Poist ghlasa a bhfuil an-tóir orthu in 2023

Thart ar 10 nó 20 bliain ó shin, ní raibh cuid de na poist seo ann. Bhí poist eile ann, ach bhí cuma an-difriúil ar an scéal. Agus sinn ag iarraidh todhchaí ár bpláinéid a chosaint, tá scileanna glasa ag éirí níos tábhachtaí ná riamh.

Cé nach furasta ‘poist ghlasa’ a shainiú, is é atá i gceist leo go ginearálta poist atá dírithe ar an gcomhshaol – cuir i gcás poist a bhaineann le hacmhainní nádúrtha agus le spásanna an domhain a chosaint, agus astaíochtaí agus tionchair dhíobhálacha á dteorannú ag an am céanna. Seo cuid de na poist is mó a bhfuil tóir orthu faoi láthair.

Innealtóir fuinnimh in-athnuaite

Bíonn gá i gcónaí ag cuideachtaí fuinnimh le hinnealtóirí oilte. San am a d’imigh thart, ba sna hearnálacha ola, guail agus gáis formhór na bpost. De réir mar a théann earnáil an fhuinnimh in-athnuaite i méid, tá méadú ag teacht ar líon na bpost fuinnimh ghlais freisin. Mar shampla, d’fhéadfá a bheith i do shuiteálaí painéil gréine nó i do theicneoir tuirbín gaoithe. Beidh go leor scileanna úsáideach ar fud na ról éagsúil, mar sin agus na scileanna cearta agat, beidh an-tóir ort.

Innealtóir sibhialta

Mar innealtóir sibhialta, déanfaidh tú foirgnimh agus struchtúir eile a dhearadh. Ar na saolta seo, cuireann rialacha inbhuanaitheachta iallach ar thionscadail tógála cur amú fuinnimh agus acmhainní eile a sheachaint. Mura mbíonn tú i mbun foirgnimh a dhearadh, d’fhéadfadh post sa phleanáil inbhuanaithe baile a bheith ní b’oiriúnaí duitse. Breathnaíonn pleanálaithe baile ar spásanna uirbeacha ar bhealach leathan chun iad a dhéanamh níos glaise agus ‘ciorclach’, rud a chiallaíonn go n-athúsáidtear iontu acmhainní agus go seachnaítear iontu dramhaíl. D’fhéadfá a bheith i do bhainisteoir tionscadail freisin, rud a chiallódh go mbeifeá i gceannas ar thionscadail tógála ó lá go lá.

Eolaí

Mar eolaí comhshaoil, déanfaidh tú faisnéis a bhailiú, a anailísiú agus a chur i láthair chun cabhrú leis an bpláinéad a chosaint. D’fhéadfadh do chuid oibre cabhrú chun freagraí a fháil ar chuid de na dúshláin is mó ar domhan, cuir i gcás an t-athrú aeráide. D’fhéadfá díriú freisin ar ghnéithe ar leith de sin amhail cáilíocht an uisce, na hithreach nó an aeir. D’fhéadfá a bheith i do chomhairleoir nó i do speisialtóir freisin, rud a chiallódh go mbeadh sé mar chuid de do phost cabhrú le heagraíochtaí a bheith níos glaise agus níos inbhuanaithe.

Bainisteoir iascaigh

Post bainistíochta tionscadal a d’fhéadfadh a bheith ní ba shonraí é post mar bhainisteoir iascaigh. Mar chuid den ról sin, bheadh ort stoic éisc a bhainistiú, rud atá thar a bheith tábhachtach ó thaobh na bithéagsúlachta de. D’fhéadfá a bheith ag plé freisin le gnéithe dlíthiúla agus fiú le héigeandálaí, cuir i gcás doirteadh ola.

Crannlia

Más mian leat a bheith gníomhach agus lasmuigh faoin aer, d’fhéadfadh an chrannliacht a bheith ar do shon. Ní bhaineann an ghairm seo le crainn a ghearradh síos. Tá sé dírithe go mór mór ar an gcomhshaol freisin. Is éard atá i gceist leis an gcrannliacht crainn agus toir nua a chur, aire a thabhairt do chrainn mhíshláintiúla, agus an timpeallacht nádúrtha a chosaint go ginearálta. Ar an gcaoi chéanna, caomhnaíonn foraoiseoirí foraoisí agus déanann siad iad a athghiniúint, lena n-áirítear iad a chosaint ar ghalair agus ar fhalscaithe, agus dul i ngleic leis an dífhoraoisiú.

Dearthóir táirge

Ní mór do dhearthóirí táirgí táirgí a chruthú a mhaireann níos faide, a oibríonn ar bhealach níos éifeachtúla, agus a mbíonn tionchar níos lú acu ar an gcomhshaol. Is féidir le táirgí glasa a bheith éagsúil óna chéile, cuir i gcás an pacáistiú in-athchúrsáilte agus gluaisteáin leictreacha. Sampla suimiúil eile is ea éadaí. Chun go mbeadh táirgeadh éadaí in ann a thionchar ar an gcomhshaol a laghdú, lena n-áirítear dramhaíl ó ‘mearfhaisean’, tá dearthóirí faisin ag teastáil chun éadaí a dhearadh ina n-úsáidtear ábhair athchúrsáilte agus a mhairfidh níos faide.

Cé go mb’fhéidir nach cosúil le gnáthphoist ghlasa iad roinnt de na gairmeacha sin, léiríonn an sampla thuas go bhfuil go leor bealaí ann chun gairm bheatha a aimsiú a mbeadh tionchar dearfach aige ar an gcomhshaol, is cuma cad iad do láidreachtaí féin nó cén earnáil ina n-oibríonn tú.

Coinnigh aigne oscailte agus coinnigh do spriocanna i gcuimhne – tá go leor post glas ann duit!

I gcomhpháirt le EURES, an Tairseach Eorpach um Shoghluaisteacht ó Phost go Chéile.

Léigh tuilleadh:

Laethanta Fostaíochta Eorpacha

Aimsigh Comhairleoirí EURES

Dálaí maireachtála agus oibre i dtíortha EURES

Bunachar Sonraí Post EURES

Seirbhísí EURES le haghaidh fostóirí

Nuacht agus ImeachtaíEURES

Imeachtaí ar Líne a bheidh ar siúl go luath

EURES ar Facebook

EURES ar Twitter