Mekkanik tar-roti għandu opportunitajiet ġodda fin-Norveġja

Minn mindu dawwar il-passjoni tiegħu f’karriera professjonali, Grzegorz Osóbka kien kiseb aktar minn sitt snin ta’ esperjenza fix-xogħol bir-roti. Minkejja dan, sabha diffiċli biex isib xogħol xieraq f’pajjiżu, il-Polonja, għalhekk beda jwessa’ t-tfittxija tiegħu u jfittex opportunitajiet barra mill-pajjiż. Hawn hu fejn daħal in-network tal-EURES, u l-promozzjoni tiegħu ta’ firxa wiesgħa ta’ opportunitajiet tax-xogħol madwar l-UE.

“Minn dejjem kont aġġornat b’offerti ta’ xogħol ġodda," spjega Grzegorz. “Meta rajt xi offerti ta’ xogħol barra mill-pajjiż, ħsibt “għaliex le?”  Ridt nipprova xi ħaġa ġdida. Fittixt online dwar il-kumpanija Bike Brothers u sibt li dehru bħala kumpanija serja u stabbli.”

Il-pożizzjoni li applika għaliha Grzegorz intbagħtet lill-EURES il-Polonja minn EURES in-Norveġja, u ġiet promossa mal-Polonja (u l-UE b’mod aktar wiesa’), wara li Bike Brothers avviċinaw in-network. “Konna qed infittxu mekkaniks tajbin u għandna esperjenza tajba b’mekkaniks mill-Ewropa fil-passat,” spjega rappreżentant mill-kumpanija.

“Huwa importanti li jkollna mekkaniks tar-roti tajbin,” kompla jgħid, “u d-domanda għal mekkaniks tar-roti kwalifikati tajbin, hija għolja. Illum il-ġurnata, in-Norveġiżi jużaw ir-roti tagħhom aktar, biex jivvjaġġaw għax-xogħol, l-iskola, il-ħwienet tal-merċa, eċċ.”

Ir-raġuni li Bike Brothers  kienet qed tfittex lil hinn mill-fruntieri tan-Norveġja hija li, filwaqt li l-Polonja m’għandhiex opportunitajiet għall-mekkaniks tar-roti, in-Norveġja għandha l-problema opposta. “Huwa kważi impossibbli li ssib mekkaniks tar-roti tajbin fin-Norveġja. Il-ftit kandidati tajbin huma impjegati minn kumpaniji oħra.”

Dan ipprovda lil Grzegorz bl-opportunità li kien qed ifittex. Huwa bagħat applikazzjoni għal xogħol lill-Uffiċċju Reġjonali tax-Xogħol f’Bialystok u ftit xhur wara, Bike Brothers  ikkuntattjawh u offrewlu perjodu ta’ prova bħala mekkanik tar-roti.

Id-deċiżjoni li jiċċaqlaq lejn in-Norveġja biex jaħdem ma’ Bike Brothers kienet esperjenza pożittiva għal Grzegorz. “Issa għandi kundizzjonijiet tax-xogħol aħjar u qed nagħmel xogħol li dejjem kont inħobb. Inħossni tajjeb ukoll fost il-kollegi sħabi l-ġodda. Insewwi r-roti u nitkellem mal-klijenti.”

Huwa ssetilja wkoll fil-ħajja l-ġdida tiegħu fin-Norveġja. “L-aktar ħaġa li nnotajt hija li fin-Norveġja, il-ħajja hija aktar kalma u mhux mgħaġġla. In-nies huma edukati ħafna. Bħala klijenti, jistennew li jkun hemm l-aqwa kwalità u mhux l-orħos prezz. Kważi kulħadd jitkellem bl-Ingliż — għalija dan kien tassew ta’ għajnuna. Hemm ukoll arja nadifa u natura sabiħa!”

L-EURES tan-Norveġja u n-netwerk usa’ tal-EURES huma pjattaforma kbira għal kumpaniji bħal Bike Brothers li jridu jattiraw ħaddiema tas-sengħa minn madwar l-UE. “Il-kollaborazzjoni kienet tajba ħafna,” qal ir-rappreżentant tal-kumpanija. "Kellna appoġġ tajjeb ħafna mill-EURES minn meta ppreżentajna r-reklam fuq il-post tax-xogħol. Żgur li se nerġgħu nużaw l-EURES fil-futur.”

Links relatati:

Sit web ta’ Bike Brothers

Aqra aktar:

Jiem Ewropej tal-Impjiegi

Drop’pin@EURES

Sib Persunal tal-EURES

Kundizzjonijiet tax-xogħol u l-għajxien fil-pajjiżi tal-EURES

Il-Bażi tad-Data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Onlineli ġejjin

L-EURES fuq Facebook

L-EURES fuq Twitter

L-EURES fuq LinkedIn