L-EURES jgħin lil persuna Slovakka li qed tfittex impjieg issib xogħol bi kwalifiki għoljin fil-Finlandja

Janne Vainikkala and Alexndra Mikulaslova

Alexandra kienet ilha f’impjieg fis-settur Slovakk tal-esportazzjoni u l-importazzjoni għal sentejn u nofs meta ħasset li ma kinitx għadha miexja ’l quddiem. Hija bdiet taħseb dwar il-ħbieb tagħha u sħabha tal-iskola li marru jgħixu barra minn pajjiżhom, u l-idea dehret interessanti għaliha. “Kont naf li xtaqt nipprova l-ħajja barra minn pajjiżi u nivvjaġġa ftit, l-idea kienet togħġobni. Għażilt il-Finlandja abbażi tal-esperjenza tal-ħbieb tiegħi li diġà kienu hemm,” hija tgħid.

Bis-saħħa tal-EURES, Alexandra u l-għarus tagħha sabu xogħol fl-industrija tal-ikel fil-Finlandja, li ma kienx jirrikjedi kwalifiki speċifiċi jew ħiliet tal-lingwa Finlandiża. Eventwalment, telqet minn dan ix-xogħol biex tistudja l-lingwa Finlandiża.

“Matul l-istudji lingwistiċi tiegħi, kont qed infittex internship, u għalhekk ikkuntattjajt lill-impjegatur Finlandiż preċedenti tiegħi. Kont interessata f’kompiti relatati mar-riżorsi umani u t-taqsima tar-remunerazzjoni, minħabba li fis-Slovakkja, wettaqt studji relatati ma’ finanzi, banek u investimenti b’fokus fuq il-ġestjoni finanzjarja,” kompliet tgħid. Meta kkuntattjajt il-kumpanija, sirt naf li ngħaqdet ma’ parti minn Econia, kumpanija Finlandiża oħra li hija wkoll Membru tal-EURES. Econia tipprovdi servizzi ta’ reklutaġġ għal applikanti minn madwar id-dinja kollha.”

Mill-2014, il-Konsulent Finlandiż tal-EURES Tomi Puranen ħadem mill-qrib ma’ Janne Vainikkila minn Econia biex jappoġġa lil persuni li qed ifittxu impjieg billi jipprovdi fieri tal-impjiegi, vjaġġi ta’ reklutaġġ, seminars, workshops, xandiriet TE-live u filmati informattivi. Huma pparteċipaw ukoll fl-avveniment EURESinAction f’Ruma flimkien fl-2022.

Alexandra hija eżempju tajjeb ħafna ta’ kif in-nies jevolvu f’pajjiż ġdid u jsibu posthom f’kultura u prattiki ta’ xogħol ġodda,” tgħid Janne.

Meta Alexandra saret taf il-Finlandiż, hija reġgħet lura taħdem ma’ Econia biex tikkontribwixxi l-għarfien espert tagħha stess fil-kalkolu tas-salarji. Dan juri kif isir possibbli li ssib xogħol fil-qasam tal-għarfien espert tiegħek aktar tard, meta tkun tgħallimt il-lingwa lokali,” isostni Tomi.

Alexandra issa ilha taħdem għal Econia għal ħames xhur, u tirrifletti dwar l-esperjenza tagħha stess barra mill-pajjiż.

“Ninsab grata għall-opportunità li nista’ ngħin u nappoġġja lill-ħaddiema u lill-applikanti f’sitwazzjonijiet li jien stess kont ninsab fihom,” hija tgħid. Bidla bħal din hija dejjem bħal eżami għal persuna, u tgħallimt ħafna dwari nnifsi. Iltqajt ma’ nies ġodda u għamilt ħbieb ġodda, tgħallimt dwar kulturi differenti, u dan kollu tani perspettiva ġdida.”

Alexandra tfaħħar is-servizzi pprovduti mill-EURES li għenuha taħdem barra minn pajjiżha. “Li persuna titlaq minn pajjiżha mhijiex ħaġa faċli, għalhekk in-nies jeħtieġu appoġġ biex ikunu jistgħu jieħdu din id-deċiżjoni. Il-fiduċja hija importanti ħafna. Is-servizzi tal-EURES huma appoġġati mill-awtoritajiet u l-uffiċjali, u dan jgħin ħafna f’dan ir-rigward. Ċertament nirrakkomanda l-EURES lill-persuni li qed ifittxu impjieg mis-Slovakkja, minħabba li huwa mod sikur kif wieħed isib impjieg f’pajjiż ieħor.”

Interessat li taħdem f’pajjiż barrani? Ara l-pożizzjonijiet vakanti tal-portal tal-EURES jew ikkuntattja Konsulent tal-EURES għall-appoġġ.

Links relatati:

Econia

EURES: Sib impjieg fl-Ewropa

Ikkuntattja Konsulent tal-EURES

Aqra aktar:

Il-Jiem tal-Impjiegi Ewropej

Sib Konsulenti tal-EURES

Kundizzjonijiet tal-ħajja u x-xogħol fil-pajjiżi tal-EURES

Bażi tad-data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES