insib impjieg, għenitni wkoll insib appartament.”

“Żgur nirrakkomanda lill-EURES lil ħaddieħor,” qalet Kirsten. “Ksibt l-għajnuna kollha li kelli bżonn u Lara għadha interessata fija u f’kif sejra fl-impjieg.”

“Napprezza ħafna l-għajnuna tal-EURES u żgur nirrakkomanda l-organizzazzjoni lil kull min qed jaħseb li jmur jgħix barra pajjiżu,” qalet Merlijn.

“Meta tmur tgħix f’pajjiż ġdid, ħafna mill-affarijiet ikunu xi ftit differenti u ma tkunx taf fejn għandek tmur u dak li għandek tagħti prijorità. L-EURES huwa appoġġ tajjeb ħafna biex jgħinek tibda.”

Jekk inti interessat taħdem barra l-pajjiż, tista’ tikkuntattja lill-Konsulent lokali tiegħek tal-EURES illum stess!

 

Links relatati:

Arbetsförmedlingen

 

Aqra aktar:

Jiem Ewropej tal-Impjiegi

Drop’pin@EURES

Sib Konsulent tal-EURES

Il-Kundizzjonijiet tal-Ħajja u tax-Xogħol fil-pajjiżi tal-EURES

Il-Bażi tad-Data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Onlineli ġejjin

L-EURES fuq Facebook

L-EURES fuq Twitter

L-EURES fuq LinkedIn