Speċjalista tal-IT Spanjol isib bidu ġdid fil-Ġermanja

Wara li ħalla l-Andalusija, iż-żgħażugħ ta᾽ 27 sena iċċaqlaq lejn Bottrop fil-punent tal-Ġermanja, fejn sab impjieg malajr bis-saħħa tal-appoġġ mill-EURES fil-Ġermanja.

Wara li sar jaf li l-kuntratt tiegħu f᾽Sevilja ma kienx se jiġġedded, Jose kien qed jara x᾽kienu l-għażliet tiegħu. Qatta᾽ semestru fl-Università għat-Teknoloġija fi Graz fl-Awstrija permezz ta᾽ programm tal-Erasmus u kien qed jistudja l-Ġermaniż fl-Istitut Goethe f᾽Sevilja. Minħabba l-qgħad kbir kontinwu fi Spanja, kien qed jikkunsidra jiċċaqlaq lejn il-Ġermanja għal ftit żmien.

Is-servizzi tal-EURES fil-Ġermanja huma fornuti minn German International & Specialized Placement Services (ZAV). Jose mill-ewwel kellu appuntament ma᾽ Markus Skrbina f᾽ZAV, konsulent issekondat lit-tim tal-aġenzija ta᾽ Dortmund, u spjegalu l-possibbiltajiet. "Stajna nwieġbu l-mistoqsijiet kollha tiegħu dwar l-għajxien u x-xogħol fil-Ġermanja, u ssuġġerejna numru ta᾽ postijiet vakanti f᾽din il-professjoni li diffiċli ssib impjegati għaliha," qal Markus.

Bottrop qiegħed fir-reġjun ta᾽ Ruhr, parti mill-Ġermanja li darba kienet magħrufa għall-industrija peżanti u li issa qed tinfetaħ għal industriji ġodda, u fejn, bħal fil-bqija tal-pajjiż, hemm domanda għall-ispeċjalisti tal-IT. Il-kumpanija ta᾽ softwer lokali Celano kienet ilha żmien tfittex  biex issaħħaħ it-tim tagħha, u l-aġenzija għall-impjiegi ssuġġeriet li għandhom ifittxu lil xi ħadd lil hinn mill-fruntieri tal-Ġermanja.

Persunal internazzjonali għal soluzzjonijiet internazzjonali

Għalhekk, f᾽Lulju li għadda, ir-rappreżentanti minn Celano, l-Aġenzija għall-Impjiegi Bottrop u Markus Skrbina, iltaqgħu biex jiddiskutu r-rekwiżiti għal speċjalisti barranin. Ġimagħtejn wara, Jose u rappreżentant ta᾽ Celano tkellmu fuq it-telefon, u wara ġimgħa segwiet intervista wiċċ᾽imb᾽wiċċ. F᾽Ottubru, Jose beda l-impjieg il-ġdid tiegħu.

"Il-parir ipprovdut minn ZAV għinna ħafna, minħabba li dejjem kellna persuna ta᾽ kuntatt li tieħu ħsieb il-mistoqsijiet," qalet il-kelliema għal Celano, Maria Niehoff. "U l-impjegati tagħna jogħġobhom il-fatt li issa għandna persunal internazzjonali."

Jose qed igawdi l-esperjenza, minkejja li għalih kollox ġdid. Huwa qal li,"l-ikbar problema li kellu kienet biex isib post fejn jgħix." U hu mhux l-unika persuna fil-kumpanija tiegħu li qed jaffaċċja ħajja ġdida f᾽pajjiż barrani: Il-Kollega Taljan tiegħu, Michele Geri għadu jasal u kien irrakkomandat ukoll minn ZAV.

Skont Markus Skrbina, is-sekondar tiegħu lit-tim ta᾽ ZAV f᾽Dortmund kienet esperjenza siewja. Bħala aġent fis-servizz tal-impjegaturi f᾽Mülheim, hu issa jista᾽ jitkellem mill-esperjenza meta jippreżenta l-possibbiltà li jirrekluta speċjalisti barranin għal kumpaniji lokali.

Links relatati:

German International & Specialized Placement Services (ZAV)

Celano

L-għajxien u x-xogħol fil-Ġermanja

Aqra aktar:

Sib Konsulent tal-EURES

Kundizzjonijiet tax-xogħol u l-għajxien fil-pajjiżi tal-EURES

Il-Bażi ta᾽ Data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Online li ġejjin

L-EURES fuq Facebook

L-EURES fuq Twitter

L-EURES fuq LinkedIn

L-EURES fuq Google+