Ix-xogħol fit-turiżmu: X’se nieħu minnu?

Working in tourism: What’s in it for me? — EURES

Għaliex it-turiżmu?

Ix-xogħol fit-turiżmu joffri postijiet eżotiċi jew sbieħ, spazji tax-xogħol moderni u ambjent dinamiku. L-impjegati spiss ikunu żgħażagħ, u jġibu magħhom enerġija u sens ta’ gost fit-timijiet u fil-postijiet tax-xogħol. Hemm ħafna possibilitajiet biex tikber personalment u tavvanza fil-karriera – u biex tagħmel differenza. B’xogħol disponibbli fuq bażi permanenti, part-time u staġonali, hemm opportunitajiet għal kulħadd.

Xi jfittxu l-impjegaturi fit-turiżmu meta jiġu biex jaħtru?

Skont ir-riċerka mwettqa bħala parti mill-proġett “Pjan ta' Azzjoni għall-kooperazzjoni settorjali fuq il-ħiliet fit-turiżmu” tal-Executive Agency for Small and Medium-sized Enterprises (l-Aġenzija Eżekuttiva għall-Intrapriżi Żgħar u Medji), l-aktar fattur imfittex mill-impjegaturi hu l-età (21%), bil-kandidati ta’ bejn l-etajiet ta’ 25-35 sena li jiġu minn ta’ quddiem nett. Dan hu segwit mill-qrib mill-ħiliet u mill-kwalifiki akkademiċi rilevanti (18% kull fattur), kif ukoll mill-flessibbiltà u mill-esperjenza professjonali (16%).

X'inhuma l-aktar ħiliet importanti fis-settur tat-turiżmu?

L-attitudni ta’ ospitalità tiġi fil-quċċata tal-ħiliet imfittxija mill-impjegaturi, flimkien mal-ħila li wieħed jifhem u jtejjeb ir-relazzjonijiet umani, il-komunikazzjoni interpersonali u l-kompetenzi lingwistiċi. Dawn il-kategoriji huma wkoll dawk li l-persuni li qed ifittxu impjieg jemmnu li huma l-aktar importanti, għalkemm ta' min jgħid li dawn jixħtu aktar enfasi fuq il-ħiliet lingwistiċi u fuq l-għarfien multikulturali mill-impjegaturi, u anqas fuq il-ħsieb kritiku.

Fejn huma l-aħjar postijiet biex issir taf aktar dwar l-impjiegi fit-turiżmu?

Portals tal-impjiegi, netwerks personali u midja soċjali huma tlieta minn fost l-għodod ewlenin li jużaw in-negozji tat-turiżmu biex isibu impjegati ġodda. Siti web tal-kumpaniji u reklutaturi professjonali jintużaw ta’ spiss ukoll. Ara li tisfrutta dawn l-għodod għall-benefiċċju tiegħek biex timmassimizza l-possibilitajiet tiegħek li ssib impjieg.

Kif tista’ tikseb il-ħiliet li qed ifittxu l-impjegaturi?

Jekk tixtieq tirfina l-ħiliet tiegħek qabel ma taqbad karriera fl-industrija tat-turiżmu, hemm firxa ta’ programmi tal-UE li jistgħu jgħinuk. Dawn jinkludu l-EURES, li għandu taqsima ddedikata għall-persuni li qed ifittxu impjieg u funzjonijiet estensivi, Your first EURES Job (L-ewwel impjieg EURES tiegħek), li jgħin lil persuni ta' bejn it-18 u l-35 sena jsibu impjieg fl-UE, u Erasmus+, li jipprovdi firxa ta' opportunitajiet ta' taħriġ u ta' bini ta' netwerks għaż-żgħażagħ.

Fejn tista’ ssib iktar tagħrif?

Is-sit web Jobs in Tourism fih ħafna informazzjoni dwar ix-xogħol fis-settur tat-turiżmu. Parti mill-kampanja ta' komunikazzjoni "It-turiżmu, dinja t'opportunitajiet" (żviluppata fil-qafas tal-proġett tal-"Pjan ta' Azzjoni għall-kooperazzjoni settorjali fuq il-ħiliet fit-turiżmu"), is-sit web hu mfassal biex jippromwovi l-industrija tat-turiżmu, isostni lill-persuni li qed ifittxu impjieg biex jibdew karriera fit-turiżmu u jsostni lill-kumpaniji fis-sejbien ta' impjegati potenzjali.

Biex issir taf aktar dwar il-karrieri fit-turiżmu, ara t-taqsima Looking for a career in tourism? (Qed tfittex li tibda karriera fit-turiżmu?).

Links relatati:

Jobs in Tourism

L-ewwel impjieg EURES tiegħek

Erasmus+

Aġenzija Eżekuttiva għall-Intrapriżi Żgħar u Medji (EASME)

Aqra aktar:

Jiem l-Impjiegi Ewropej

Drop’pin@EURES

Sib Konsulent tal-EURES

Kundizzjonijiet tax-xogħol u l-għajxien fil-pajjiżi tal-EURES

Il-Bażi tad-Data tal-Impjiegi tal-EURES