Rapport annwali tal-2015-2016 li sar mill-Kummissjoni Ewropea sab li 99 minn kull 100 negozju fl-Ewropa huma SMEs u li kollettivament huma jimpjegaw żewġ terzi tal-forza tax-xogħol Ewropea. Meta jitqiesu dawn il-fatti, jidher ċar għaliex l-SMEs jinsabu fil-qalba ta’ ħafna mill-programmi ta’ appoġġ u opportunitajiet ta’ finanzjament tal-Kummissjoni. L-Istrument għall-SMEs hu parteċipant ewlieni f'dan il-qasam u aħna nagħtu ħarsa aktar mill-qrib lejn dak li jinvolvi l-Istrument fl-artiklu li ġej.
X’inhu l-Istrument għall-SMEs?
Bħala parti mill-Orizzont 2020, l-Istrument għall-SMEs jgħin lill-SMEs li għandhom livell għoli ta’ potenzjal jiżviluppaw proġetti innovattivi ġodda li ser jgħinuhom jikbru kemm fl-Ewropa kif ukoll lil hinn minnha. L-SMEs jingħataw finanzjament permezz ta’ applikazzjonijiet ta’ suċċess u huma jibbenefikaw minn proporzjon iqsar ta’ żmien għall-investiment, kapaċità aħjar ta’ innovazzjoni, ikkowċjar ta’ klassi mondjali dwar in-negozju u tkabbir aktar mgħaġġel.
X’kiseb s’issa l-Istrument?
Fl-ewwel tliet snin tiegħu, l-Istrument għall-SMEs ħareġ aktar minn EUR 882 miljun f'finanzjament u appoġġja lil kważi 2,500 SME. L-għan aħħari hu li sat-tmiem tal-Orizzont 2020 jiġu appoġġjati 7,500 SME.
Kif jaħdem l-Istrument?
L-Istrument għall-SMEs jikkonsisti fi tliet fażijiet u hu rrakkomandat li l-SMEs jibdew billi japplikaw għall-Fażi 1:
- Fażi 1: Valutazzjoni tal-Kunċett u tal-Fattibbiltà - Idea għal kunċett (6 xhur). F’din il-fażi, l-SME tħejji proposta ta’ negozju inizjali u l-UE twettaq studju tal-fattibbiltà biex tivverifika l-vijabbiltà tagħha. Hemm disponibbli EUR 50 000 f’finanzjament.
- Fażi 2: Dimostrazzjoni, Replikazzjoni fis-Suq u R&Ż - Kunċett għal maturità fis-suq (1-2 snin). F’din il-fażi, l-SME tkompli tiżviluppa l-proposta tagħha permezz ta’ attivitajiet ta’ innovazzjoni u tabbozza pjan ta’ negozju aktar żviluppat. Hemm disponibbli bejn EUR 0.5 miljun u EUR 2.5 miljun ta’ finanzjament.
- Fażi 3: Tħaffif tan-Negozju u Servizzi ta’ Appoġġ - Ipprepara għat-tnedija fis-suq. Fil-fażi finali, l-SMEs jirċievu appoġġ għat-tħaffif tan-negozju, inkluż it-taħriġ, hekk kif jaqbdu l-prodott tagħhom u jibdluh fi prodott kummerċjabbli. F’dan l-istadju m’hemm l-ebda finanzjament dirett addizzjonali disponibbli.
Min jista’ japplika għall-Istrument?
SMEs uniċi li għandhom l-għan li jagħmlu profitt, jew konsorzju ta’ SMEs li għandhom l-għan li jagħmlu profitt, jistgħu japplikaw għal finanzjament taħt l-Istrument għall-SMEs. L-SMEs għandu jkollhom potenzjal għoli għat-tkabbir u għall-innovazzjoni, u għandu jkollhom ukoll ambizzjonijiet globali qawwijin. L-applikanti kollha kellhom ikunu legalment stabbiliti fl-UE-28 jew f’pajjiż assoċjat mal-Orizzont 2020.
L-SMEs fejn jistgħu jsiru jafu aktar dwar l-Istrument u japplikaw għalih?
L-SMEs interessati jingħataw il-parir li jikkuntattjaw lill-eqreb Punt ta’ Kuntatt Nazzjonali tal-SMEs jew sieħeb tan-Netwerk Enterprise Europe (EEN) tagħhom, peress li huma ser ikunu kapaċi jipprovdu informazzjoni u gwida dwar l-Orizzont 2020 u l-Istrument għall-SMEs. Hemm ukoll informazzjoni utli disponibbli online.
Tixtieq issir taf aktar dwar il-programmi u l-opportunitajiet tal-UE? Għaliex ma tiċċekkjax l-artikli tagħna dwar il-Fond Soċjali Ewropew u l-Erasmus+.
Links relatati:
Punt ta’ Kuntatt Nazzjonali tal-SMEs
Sieħeb tan-Netwerk Enterprise Europe (EEN)
Aqra aktar:
Kundizzjonijiet tax-xogħol u l-għajxien fil-pajjiżi tal-EURES
Il-Bażi ta’ Data tal-Impjiegi tal-EURES
Is-servizzi tal-EURES għall-impjegaturi
Il-Kalendarju tal-Avvenimenti tal-EURES
Avvenimenti Onlineli ġejjin
L-EURES fuq Facebook
L-EURES fuq Twitter
L-EURES fuq LinkedIn
L-EURES fuq Google+
Dettalji
- Data tal-pubblikazzjoni
- 15 Novembru 2017
- Awturi
- L-Awtorità Ewropea tax-Xogħol | Id-Direttorat Ġenerali tal-Impjiegi, l-Affarijiet Soċjali u l-Inklużjoni
- Temi
- Negozju/Intraprenditorija
- Partijiet interessati esterni
- Aħbarijiet dwar is-suq tax-xogħol/aħbarijiet dwar il-mobilità
- Aħbarijiet/rapporti/statistika
- Żgħażagħ
- Sezzjoni(jiet) relatati