Il-fattur flex: kuntratti temporanji qed jiżdiedu fin-Netherlands

The flex factor: temporary contracts on the rise in the Netherlands — EURES

Fin-Netherlands, ‘flexwerk’ tirreferi għal xogħol imwettaq taħt kuntratt ta’ impjieg flessibbli. Is-sigħat u l-post tax-xogħol jiddependu fuq il-ħtieġa tal-impjegatur u jistgħu jvarjaw minn ġimgħa għal ġimgħa u minn staġun għal staġun.

Aktar minn terz tal-impjegati jaħdmu fuq bażi flessibbli, kwart minnhom taħt kuntratt temporanju. Aġenziji tal-impjiegi privati għandhom rwol importanti biex iqabblu impjegaturi ma’ persuni xierqa li qed ifittxu x-xogħol.

"Matul perjodu ta’ kriżi ekonomika fis-snin tmenin, ix-xogħol flessibbli kien opportunità importanti ħafna għaż-żgħażagħ qiegħda biex isibu xogħol," spjegat il-Konsulent Nazzjonali tal-EURES Mathilde Kockelkoren, ibbażata f’Amsterdam. "Fl-istess ħin, ix-xogħol flessibbli kien inqas ta’ riskju għall-impjegaturi. Wara li spiċċat il-kriżi, ix-xogħol flessibbli sar meqjus bħala tip ta’ kuntratt normali. Illum il-ġurnata huwa normali ħafna li tibda xogħol fuq bażi temporanja, u dan jipprovdi kemm lill-impjegat kif ukoll lill-impjegatur b’perjodu itwal ta’ żmien biex jagħtu prova tal-ħiliet tagħhom.”

Qalet li l-vantaġġ ta’ xogħol flessibbli huwa li l-impjegatur huwa iktar lest li jimpjega persunal ġdid u temporanju, għaliex ikun jista’ jitterminalhom l-impjieg mingħajr konsegwenza jekk ikun hemm bżonn. Iż-żgħażagħ spiss jippreferu l-opportunità li jaħdmu fuq bażi flessibbli u jiksbu esperjenza f’postijiet tax-xogħol differenti. "In-numru ta’ nies li konxjament jagħżlu dan it-tip ta’ impjieg qiegħed jikber, u għall-Ewropej jipprovdi opportunità biex jinbeda impjieg fis-suq tax-xogħol Olandiż", spjegat.

Diversi tipi ta’ impjiegi jistgħu jitwettqu fuq bażi flessibbli, minn dawk li m’għandhomx rekwiżiti edukattivi speċifiċi għal pożizzjonijiet bi kwalifiki għoljin. "Ir-rekwiżiti tal-lingwa jiddependu mill-impjieg”, qalet Mathilde. "Għall-IT u s-settur tal-inġinerija, l-Ingliż huwa r-rekwiżit. Għalkemm jekk wieħed ikun irid jibni ħajja soċjali, ċertu għarfien bażiku tal-lingwa Olandiża żgur li huwa ta’ vantaġġ.”

Kull min hu interessat isir jaf iktar dwar xogħol flessibbli, it-tipi ta’ kuntratti disponibbli u d-drittijiet tal-impjegati jista’ jikseb din l-informazzjoni bl-Ingliż fuq il-websajt werk.nl u mill-EURES.

"L-EURES jista’ jipprovdi lista ta’ aġenziji privati affidabbli, li jistgħu jiġu vverifikati wkoll fis-siti tal-ABU u NBBU – dawn huma l-federazzjonijiet tal-aġenziji privati tal-impjiegi", qalet Mathilde. "Flimkien mal-ABU u l-NBBU ipproduċejna vidjo animat dwar il-flexwerk fin-Netherlands."

Links relatati:

Aqra aktar:

Jiem Ewropej għall-Impjiegi

Drop’pin@EURES

Sib Konsulent tal- EURES

Kundizzjonijiet tax-xogħol u l-għajxien fil-pajjiżi tal-EURES

Il-Bażi tad-Data tal-Impjiegi tal-EURES