Kif nibdel l-internship tiegħi f’impjieg full-time?

Hemm bosta benefiċċji ta’ internship jew apprendistat, iżda jekk qed tittama li din twassal għal impjieg full-time mal-impjegatur tiegħek, jeħtieġ li tibda taħseb ta’ impjegat.

Stabbilixxi għanijiet ċari

Meta tapplika għal internship, ser ikollok għanijiet personali u professjonali. Iżda ta’ min toħloq ftit miri bbażati fuq il-ħtiġijiet tal-kumpanija wkoll. Għalhekk, fil-konverżazzjonijiet inizjali mas-superviżur tiegħek, tibżax tistaqsi eżattament x’qed jistennew minnek, u tibdel din l-informazzjoni f’“lista ta’ kompiti” sakemm iddum hemm. Li jkollok għanijiet ċari ser jgħinek tiffoka – u li tiksibhom ser jagħtik lista ta’ kisbiet li jimpressjonaw lill-imgħallem tiegħek meta tispiċċa l-kollokament tiegħek.

Aħseb dwar il-ħtiġijiet tal-impjegaturi tiegħek

Iva, qed tagħmel internship biex tavvanza l-karriera tiegħek, iżda x’jeħtieġu l-impjegaturi tiegħek? X'qed ifittxu li jiksbu l-maniġers tiegħek, u għaliex qed jaħdmu b'dan il-mod? Jekk tista’ tasal għal xi jfisser “suċċess” għal dawk f’pożizzjoni ogħla fl-organizzazzjoni, u tallinja l-mod ta’ kif taħseb dwar ix-xogħol tiegħek mal-għanijiet tan-negozju tagħhom, ser timxi ħafna.

Kun lest biex tagħmel xogħol menjali

Għalkemm li tħares lejn l-istampa kollha u li taħseb dwar fejn tista’ żżid valur huwa importanti, dejjem ser ikun hemm xogħol ta’ livell baxx li jrid jsir. U, bħala l-intern, x’aktarx int ser tintalab tagħmlu! Iżda jekk turi li tista’ tagħmel xogħlijiet menjali wkoll, ser tibni reputazzjoni tajba. Jekk taf tlesti saħanistra l-aktar kompiti bażiċi b’entużjażmu u attenzjoni, aktarx ser tiġi fdat b’xogħol aktar interessanti fil-futur.

Agħmel sforz biex tintegra

X’jilbsu n-nies fl-uffiċċju? Kemm jitkellmu ma’ xulxin b’mod formali – jew informali? Kemm titqies twila żżejjed waqfa għal kafe? Kull uffiċċju għandu l-kultura tiegħu, iżda jekk tista’ tasal għal liema huma r-regoli mhux miktuba, u ssegwihom, ser tibda tintegra. U aktar kemm tintegra faċilment, aktar hemm probabbiltà li n-nies ser iqisuk bħala kollega aktar milli “l-intern”.

Għidilhom li tixtieq tibqa’

Mhux dejjem ikun ovvju li xi ħadd fuq internship jixtieq jibqa’ u jagħmlu impjieg full-time. Għalhekk, għamilha ovvja! Meta titkellem mas-superviżur tiegħek, kun dirett dwar il-fatt li tara din l-internship bħala l-bidu ta’ relazzjoni twila, u staqsi x’tista’ tagħmel biex tisfruttaha bl-aħjar mod. Dawn jistgħu jissorprenduk billi jagħtuk idea aħjar ta’ x’inhuma l-pjanijiet fit-tul tagħhom u kif int tista’ tidħol fihom.

Osserva u għin lil ħaddieħor

Il-kollega tiegħek dejjem jiffajlja l-karti meta jista’ jkun qed jagħmel xogħol aktar importanti? Tista’ toffri li tagħmlu int? Jekk tosserva biżżejjed biex tinnota fejn tista’ tagħmel il-ħajja ta’ xi ħadd iktar faċli billi tagħmel ammont żgħir ta’ xogħol amministrattiv – u tagħmlu tajjeb – dawn mhux se jinsewk. Karatteristiċi bħall-empatija u t-tjubija jafu ma jidhrux fil-biċċa l-kbira tad-deskrizzjonijiet tal-impjiegi, iżda huma apprezzati fl-ambjent tal-uffiċċju. 

Staqsi mistoqsijiet... b’mod xieraq

Tibżax tistaqsi mistoqsijiet dwar ix-xogħol tan-nies, speċjalment jekk juru li jriduk tifhem l-industrija jew is-settur aħjar. Iżda kun ċert li tifhem ta’ madwarek. Tinterrompix xogħol jew laqgħat – sib ħin fejn in-nies ma jkunux imħabbtin wisq, u dejjem staqsi jekk huwiex ħin tajjeb biex titkellem. U fuq nota relatata...

Uri l-apprezzament tiegħek

Dejjem irringrazzja lin-nies ta’ ħinhom, speċjalment jekk ħadu waqfa mix-xogħol biex joffrulek parir jew informazzjoni. Fi tmiem l-internship tiegħek, tista’ wkoll tħalli lill-impjegaturi tiegħek kartolina jew nota biex tirringrazzjahom tal-esperjenza... u tfakkarhom dwar id-dettalji ta’ kuntatt tiegħek f’każ li jkun hemm opportunità ta’ impjieg full-time.

 

Aqra aktar:

Jiem l-Impjiegi Ewropej

Drop’pin@EURES

Sib Konsulent tal-EURES

Kundizzjonijiet tax-xogħol u l-għajxien fil-pajjiżi tal-EURES

Il-Portal tal-EURES

Il-Kalendarju tal-Avvenimenti tal-EURES

Avvenimenti Online li ġejjin

L-EURES fuq Facebook

L-EURES fuq Twitter

L-EURES fuq LinkedIn