Qed tfittex impjieg barra minn pajjiżek waqt pandemija? L-esperjenza ta’ Amandine turi li dan huwa possibbli

Looking for a job abroad during a pandemic? Amandine’s experience shows it is possible — Actiris

Meta Amandine ggradwat b’lawrja ta’ Master fl-2019, bdiet tfittex impjieg. L-antropoloġista kienet ħadet sehem fi skambju ta’ Erasmus+fil-Portugall u traineeship fil-Mawrizju, iżda ma damitx ma ndunat li ma kienx faċli li ssib opportunitajiet. Iddeċidiet li tirreġistra ma’ Actiris, is-Servizz Pubbliku tal-Impjiegi li jiġġestixxi s-servizzi tal-EURES fi Brussell, il-Belġju.

Actiris jiftaħ il-bieb għal opportunitajiet barra mill-pajjiż

Amandine ħadet sehem f’sessjoni ta’ informazzjoni ġenerali dwar id-diversi servizzi ta’ Actiris, inkluż preżentazzjoni dwar traineeships barra mill-pajjiż. Qalet lilha nnifisha, “għala mhux jien?” Amandine bdiet tiżviluppa “projet professionel” tagħha (rotta professjonali individwali), għodda li Actiris juża biex jgħin lill-persuni li qegħdin ifittxu impjieg jippjanaw ir-rotta tal-karriera tagħhom u jsibu impjieg jew opportunitajiet ta’ traineeship xierqa. Imbagħad bdiet tapplika għal diversi karigi u ġiet offruta traineeship ta’ tliet xhur ma’ assoċjazzjoni f’Madrid.

COVID-19 iwassal bilfors għal bidla fil-pjanijiet

Amandine marret tgħix fil-kapitali Spanjola biex tibda t-traineeship tagħha fi Frar 2020. Sfortunatament, ftit wara, l-Ewropa bdiet tara l-impatt ta’ COVID-19. Bħal ħafna persuni oħra, Amandine kellha tbiddel il-pjanijiet tagħha.

Hija telqet minn Madrid f’nofs l-esperjenza tagħha u kellha tkompli l-bqija tal-kuntratt tagħha mid-dar fi Brussell. Wara xi żmien, bdiet tapplika għal karigi ġodda fi Brussell iżda skopriet li minkejja li kellha l-kwalifiki t-tajba, ħafna drabi kienet qed tikkompeti ma’ kandidati b'esperjenza fi proċessi ta’ applikazzjoni kompetittivi.

Amandine terġa’ tipprova... u ssib l-opportunità perfetta għaliha

Wara xi ftit xhur, Amandine rrealizzat li ma xtaqitx tirrinunzja mill-pjanijiet oriġinali tagħha li taħdem barra minn pajjiżha. Iddeċidiet li tibda tapplika mill-ġdid u reġgħet ikkuntattjat lill-Konsulent tal-EURES tagħha f’Actiris f’Settembru.

Minkejja l-pandemija li għadha għaddejja, Amandine rċeviet diversi offerti minn impjegaturi f’pajjiżi bħal Spanja, Malta u l-Portugall. Ħafna kienu qed joffrulha xogħol mill-bogħod, iżda hi riedet l-esperjenza li terġa’ taħdem barra minn pajjiżha.

Eventwalment kellha intervista ma’ assoċjazzjoni LGBT f’Valenzja għal kariga li twettaq riċerka dwar l-isport, il-ġeneru u l-orjentazzjoni sesswali. Kienet l-opportunità perfetta għaliha. Amandine kienet verament interessata fl-irwol u, wara li impressjonathom fl-intervista tagħha, ġiet offruta l-impjieg.

Minkejja d-diffikultajiet li ġab miegħu l-COVID-19, Amandine riċentament setgħet tmur tgħix f’Valenzja biex tibda t-traineeship tagħha. Issa qed tgħix f’dar internazzjonali li tikkondividi ma' ħaddieħor fil-belt Spanjola u tinsab kuntenta li għandha l-esperjenza li għal darb’oħra tgħix barra minn pajjiżha.

L-esperjenza ta’ Amandine wriet li, anke fil-kuntest li għadu għaddej tal-COVID-19, l-impjegaturi minn madwar l-Ewropa kollha xorta waħda għadhom ifittxu persunal internazzjonali.

Jekk inti wkoll interessat(a) li ssib impjieg barra minn pajjiżek,ikkuntattja lil Konsulent tal-EURES illum biex tara kif jistgħu jgħinuk issib l-opportunità t-tajba għalik.

Tista’ taqra aktar dwar l-istorja ta’ Amandine f’dan l-artiklu (bil-Franċiż) fuq is-sit web ta’ Actiris.

Links relatati:

Erasmus+

Actiris

Projet professionel

Ikkuntattja Konsulent tal-EURES

Artiklu: "Amandine a fait le pari du stage à l’étranger"

Aqra aktar:

Jiem Ewropej tal-Impjiegi

Sib Konsulenti tal-EURES

Il-kundizzjonijiet tal-ħajja u x-xogħol fil-pajjiżi tal-EURES

Il-Bażi tad-Data tal-Impjiegi tal-EURES